გუშინ ბრიტანულმა გამოცემამ „football.london“ საინტერესო ინფორმაცია გაავრცელა. ინგლისელი ჟურნალისტების მტკიცებით, მიმდინარე წლის ზაფხულში, საქართველოს ეროვნული გუნდისა და ესპანური „ვალენსიას“ კარის დარაჯი გიორგი მამარდაშვილი ლონდონური „ტოტენჰემის“ მაისურს მოირგებს.
„ზაფხულში „ტოტენჰემის“ ხელმძღვანელობას მნიშვნელოვანი გადაწყვეტილება აქვს მისაღები – ფრანგი უგო ლორისის ღირსეული შემცვლელი უნდა აიყვანოს. კლუბში უკვე კარგა ხანია, რაც აკვირდებიან ბაზარს შესაბამისი კანდიდატების გამოსავლენად. კლუბის უპირველესი სამიზნე „ვალენსიას“ მეკარე გიორგი მამარდაშვილია“, – დაწერა ინგლისურმა ვებგვერდმა.
უგო ლორისი 2012 წელს „ლიონიდან“ გადავიდა „ტოტენჰემში“ და მას მერე კლუბში შეუცვლელი პერსონა და კაპიტანია. მას კლუბთან ხელშეკრულება კიდევ წელიწადზე ოდნავ მეტი აკავშირებს. ჩრდილოლონდონურ კლუბში უკვე გადაწყვიტეს, რომ ზაფხულში ლორისის შემცვლელზე იზრუნებენ.
ლორისი ამჟამად ტრავმირებულია და მარტში დაუბრუნდება გუნდს. ამის შემდეგ მას გადასაწყვეტი ექნება, დარჩეს და იბრძოლოს ადგილისთვის კიდევ ერთი სეზონი, თუ სხვაგან გადავიდეს.
ლორისის შესაძლო შემცვლელთა სიაში გიორგი მამარდაშვილთან ერთად არიან, „მილანის“ მეკარე მაიკ მენიო, „ბრაიტონის“ კარის დარაჯი რობერტ სანჩესი და „ბრენტფორდის“ მეკარედავიდ რეია.
„ტოტენჰემი“ 22 წლის მამარდაშვილს უკვე მეორე სეზონია აკვირდება. ქართველს „ვალენსიასთან“ ხანგრძლივი კონტრაქტი აკავშირებს 2027 წლამდე, რომლის გამოსასყიდი თანხა არც მეტი არც ნაკლები, 100 მილიონი ევროა. „ვალენსიას“ ფინანსური პრობლემები აქვს და გუნდი ცუდად გამოდის ესპანურ „ლა ლიგაში“, ეს კი ნიშნავს, რომ მამარდაშვილის შეძენა გაცილებით იაფადაც იქნება შესაძლებელი.
გუშინ, ვეტერანმა იტალიელმა ფეხბურთელმა ანტონიო კასანომ „ნაპოლის“ შესახებ კიდევ ერთხელ ისაუბრა.
„ეპითეტები ყოველთვის ცოტა იქნება ამ გუნდის დახასიათებისთვის. სიმეონემ 5 წუთი ითამაშა და კარისკენ ოთხჯერ დაარტყა. კვარა მიუხედავად გაცუდებული პენალტისა, ყოველთვის თამაშში იყო. განსაკუთრებული მატჩი ჰქონდა ლობოტკას, რომელიც შეუცვლელი ფეხბურთელია. „ნაპოლი“ იტალიის სიამაყეა, სპალეტიმ კარგი გუნდი შედევრად აქცია. ჩემი კომპლიმენტები დე ლაურენტისს, მაგრამ, რასაც სპალეტი აკეთებს, მარადონას გაკეთებულის გვერდით ვაყენებ“, – განაცხადა ანტონიო კასანომ.
გამოცემა „Corriere dello Sport“-ის მტკიცებით, „მანჩესტერ იუნაიტედის“ მთავარ მწვრთნელ ერიკ ტენ ჰაგს უკანა ხაზის გაძლიერებს სურს და მისი უმთავრესი სამიზნე ნეაპოლელთა ცენტრალური მცველი კიმ მინ-ჯეა.
საინტერესოა, რომ სამხრეთკორეელის ხელშეკრულების თანახმად, ზაფხულში 15-დღიანი პერიოდი იქნება, როდესაც მისი გამოსყიდვა 48 მილიონი ევროს სანაცვლოდ იქნება შესაძლებელი. აღნიშნული „ნაპოლისაც“ ადარდებს და ბოლო პერიოდია, კიმთან ახალი ხელშეკრულების დადებას ცდილობს, სადაც გამოსასყიდი თანხა უკვე 65 მილიონი იქნება.
იტალიურმა კლუბმა 26 წლის აზიელი მცველი გასულ ზაფხულს სტამბულის „ფენერბაჰჩედან“ 20 მილიონი ევროს სანაცვლოდ იყიდა. ამ სეზონში მის ანგარიშზე 30 მატჩში 2 გოლი და 1 საგოლე გადაცემაა.
საქართველოს კალათბურთელთა ეროვნული ნაკრებმა მსოფლიოს 2023 წლის ჩემპიონატის საკვალიფიკაციო ეტაპის ბოლოსწინა მატჩში სტუმრად ნიდერლანდებს მოუგო – 88:80 და 26 თებერვალს, თბილისში ისლანდიასთან გადამწყვეტი მატჩი ელის.
საგზურისთვის ბრძოლაში საქართველოს ნაკრების მეტოქედ სწორედ ისლანდია რჩება, რომელმაც შესარჩევის ბოლოსწინა მატჩი ესპანეთთან ანგარიშით 61:80 წააგო. თამაშის შემდეგ ისლანდიელთა მთავარმა მწვრთნელმა კრეიტ პედერსენმა ყურადღება მომავალ მატჩზე გაამახვილა:
„ესპანელები მთელ მოედანზე ძალიან ეფექტურები იყვნენ და დაგვსაჯეს. კარგად მოქმედებდნენ ფარქვეშ და იდეალურად ისროდნენ პერიმეტრიდან. მეტოქე ექსპერტია თამაშის ტემპის გაკონტროლების კუთხითაც. ვიცით, რომ საქართველოს ნაკრებთან კარგად თამაში შეგვიძლია, თუმცა იოლი მატჩი, რა თქმა უნდა, არ გველოდება. მათთვის წინააღდეგობის გაწევა რთულია, რადგან კარგად შეუძლიათ მეტოქის იერიშის შენელება. ძალიან კარგად უნდა ვითამაშოთ, რომ მოვიგოთ. გადავსებულ დარბაზებში დიდი ნაკრებების წინაააღმდეგ თამაშის გამოცდილება გვაქვს და იმედია, კვირას სასურველ შედეგს მივაღწევთ”.
L ჯგუფიდან ფინალურ ეტაპზე თამაში უკვე განაღდებული აქვთ ესპანეთსა და იტალიას, მესამე გამსვლელ ადგილს საქართველოს ეროვნული გუნდი 5 მოგებით იკავებს, ხოლო ისლანდიას 4 მოგება აქვს. ვინაიდან ზუროსის გუნდს რეიკიავიაკში გამართული თამაში ანგარიშით 88:85 აქვს მოგებული, მსოფლიოს პირველობაზე გამსვლელ გადამწყვეტ მატჩში თუნდაც 2 ქულით წაგებაც ეყოფა.
„პარი სენ ჟერმენის“ მცველმა სერხიო რამოსმა კი სანაკრებო კარიერა ოფიციალურად დაასრულა.
„დადგა დრო დავემშვიდობო ეროვნულ ნაკრებს. დღეს დილით ამჟამინდელმა მწვრთნელმა დამირეკა და მითხრა, რომ მის გეგმებში არ შევდივარ სპორტული ფორმის მიუხედავად. ვიმედოვნებდი, რომ ეს მოგზაურობა უფრო გრძელი იქნებოდა და უკეთესი დასასრული მექნებოდა. სამწუხაროდ, ასე არ იქნება ჩემთვის, რადგან ფეხბურთი ყოველთვის სამართლიანი არ არის“, – განაცხადა სერხიო რამოსმა.
სერხიო რამოსი ესპანეთის ნაკრებში 2005-2021 წლებში თამაშობდა და 180 მატჩში 23 გოლი გაიტანა, თუმცა, ის არც ევრო 2020-სა და არც გასულ მუნდიალზე არ გამოიძახეს.
რამოსი ორჯერ ევროპის, ერთხელ კი მსოფლიოს ჩემპიონი გახდა.
ავტორი
