გურია დასავლეთ საქართველოში, შავი ზღვის პირას მდებარეობს.
რეგიონში 10 მუზეუმი ფუნქციონირებს. მხარის უძველესი მუზეუმია ოზურგეთის ისტორიული მუზეუმი, რომელსაც ოზურგეთის მუნიციპალიტეტის სოფლებში გააჩნია რამდენიმე ფილიალი. მხარეთმცოდნეობის მუზეუმია ლანჩხუთსა და ჩოხატაურში. ასევე მოქმედებს მხარეში დაბადებული გამოჩენილი პიროვნებების სახლ-მუზეუმები.
გურიაში, ასევე, არქიტექტურის რამდენიმე ძეგლია, რომელთაგან რვა ეროვნული მნიშვნელობისაა. საერო ხასიათის ნაგებობებიდან აღსანიშნავია, ვაშნარის ნაქალაქარი და ქალაქ ოზურგეთში აღმოჩენილი ოზურგეთის აბანოების ნაშთები. მხარის მნიშვნელოვანი საფორტიფიკაციო ნაგებობებია ასკანის, ბუკისციხის და ლიხაურის ციხეები.
გურია სასოფლო–სამეურნეო მხარეა. სასოფლო-სამეურნეო დანიშნულების მიწის 22,3 ათასი ჰა შეადგენს სახნავს, 19,7 ათასი ჰა – საძოვარს, 1,2 ათასი ჰა – სათიბს, ხოლო 5,5 ათასი ჰა დაუმუშავებელია. სახნავი ფართობების უდიდესი ნაწილი მოდის სიმინდზე და შემდეგ თხილზე. მნიშვნელოვნადაა შემცირებული საბჭოთა პერიოდის წამყვანი კულტურების, ჩაისა და ციტრუსის წარმოება.
მხარის ეკონომიკის მნიშვნელოვანი ნაწილია მომსახურების სფერო, ვაჭრობა და ტურიზმი. ვაჭრობა შედარებით მეტადაა განვითარებული ოზურგეთისა და ლანჩხუთის მუნიციპალიტეტებში. ჩოხატაურის მუნიციპალიტეტში ვაჭრობას უფრო სეზონური ხასიათი აქვს და ზაფხულში მატულობს. ტურიზმი განსაკუთრებით განვითარებულია მხარის შავიზღვისპირეთში, სადაც განლაგებულია ცნობილი კურორტები – ურეკი, შეკვეთილი და გრიგოლეთი, შედარებით ნაკლებად მაღალმთიან ალპურ ზონაში – ბახმარო და გომისმთა. მხარის ტერიტორიაზეა ასევე, ორი ბალნეოლოგიური კურორტი – ნაბეღლავი და ქვედა ნასაკირალი. თუმცა, ამ უკანასკნელების წვლილი მხარის ეკონომიკაში მიზერულია. კურორტ შეკვეთილთან მოქმედებს თანამედროვე ტიპის გასართობი ცენტრი „ციცინათელა“, რომლითაც აქტიურად სარგებლობენ როგორც გურიის, ისე აჭარის კურორტების დამსვენებლები.
რა იგეგმება გურიის რეგიონის ეკონომიკური პოტენციალის გასაძლიერებლად _ა მ საკითხზე “გურია ნიუსს” “გააცოცხლე გურიას” საბჭოს ერთ-ერთი წევრი, სოსო ერქომაიშვილი ესაუბრა.
მისი ინფორმაციით, ადგილობრივი მოსახლეობა ფიქრობს, რომ პატარა ბიზნესის დაწყებით ეკონომიკური პოტენციალი გაძლიერდება.
„გურია ერთ-ერთი რეგიონია, რომელიც პოლიტიკური და ასევე ეკონომიკური აქტივობებით გამოირჩევა. რა ინფორმაციასაც, ვფლობ, სამოქალაქო საზოგადოება, ადგილობრივი მოსახლეობა ფიქრობს, რომ პატარა ბიზნესის დაწყებით გაძლიერდება მთლიანი ეკონომიკური შემოსავლები, ეკონომიკური პოტენციალი, რისი პოტენციალიც, თვითონ რეგიონს გააჩნია და ამ კუთხით მიდის ძირითადი სამუშაოები ამ ეტაპისთვის,”_ამბობს ერქომაიშვილი.
მისივე თქმით, სახელმწიფო ახორციელებს პროექტებს ეკონომიკური აქტივობის გასაძლიერებლად, თუმცა დონორი ორგანიზაციების ჩართულობაც მნიშვნელოვანია.
“სახელმწიფოს აქვს პროექტები, პროგრამები ეკონომიკური აქტივობის გასაძლიერებლად, უფრო მეტის გასაკეთებლად, თუმცა ასევე ჩვეულებრივი დონორი ორგანიზაციების ჩართულობა, უფრო მეტს შეაძლებინებს ადგილობრივ მოსახლეობას. ეს, ალბათ, გარდაუვალი პროცესია, რის გზაზეც ნამდვილად დგას გურია. თუმცა, უფრო მეტი აქტივობები არის საჭირო“, _ ამბობს ის.
ერქომაიშვილის თქმით, თებერვლის ბოლოს „გურიის განვითარების ფონდის” პრეზენტაცია შედგება, რომლის მიზანიც ტურისტული პოტენციალის წარმოჩენა იქნება.
“ვფიქრობთ, რომ „გურიის განვითარების ფონდი“ დაახლოებით თებერვლის ბოლოს ჩამოყალიბდება, დაფუნძდება, იქნება პრეზენტაცია, როგორც დედაქალაქში, ასევე ადგილობრივ დონეზე გურიაში. ფონდის უშუალო სამუშაო იქნება ტურისტული მიმართულება, ტურისტული პოტენციალის უფრო მეტად წარმოჩენა, რომ რეგიონს გაუჩნდეს უფრო მეტი მნახველი, ტურისტი“, _ ამბობს ერქომაიშვილი.
როგორც ერქომაიშვილი აღნიშნავს, გერმანელი პარტნიორების მეშვეობით გურიის რეგიონის კვლევა ჩატარდა.
“დაახლოებით, 6 თვის წინ გერმანელი პარტნიორების მეშვეობით ჩავატარეთ გურიის რეგიონის კვლევა, რომელიც ითვალისწინებს ეკონომიკურ კვლევას და ამავე დროს ეკონომიკურ ჭრილში დანახული არის ტურიზმის მიმართულება მთავარ მოტივატორად. ვფიქრობთ, რომ ეს აქტივობა მთლიანად გააცოცხლებს გურიას. უფრო მეტი თანხები, უფრო მეტი ტურისტი შემოვა და უფრო მეტი თანხები დაიხარჯება როგორც ბალნეოლოგიური, იგივე სანახაობროვო კუთხით და სხვა“, _ განაცხადა ერქომაიშვილმა.
