აშშ-ის პრეზიდენტმა, დონალდ ტრამპმა თავის სოციალურ ქსელში დაწერა, რომ გრენლანდიას უდიდესი მნიშვნელობა აქვს ამერიკის ეროვნული და მსოფლიო უსაფრთხოებისთვის.
როგორც თეთრი სახლის ლიდერმა აღნიშნა, მან გრენლანდიის საკითხთან დაკავშირებით სატელეფონო საუბარი გამართა ნატოს გენერალურ მდივანთან, მარკ რუტესთან. ტრამპი აგრეთვე მზაობას გამოთქვამს გრენლანდიის საკითხი შვეიცარიაში, დავოსის მსოფლიო ეკონომიკურ ფორუმზე განიხილოს.
„მქონდა ძალიან კარგი სატელეფონო საუბარი ნატოს გენერალურ მდივანთან, მარკ რუტესთან, გრენლანდიასთან დაკავშირებით. თანახმად ვარ, შევხვდე სხვადასხვა დაინტერესებულ მხარეს დავოსში, შვეიცარიაში. როგორც ყველას განვუცხადე, გრენლანდია ეროვნული და მსოფლიო უსაფრთხოებისთვის იმპერატიულია. უკან დასახევი გზა არ არის – და ამას ყველა ეთანხმება! ამერიკის შეერთებული შტატები მსოფლიოში უძლიერესი ქვეყანაა. დიდწილად ამის მიზეზი ისაა, რომ ჩვენ ჩემი პირველი ვადის დროს ჯარის აღმშენებლობა დავიწყეთ, რაც უფრო სწრაფი ტემპებით გრძელდება. ჩვენ ერთადერთი ძალა ვართ, რომელსაც მთელ მსოფლიოში მშვიდობის დამყარება შეუძლია – ეს ძალის დემონსტრირებით მარტივადაა შესაძლებელი!“, – დაწერა ტრამპმა.
