,,ქართული ოცნება _დემოკრატიული საქართველოს“ თავმჯდომარის, ბიძინა ივანიშვილის მიერ ინტერვიუში გაჟღერებულ პოლიტიკურ გზავნილებზე ,,გურია ნიუსთან“ მმართველი პარტიის წევრმა ალექსანდრე ქანთარიამ ისაუბრა.
_ ბატონო ალექსანდრე, პარტიის თავმჯდომარე ბიძინა ივანიშვილი აცხადებს, დღეს „რუსთავი 2“ რომ გამორთონ, ქვეყანაში აღმავლობისა და აღმშენებლობის მეტს ვერაფერს ნახავთო.
თქვენი პოლიტიკურ გუნდი ფიქრობს, რომ ტელეკომპანია „რუსთავი 2“- ის გამორთვაზეა დამოკიდებული ქვეყნის განვითარება?
_ მისი ნათქვამი პირდაპირ არ უნდა გავიგოთ. რასაც „რუსთავი 2“ აჩვენებს, იმის ადეკვატური მდგომარეობა გარეთ რომ არ არის, ფაქტია.
,,რუსთავი 2“ ამუქებს ქვეყნის მდგომარეობას, არ ცდილობს, რომ რაღაც განსხვავებული აჩვენოს და გარკვეული პოზიტივი შეიტანოს თავის ბადეში. ამაზე იყო საუბარი და არა იმაზე, რომ ერთი არხი თუ არ იქნება, ყველაფერი კარგადაა. პოზიტივი უნდა აჩვენო და ამავე დროს, ის პრობლემებიც, რომლებზეც არავინ ხუჭავს თვალს.
აქ საუბარია მტრის დამოკიდებულებაზე. პარტიული ტელევიზია მაქსიმალურად ცდილობს, სიტუაცია მუქ ფერებში გამოიყვანოს და საზოგადოება ააფეთქოს.
_ ივანიშვილმა განაცხადა, ერთ წელიწადში „რუსთავი 2“-ში განსხვავებული აზრი შევაო. როგორ აპირებთ ამის გაკეთებას?
_ საუბარია მონიტორინგზე. პროფესიონალთა ჯგუფის მიერ გამოაშკარავდება მათი სიყალბე. მე ასე გავიგე, ყოველ შემთხვევაში.
_ პრობლემები, რომლებიც დღეს საქართველოშია, ბიძინა ივანიშვილის მიერ სააშკარაოზე არ იყო გამოტანილი, მეტიც, ინტერვიუში ივანიშვილი ახალი პოლიტიკური რეალობის ჩამოყალიბებას შეეცადა.
იზიარებთ პარტიის ლიდერის პოზიციას, რომ ქვეყანაში სხვადასხვა მიმართულებით, მაგალითად, მართლმსაჯულების სისტემაში, პრობლემები აღარ არსებობს?
_ დადებითი ტენდენციებიც დასანახია. იგივე გუშინ რომ იყო მწვანე ქალაქზე საუბარი, ეს საინტერესოა. ყველაფერს რომ გადახაზავ და მარტო უარყოფითს ხედავ, ამაზეა საუბარი.
რაც შეეხება გამოძიებას, რა თქმა უნდა, საგამოძიებო უწყებებში საჭიროა კვალიფიციური კადრის არსებობა. მათი კვალიფიკაცია რამდენად შეესაბამება მაღალ სტანდარტებს, სხვა საკითხია, რადგან ხშირად ვხედავთ, რომ აცდენაა.
ნამდვილად არ მინდა, რომ სასამართლომ მართოს პროკურატურა და პირიქით, ასეთი ქვეყანა ნამდვილად არ გვინდა.
_ „ქართული ოცნების“ ლიდერების მხრიდან, მუდმივად ხდება 9 წელზე აპელირება, რაც გუშინდელი ინტერვიუდანაც კარგად გამოჩნდა.
როდემდე შეიძლება გაგრძელდეს ,,ქართული ოცნების“ მმართველობის პერიოდში დაშვებული შეცდომების გადასაფარავად ,,ნაციონალური მოძრაობის“ გამოყენება?
_ იმდენად დანაშაულებრივი იყო მათი ქმედებები, რომ ბევრი რამის გამოსწორება 6 წელიწადში ვერ ხერხდება.
როცა შედარებაზეა საუბარი, ბუნებრივია, ხშირად ვიხსენებთ მათ მმართველობას. ჩემთვის ის არის ყველაზე დიდი პრობლემა, როცა „ქართული ოცნების“ ალტერნატივა დღემდე „ნაციონალური მოძრაობაა“.
