“ნაციონალური მოძრაობის” წინასაარჩევნო რიტორიკაში ანაბრებს მნიშვნელოვანი ადგილი ეჭირა, თუმცა ხელისუფლებაში მოსვლის შემდეგ, ეს საკითხი ყველას მიავიწყდა.
თემა დღესაც აქტუალურია და როგორც ექსპერტები აცხადებენ, თუკი სახელმწიფო მისი გადაჭრის გზებს თუნდაც გრძელვადიან პერსპექტივაში დაგეგმავს, ეს იქნება სოციალური სამართლიანობის აღდგენა და დადებით იმიჯს შეუქმნის იმ ხელისუფლებას, რომელიც ამ ვალდებულების შესრულებას დაიწყებს.
ახალი ხელისუფლების მხრიდან ამ საკითხის დადებითად გადაწყვეტა საპარლამენტო უმცირესობის ერთ-ერთი ლიდერის დავით ბაქრაძისთვისაც მისასალმებელი ფაქტი იქნება.
“თუ ახალი მთავრობა რამეს გამოძებნის, მათ შორის პრემიერის პირადი შესაძლებლობებით რაიმე გზა თუ გამოიძებნება ამ საკითხის გადასაჭრელად, მე ამას საჯაროდ მივესალმები და ვიტყვი, რომ კარგი ნაბიჯი გადადგა ახალმა მთავრობამ,”_ აცხადებს ის “გურია ნიუსთან” ინტერვიუში.
_ ბატონო დავით, როგორ ფიქრობთ, ახალი მოწვევის და ახალი მთავრობის პირობებში დადგება ანაბრების თემა დღის წესრიგში? რამდენად რეალურია საბჭოთა ანაბრების დაბრუნება დაზარალებული მეანაბრეებისთვის?
_ ანაბრების თემა ერთის მხრივ ძალიან მტკივნეული და მეორეს მხრივ, ძალიან რთულია. ეს ის პრობლემაა, რომელიც ფაქტობრივად ყველა ოჯახს ეხება საქართველოში. მაგრამ რეალურად რომ შევხედოთ, საქართველოს ბიუჯეტი ძალიან დიდი ხნის განმავლობაში ვერ შეძლებს საბჭოთა ანაბრების გასტუმრებას თანხის რაოდენობიდან გამომდინარე.
გარკვეული საუბრები ამ თემაზე ახალი ხელისუფლების მხრიდან არის, თუმცა ჯერჯერობით კონკრეტული ინიციატივა მათგან არ მომისმენია, ვნახოთ…
თუ ეს მთავრობა შეძლებს, რომ საბჭოთა ანაბრების თემა დაძრას და რაიმე პროცესი დაიწყოს, მე ამას მხოლოდ მივესალმები, თუმცა ეჭვი მეპარება, რომ იმ პირობებში, რაც დღეს ხდება, როდესაც რეალურად ბიუჯეტის შესრულების პრობლემა არსებობს, ეკონომიკური ზრდა შემცირებულია, მთავრობას ამის რესურსი ჰქონდეს. თუმცა კიდევ ერთხელ ვიმეორებ, თუ მათ ამის პოლიტიკური სურვილი გააჩნიათ, თუ ამის დასაბუთებულ გეგმას წარმოადგენენ, მე მზად ვარ, ამას საჯაროდაც მივესალმო.
_ როდესაც “ნაციონალური მოძრაობა” ქვეყნის სათავეში მოდიოდა, ერთ-ერთი წინასაარჩევნო დაპირება სწორედ ანაბრების დაბრუნებას ეხებოდა. რატომ ვერ მოახერხა თქვენმა პარტიამ ამ პრობლემის გადაჭრა?
_ მე ასეთი საარჩევნო დაპირება არ მახსოვს, ყოველ შემთხვევაში, რაც მახსოვს, 2004 -ის საპარლამენტო არჩევნების აქეთ და ასეთი დაპირება არ გაგვიცია. შეხვედრებზე ხშირად აყენებდნენ ამ საკითხს ადამიანები, მაგრამ ყოველთვის გულახდილად ვპასუხობდი: რა თქმა უნდა, შემიძლია გითხრათ, რომ კი ბატონო, დავიწყებთ ამის მოგვარებას და 30 წლის შემდეგ გაგისტუმრებთ, მაგრამ ეს იქნება ტყუილი, რადგან ახლა ქვეყნის ბიუჯეტს ამის საშუალება არ აქვს-მეთქი. მერჩივნა მწარე სიმართლე მეთქვა ადამიანებისთვის, ვიდრე იმ ბიუჯეტის პირობებში რამეს შევპირებოდი ტყუილად. მე მათ ყოველთვის გულწრფელად ვპასუხობდი ამ შეხვედრებზე, მაგრამ როგორც ასეთი, როგორც დაპირება, არ მახსოვს. მიუხედავად იმისა, რომ 2004 წლის საპარლამენტო არჩევნებიდან ვმონაწილეობ.
თუ ახალი მთავრობა რამეს გამოძებნის, მათ შორის პრემიერის პირადი შესაძლებლობებით რაღაც გზა გამოიძებნა, მე ამას საჯაროდ მივესალმები და ვიტყვი, რომ კარგი ნაბიჯი გადადგა ახალმა მთავრობამ
