12 აგვისტოს საღამოს, გომის მთიდან ოზურგეთის მიმართულებით მოძრავი მიკროავტობუსი, რომელშიც ბელარუსი ტურისტები იმყოფებოდნენ, გზის მე-16 კილომეტრზე სავალი ნაწილიდან გადავიდა, ხევში გადავარდა და ხეს შეეჯახა. საუბედურო შემთხვევას ბელარუსის ოთხი მოქალაქე ემსხვერპლა, მათ შორის იყვნენ ბრესტელი 21 წლის გლებ მელნიკი და მისი 20 წლის საცოლე, ნასტასია ფილიუკი.
დაუვიწყარი შთაბეჭდილებების ძიებაში
გომის მთა გურიაში, ზღვის დონიდან 2755 მეტრზე მდებარეობს. მას ხშირად „ღრუბლებს ზემოთ არსებულ კურორტსაც“ უწოდებენ — კარგ ამინდში აქედან შავი ზღვა მოჩანს, ღრუბლები კი სათვალთვალო მოედნების ქვემოთ დაცურავენ. მოგზაურები აქ მზის ჩასვლის სანახავად და გამორჩეული ფოტოების გადასაღებად ამოდიან. გლები და ნასტასიაც გომის მთას სწორედ ამ შთაბეჭდილებებისთვის ეწვივნენ, თუმცა შინ დაბრუნება აღარ ეწერათ.
ახალგაზრდა წყვილის ისტორია
ორივე მათგანი ბრესტიდან იყო და 28-ე საშუალო სკოლაში სწავლობდა. გლები ნასტასიაზე ერთი წლით უფროსი გახლდათ. ნასტასია ეკონომიკას სწავლობდა, გლები კი თევზაობით იყო გატაცებული.
