ასტანაში გამართულ მაღალი დონის მოლაპარაკებებზე, ყაზახეთი და საქართველო ეკონომიკური თანამშრომლობის გაძლიერებაზე შეთანხმდნენ, მათ შორის, ბაქო-თბილისი-ჯეიჰანის (BTC) მილსადენით ნავთობის გადაზიდვების გაზრდის გეგმებზე. ორმა ქვეყანამ ასევე განიხილა სოფლის მეურნეობის განვითარება, ინვესტიციების გაფართოება და ციფრული სერვისების სფეროში თანამშრომლობა. ამის შესახებ ინფორმაციას euronews ავრცელებს.
საინფორმაციო სააგენტოს ცნობით, ყაზახეთი გეგმავს გაზარდოს ნავთობის ექსპორტი ბაქო-თბილისი-ჯეიჰანის (BTC) მილსადენის საშუალებით, რითაც კიდევ უფრო აღრმავებს სტრატეგიულ კავშირებს საქართველოსთან. ეს გადაწყვეტილება მოჰყვა ასტანაში გამართულ შეხვედრას პრეზიდენტ ყასიმ-ჟომარტ თოყაევსა და საქართველოს პრემიერ-მინისტრ ირაკლი კობახიძეს შორის. ეს განცხადება იმ ფონზე გაკეთდა, როდესაც ყაზახეთი აგრძელებს საექსპორტო მარშრუტების დივერსიფიკაციას ტრანსკასპიური საერთაშორისო სატრანსპორტო მარშრუტის (TITR) მეშვეობით, რომელიც ასევე ცნობილია როგორც „შუა დერეფანი“.
სატრანზიტო მოცულობა ამ მარშრუტზე ბოლო ხუთი წლის განმავლობაში თითქმის გაოთხმაგდა. 2029 წლისთვის ყაზახეთი ელოდება, რომ ყოველწლიურად 3 000-მდე საკონტეინერო მატარებელი იმოძრავებს ამ დერეფანში, რომელიც ჩინეთს ევროპასთან აკავშირებს ყაზახეთის, კასპიის ზღვის, აზერბაიჯანისა და საქართველოს გავლით.
„ჩვენ ვგეგმავთ ნავთობის გადაზიდვების გაზრდას ბაქო-თბილისი-ჯეიჰანის მილსადენით. მუშაობა უკვე მიმდინარეობს სავაჭრო და ეკონომიკური თანამშრომლობის სამთავრობათაშორისო კომისიის ფარგლებში და იმედი მაქვს, დღევანდელი შეხვედრა დაგვეხმარება სამომავლოდ ახალი პრიორიტეტების დასახვაში“, — განაცხადა თოყაევმა. ასტანა ასევე გეგმავს საკუთარი ყოფნის გაძლიერებას საქართველოს შავი ზღვის პორტებში.
ბათუმის ნავთობტერმინალის გარდა, რომელსაც ყაზახური კომპანია „ყაზტრანსოილი“ (KazTransOil) ფლობს, ქვეყანა აფართოებს ლოგისტიკურ ინფრასტრუქტურას ფოთში, სადაც გასულ წელს ყაზახური ინვესტიციით ახალი მულტიმოდალური ტერმინალი გაიხსნა. ოფიციალურმა პირებმა კიდევ ერთ პერსპექტიულ პროექტად ანაკლიის მომავალი ღრმაწყლოვანი პორტიც დაასახელეს.
ეკონომიკური კავშირები კვლავ იზრდება
ორმხრივმა სავაჭრო ბრუნვამ 2025 წელს 184.5 მილიონ აშშ დოლარს მიაღწია, ხოლო 2026 წლის პირველი ოთხი თვის განმავლობაში ვაჭრობის მოცულობამ 53 მილიონი დოლარი შეადგინა.
ამჟამად ყაზახეთში საქართველოს მონაწილეობით 600-ზე მეტი კომპანია ოპერირებს, ხოლო ასტანას საერთაშორისო ფინანსურ ცენტრში (AIFC) რეგისტრირებულია 14 ორგანიზაცია.
„ვაჭრობა და ინვესტიციები ყაზახეთ-საქართველოს ურთიერთობების საფუძვლად რჩება. გლობალური გაურკვევლობის მიუხედავად, ორმხრივ ვაჭრობას ჯერ კიდევ აქვს ზრდის მნიშვნელოვანი პოტენციალი“, — განაცხადა ყაზახეთის პრეზიდენტმა.
„ყაზახეთმა საქართველოს ეკონომიკაში 500 მილიონ დოლარზე მეტი ინვესტიცია განახორციელა და კვლავ რჩება ერთ-ერთ უმსხვილეს ინვესტორად“, — დასძინა მან.
თოყაევმა ასევე წამოაყენა ინიციატივა ორმხრივი „საგზაო რუკის“ შემუშავების შესახებ, რომელიც ფოკუსირებული იქნება ენერგეტიკაზე, ტრანსპორტზე, ინვესტიციებზე, სოფლის მეურნეობაზე, ციფრვიზაციასა და ტურიზმზე.
ორი ქვეყანა შეთანხმდა სასოფლო-სამეურნეო პროდუქტებით ვაჭრობის გაფართოებასა და ამ სექტორში ერთობლივი საინვესტიციო პროექტების განვითარებაზე. აგროპროდუქტებით ვაჭრობა 2025 წელს 77%-ით გაიზარდა და 116 მილიონ დოლარს გადააჭარბა.
ყაზახეთი ცდილობს საქართველოში გაზარდოს მარცვლეულის, ფქვილის, მცენარეული ზეთების, მაკარონის ნაწარმის, ხორცის, რძის პროდუქტების, შოკოლადისა და საკონდიტრო ნაწარმის ექსპორტი.
„ყაზახეთი ძალიან მნიშვნელოვანი პარტნიორია საქართველოსთვის. ჩვენ მივესალმებით ჩვენს ქვეყნებს შორის სტრატეგიული პარტნიორობის დამყარებას და მოუთმენლად ველით თანამშრომლობის გაფართოებას ყველა მიმართულებით“, — განაცხადა კობახიძემ.
ციფრული კავშირების მშენებლობა და კულტურული კავშირების გაძლიერება
ორი ქვეყნის მთავრობამ ასევე აიღო ვალდებულება, გააღრმავოს თანამშრომლობა ციფრულ ტექნოლოგიებსა და ხელოვნურ ინტელექტში (AI). ოფიციალური პირები შეთანხმდნენ გამოცდილების გაზიარებაზე ელექტრონული მმართველობის სერვისების (e-government), GovTech გადაწყვეტილებებისა და ციფრული საჯარო სერვისების მიმართულებით.
ყაზახეთი ასევე მიესალმა ქართული სტარტაპებისა და ტექნოლოგიური კომპანიების მონაწილეობას ასტანას ჰაბსა (Astana Hub) და სხვა რეგიონულ ინოვაციურ ინიციატივებში.
მოლაპარაკებების დროს განიხილეს ტურიზმის სფეროც. ყოველწლიურად საქართველოს დაახლოებით 180 000 ყაზახი ტურისტი სტუმრობს, ხოლო პირდაპირი ფრენები ხორციელდება ალმათიდან, ასტანადან, შიმკენტიდან, აქთაუდან და ატირაუდან თბილისის, ბათუმისა და ქუთაისის მიმართულებით.
თოყაევმა წამოაყენა წინადადება ორმხრივი კულტურული ფესტივალების ორგანიზების შესახებ, რათა გაღრმავდეს გაცვლითი პროგრამები ორ ქვეყანას შორის.
ვიზიტი დასრულდა სტრატეგიული პარტნიორობის შესახებ ერთობლივი განცხადების, ასევე სამი მემორანდუმის ხელმოწერით, რომლებიც მოიცავს თანამშრომლობას კულტურის, ხელოვნური ინტელექტისა და ციფრული განვითარების, და ტურიზმის სფეროებში.
