გუშინ, პოპულარულმა ვებ–გვერდმა „Livescore“ საქართველოს ეროვნული ნაკრებისა და იტალიური „ნაპოლის“ შემტევი ხვიჩა კვარაცხელია „სერია A“–ს მიმდინარე სეზონის ვარსკვლავებს შორის დაასახელა.
„ცოტა თუ მიაქცევდა ყურადღებას, როცა ხვიჩა კვარაცხელია ბათუმის „დინამოდან“ ნეაპოლში ჩავიდა. თუმცა, მისმა პერფორმანსმა სეზონის საუკეთესო შენაძენის პრეტენდენტად აქცია, არა მხოლოდ იტალიაში, არამედ მთელ ევროპაში. ჯერ მხოლოდ 21 წლის არის, „სერია A“–ში კი ექვსი გოლი და 5 საგოლე გადაცემა აქვს.
უშიშარი დრიბლიორია და ცდილობს უფრო მეტს, ვიდრე ნებისმიერი სხვა მოთამაშე. იტალიის ჩემპიონატში მეტოქეზე პირისპირ მიდის და 58 დრიბლინგიდან კონკურენტი 19-ჯერ ჩამოიტოვა. ლუჩანო სპალეტის გუნდი შესანიშნავად გამოიყურება. ენერგიული და არაპროგნოზირებადი კვარაცხელია კი „ნაპოლის“ შეტევის მთავარი ფიგურაა“.
ესპანური „ვალენსიას“ გულშემატკივართა ვებგვერდი „Batzine“ კი გუნდის კარის დარაჯ გიორგი მამარდაშვილს ესაუბრა და აზრი „პსჟ“–ის იტალიელ მეკარე, ჯანლუიჯი დონარუმასთან მის მსგავსებაზე ჰკითხა. გიორგი მამარდაშვილმა განაცხადა, რომ იტალიელი მისთვის სამაგალითოა და სასიამოვნოა, რომ მას ადარებენ, თუმცა ბავშვობაში მისი კერპი გერმანიის ნაკრებისა და მიუნჰენის „ბაიერნის“ მეკარე მანუელ ნოიერი იყო.
„რა თქმა უნდა, შესანიშნავია, რომ მადარებენ, რადგან მან უკვე ბევრს მიაღწია ახალგაზრდულ ასაკში. ყოველთვის ყურადღებით ვაკვირდებოდი მის პროგრესს და შემდგომში განვითარებისთვის მის მაგალითს ვიღებდი. ბავშვობაში ჩემი კუმირი მანუელ ნოიერი იყო. ვცდილობდი, მისი მოქმედებები გამემეორებინა“.
გუშინ, ქართული რაგბის ბოლოდროინდელ წარმატებებს იტალიური ვებ–გვერდი „Onrugby“ გამოეხმაურა. საინტერესოა, რომ იტალიელთა ინფორმაციით, საქართველოს რაგბის კავშირი ახალი ზელანდიის ნაკრებთან ტესტ–მატჩის ჩატარებაზე მუშაობს.
„იტალიასთან და უელსთან მოპოვებული ისტორიული გამარჯვებების შემდეგ, ქართველები სერიოზულად ფიქრობენ იმაზე, რომ უმაღლეს სარაგბო დონეზე კიდევ უფრო მყარად დამკვიდრდნენ. ნათელია, რომ საქართველოს რაგბის კავშირის მთავარი მიზანი „ექვსი ერისკენ“ მიმავალ გზაზე წარმატების მიღწევაა, თუმცა, მანამდე საუბარი სხვა ნაბიჯებზეცაა. გაჩნდა ინფორმაციაც, რომ 2023 წლის მსოფლიო თასის წინ საქართველოს ნაკრებს ტესტ მატჩის გამართვა ახალ ზელანდიასთან სურს“.
გარდა ამისა, გამოცემამ „The Times“ გაავრცელა ცნობა, რომ შესაძლოა გარკვეული სიახლეები ვიხილოთ პირველ ქართულ ფრენჩაიზ „შავ ლომთან“ დაკავშირებით. საუბარია გუნდის „ჩელენჯ ქაფში“ ანაც „United Rugby Championship“–ში ჩართვაზე.
თითქმის ერთთვიანი პერიოდის შემდეგ, „ინდიანა პეისერსის“ ქართველ ცენტრალურ თავდამსხმელ გოგა ბითაძეს NBA-ში გაზრდილი სათამაშო დრო მიეცა და ის მოედანზე აქტიურიც გახლდათ.
ინდიანელები შინ „მინესოტა ტიმბერვულვზს“ დაუხვდნენ და 101:115 წააგეს, ბითაძემ კი 15 წუთი ითამაშა და 4 ქულა, 3 მოხსნა, 1 პასი, 2 ჩაჭრა და 3 დაფარება მიითვალა.
ქართველმა კალათბურთელმა 4-დან 2 ორქულიანი ჩააგდო, 1 სამქულიანი ააცილა, ბურთი არ დაუკარგავს და მხოლოდ 1 პერსონალური ფოლი მიიღო.
ორი დღის წინ გავრცელდა ცნობა რომ „მანჩესტერ იუნაიტედის“ მფლობელმა გლეიზერების ოჯახმა კლუბის გაყიდვა გადაწყვიტა.
„იუნაიტედის“ მფლობელები კლუბის სანაცვლოდ, მინიმუმ, 5 მილიარდი ფუნტის მიღებას გეგმავენ, სასურველი თანხა კი 6-8 მილიარდ ფუნტს შორის მერყეობს. პოტენციურ მყიდველებს შორის ფავორიტებად „Facebook“ და „Amazon“ სახელდებიან. ამერიკული კომპანიებისთვის სერიოზული კონკურენციის გაწევას დუბაიელი შეიხები აპირებენ. აღსანიშნავია, რომ „მანჩესტერ იუნაიტედის“ მომავალ მყიდველს, დაახლოებით, 2 მილიარდი ფუნტის დახარჯვა „ოლდ ტრაფორდის“ რეკონსტრუქციაზე მოუწევს.
გლეიზერები კლუბს 17 წელია ფლობენ, თუმცა მათი მუშაობით გუნდის გულშემატკივრები უკმაყოფილოები არიან. უკმაყოფილო იყო კრიშტიანო რონალდოც, რომელმაც პირს მორგანისთვის მიცემულ ინტერვიუში ამერიკული ოჯახი გააკრიტიკა და განაცხადა, რომ მათ კლუბის სპორტული მხარე არ ადარდებდათ.
გუშინ გავრცელდა ინფორმაცია დევიდ ბექჰემის ინტერესთან დაკავშირებით. აღმოჩნდა რომ, „იუნაიტედის“ ლეგენდა აკვირდება მოვლენათა განვითარებას და არ არის გამორიცხული მყიდველთა სცენაზე გამოვიდეს.
ამაზე გამოცემამ „ფაინენშლ თაიმსმა“ დაწერა. ამასთან ერთად ვარაუდი გამოთქვა რომ საწყისი ფასი (5 მილიარდი) ძალიან გაბერილია იმ კლუბისთვის, რომელიც წარმატებებს ვერ აღწევს.
ავტორი
