ლანჩხუთის მუნიციპალიტეტის სოფელ ჩოლობარგში ადგილობრივი მოსახლეობა წყლის სისტემის მოწესრიგებას ითხოვს. როგორც თავად ამბობენ, წლებია, რაც მათ სოფელს უწყლობის პრობლემა აწუხებს, თუმცა, მისი მოგვარების რეალური გზები ამ დრომდე ვერ გამოინახა.
„რამდენჯერ და ვის არ მივმართეთ დახმარების თხოვნით, მაგრამ შედეგი ამ დრომდე არაა. გამწარებულ დღეში ვართ, შეიძლება 21-ე საუკუნეში წყალი არ ჰქონდეს ადამიანს სახლში?! თუ ასე გაგრძელდა და უახლოეს ხანში არ მოგვარდა ეს საკითხი, ვაპირებთ, სხვადასხვა ტელევიზიის მოწვევას ვაპირებთ. მთელ ქვეყანას ვაჩვენებთ, რა დღეში ვართ აქ ხალხი“, _ ამბობს ჩოლობარგის მოსახლეობის ის ნაწილი, ვისაც წყლის პრობლემა აქვს.
როგორც ისინი „გურია ნიუსთან“ საუბრისას ამბობენ, საკმაო ხანია, რაც სოფლის ცენტრში წყლის მილია დაზიანებული, წყალი ქუჩაში იღვრება და მოსახლეობის სახლებამდე ვერ აღწევს.
„სოფლის ცენტრში, სადაც იუსტიციის სახლი, საბავშვო ბაღი და სამედიცინო პუნქტია განლაგებული, კარგა ხანია, წყლის მილია დაზიანებული. მაშინ, როცა ნახევარი სოფელი უწყლოდ იხრჩობა, აქ დღე და ღამე წყალი ქუჩაში მიედინება. ახლა იმ ადგილზე ბლომად ხრეში დაყარეს. უბრალოდ, თვალს მოგვაფარეს, თუ კარგად არ დააკვირდი, ვერ შეამჩნევ, რომ იქ წყალი გამოედინება. ხრეშის მიყრა რა უშველის საქმეს?! წყალი დაზიანებულ მილში არ ცერდება და მოსახლეობამდე ვეღარ მიდის. განსაკუთრებით ცუდ დღეში ის ადამიანები ვართ, ვინც ცოტა მაღლობზე ვცხოვრობთ, წყალი ჩვენამდე ვერანაირად ვერ აღწევს“, _ ამბობს უწყლობით შეწუხებული სოფლის მოსახლეობა.
მათივე თქმით, გარდა სოფლის ცენტრისა, წყლის გაყვანილობის სისტემა კიდევ რამდენიმე ადგილასაა დაზიანებული და შეკეთებას საჭიროებს.
„მარტო სოფლის ცენტრში კი არა, რამდენიმე ადგილასაა დაზიანებული მილები, მაგრამ გამკეთებელი არავინაა. 2010 წელს მოხდა აქ წყლის სისტემის რეაბილიტაცია, მაგრამ პრობლემა ბოლომდე მაინც ვერ გადაიჭრა. მერე, რამდენჯერმე სოფლის პროგრამიდანაც გაოიყო თანხები საამისოდ, თუმცა, საშველი მაინც არ დაგვადგა და სოფელს წყალი სრულად მაინც არ მიეწოდება. ახლა კი ისიც გაფუჭდა, რაც მაშინ გაგვიკეთეს, პატრონი კი არავინაა“, -დასძენენ ჩოლობარგელები.
საკითხთან დაკავშირებით „გურია ნიუსი“ ლანჩხუთის მუნიციპალიტეტის გამგეობის პრესასთან და საზოგადოებასთან ურთიერთობის განყოფილებას დაუკავშირდა, სადაც გვითხრეს, რომ ჩოლობარგში წყლის სისტემის გაყვანილობის მილების შეკეთება იგეგმება, თუმცა, არჩევნების შემდეგ.
„ვინაიდან საარჩევნო პერიოდია, საამისოდ მუნიციპალიტეტი თანხებს ვერ გამოყოფს, ამიტომ საარჩევნო პერიოდის დასრულებისთანავე იგეგმება ჩოლობარგში მილების გამოცვლა“, _ გვითხრა განყოფილების ხელმძღვანელმა მაკა სულაბერიძემ.
