დღეს იტალიის მორიგი საფეხბურთო პირველობა იწყება და ხვიჩა კვარაცხელიას „ნაპოლი“ სტუმრად „ფროზინონეს“ დაუპირისპირდება. ნეაპოლელები მინდორზე სათამაშოდ კი გამოვლენ, მაგრამ მათ შორის ხვიჩა კვარაცხელია არ იქნება.
„იტალიის „სერია A“-ს პირველ ტურში ხვიჩა კვარაცხელია ვერ ითამაშებს“. – ეს ინფორმაცია „ნაპოლიმ“ გუშინ ოფიციალურად დაადასტურა.
ქართველს კუნთების გადაღლილობა აღენიშნება, რის გამოც დაისვენებს და „ფროზინონეს“ წინააღმდეგ მოედანზე ვერ გავა. კლუბის განცხადებაში აღნიშნულია, რომ კვარამ გუშინდელი ვარჯიშის ნაწილი გუნდთან ერთად გაატარა, ნაწილი – ინდივიდუალურად პრობლემის გამო.
ჯერჯერობით, უცნობია ტრავმის ხარისხი, მაგრამ სავარაუდოდ, ის სერიოზული არ არის.
საინტერესოა, რომ კვარაცხელიას ტრავმაზე „ნაპოლის“ მთავარმა მწვრთნელმა რუდი გარსიამ „ფროზინონესთან“ მატჩისწინა პრესკონფერენციაზეც ისაუბრა:
„მხოლოდ წინდახედულობა და სიფრთხილე გამოვიჩინეთ. ახლა არ მახსოვს, მაგრამ მცირე დაზიანება ერთ-ერთ ამხანაგურ მატჩში მიიღო, რის გამოც რამდენიმე ვარჯიში და ტესტ-მატჩი გამოტოვა. ბოლო ამხანაგურ შეხვედრაში 70 წუთი ითამაშა, მაგრამ მას შემდეგ, მიუხედავად იმისა, რომ მაგნიტურ-რეზონანსულმა ტომოგრაფიამ აჩვენა, რომ ყველაფერი ნორმალურადაა, ის რაღაცას გრძნობს, დისკომფორტს, როგორც თვითონ ამბობს ინგლისურად. ამიტომ, პირველ მატჩს გამოტოვებს. არ გავრისკეთ და ორშაბათიდან ან სამშაბათიდან, როდესაც ვარჯიშს განვაახლებთ, დაგვიბრუნდება.
ვინ ითამაშებს კვარაცხელიას ადგილას? ჩემი აზრით, მარცხნივ კარგად თამაში ლოზანოსაც შეუძლია, მაგრამ ელმასს და რასპადორისაც. შევაფასებთ სიტუაციას, არ ვიცი, რომელ პოზიციაზე, მაგრამ ახლა მხოლოდ ის მაქვს გადაწყვეტილი, რომ რასპადორი ძირითად შემადგენლობაში იქნება.
ვფიქრობ, „ნაპოლი“ ფავორიტთა შორისაა, მაგრამ ერთადერთი ფავორიტი არ არის. რამდენიმე გუნდი გაძლიერდა, ახალი სეზონია და ყველა თანაბარ პირობებში ვიწყებთ. კიმის გარდა, რომელიც ნატანმა შეცვალა, შემადგენლობა თითქმის უცვლელი დარჩა, მაგრამ ცოტა სიახლე დავამატეთ, მაგალითად, ნახევარდაცვაში კაიუსტეს მოსვლით. მოუთმენლად ველოდებით სეზონის დაწყებას. ვიცით, რომ რთულ მეტოქეს ვეთამაშებით, რომელიც „სერია B“-დან გადმოვიდა შესანიშნავი სეზონის შედეგად და მათ დიდი მოტივაცია ექნებათ“, – განაცხადა რუდი გარსიამ.
ნეაპოლურმა გამოცემამ „Il Mattino“ ხვიჩა კვარაცხელიას კონტრაქტის განახლების შესახებ ახალი ინფორმაცია გამოაქვეყნა. აღმოჩნდა, რომ აურელიო დე ლაურენტისმა ხვიჩას წარმომადგენლებს ერთი მოთხოვნა წაუყენა – ახალ კონტრაქტში არ შეიტანონ გამოსასყიდის პუნქტი, შესაბამისად, არ მიუთითონ კონკრეტული ფასი, რომლის გადახდის შემთხვევაში ნებისმიერ გუნდს შეეძლება მისი შეძენა.
„ქართველი მოთმინებით ელოდება მომენტის დადგომას და დე ლაურენტისმა აგენტებს სთხოვა, რომ დაელოდონ სატრანსფერო ბაზრის დასრულებას, რათა ხელახლა განიხილონ კონტრაქტის პირობები: მართალია, მის ამოწურვამდე ჯერ კიდევ დიდი დროა დარჩენილი, მაგრამ ცხადია, რომ ახლა ის არის „ნაპოლის“ ერთერთი ყველაზე დაბალანაზღაურებადი ფეხბურთელი და ეს არის საკითხი, რომელიც უნდა გადაიჭრას.
დიმაროში, როდესაც მამუკა ჯუღელი და ასევე შუამავალი კრისტიან ძაკარდო შეხვდნენ „ნაპოლის“ მენეჯერებს, საუბარი მხოლოდ ხელფასის გაზრდას შეეხო, მაგრამ დე ლაურენტისი ფიქრობს, რომ „სერია A“-ს საუკეთესო ფეხბურთელი როგორ გაახაროს. საუბარია ახალ კონტრაქტზე, ბონუსების გარდა, დაახლოებით 3.5 მილიონ ევროზე. გამოსასყიდი პუნქტის გარეშე, რადგან ნეაპოლური კლუბის პრეზიდენტს ურჩევნია ეს კონტრაქტში არ შეიტანოს“, – დაწერა გამოცემამ.
ხვიჩა კვარაცხელიას „ნაპოლისთან“ კონტრაქტი 2027 წლამდე აკავშირებს და ამჟამად მისი ხელფასი სეზონში მხოლოდ 1.2 მილიონი ევროა.
გამოცემა „Gazzetta Dello Sport“-ის მტკიცებით, იტალიის ფეხბურთის ფედერაცია ნაკრების მთავარ მწვრთნელად ლუჩანო სპალეტის დანიშვნას ოფიციალურად დღეს დაადასტურებს და მწვრთნელს სამწლიან კონტრაქტს გაფორმებს.
სპალეტიმ ფედერაციას მუშაობაზე თანხმობა პირველივე დღიდან დაუდასტურა, თუმცა, „ნაპოლისთან“ არსებული ცალმხრივი კონტრაქტის გამო საბოლო პასუხისგან მაინც თავს იკავებდა, რადგან არ სურდა თავისი ყოფილი კლუბის პრეზიდენტთან სამართლებრივი დავის დაწყება. მაგრამ, როგორც ჩანს, იტალიის ფეხბურთის ფედერაცია კომპენსაციის საკითხის მოგვარებაზე მუშაობს.
გამოცემის მტკიცებით, ლუჩანო სპალეტის პრეზენტაცია ორშაბათს გაიმართება და სწორედ 21 აგვისტოდან დაიწყებს მუშაობას. იტალიის ნაკრებს 9 და 12 სექტემბერს, ევროპის ჩემპიონატის საკვალიფიკაციო ეტაპის მატჩები ელოდება ჩრდილოეთ მაკედონიასა და უკრაინასთან.
ლუჩანო სპალეტიმ ბოლო ორი წელი „ნაპოლიში“ იმუშავა, რომელიც იტალიის ჩემპიონი გახადა, მაგრამ კლუბი თავისი სურვილით გასული სეზონის დასრულების შემდეგ დატოვა.
ავტორი
