შემდეგ ყველა დააწვინეს და წიხლებით და ქამრებით ცემეს. იქვე ჩამოიარა ჯარისკაცების ოცეულმა, რომლებიც დ. ჩ მიაბრუნა, შვიდ გაშიშვლებულ, ნაცემ თანამშრომელზე მიუთითა, რომ იყვნენ “სამშობლოს მოღალატეები და ნაბოზარი ძაღლები” და უბრძანა ზედ გადაევლოთ მათზე, რაც შეშინებულებმა შეასრულეს. შემდეგ შვიდივე ნაცემი და ნაწამები თანამშრომელი ჩაყარეს ამოთხრილ ორმოში და ზემოდან დააყარეს მიწა. ” _ საბრალდებო დასკვნის მიხედვით, ამ ადამიანების წამება და არაადამიანური მოპყრობა გრძელდებოდა 2012 წლის 19 აგვისტოდან 21 სექტემბრის ჩათვლით.
2012 წლის 19 აგვისტო. მოქმედების ადგილი იალღუჯა. მთავარი მოქმედი პირი იმჟამინდელი შს მინისტრი ბაჩანა ახალაია და შს სამინისტროს განსაკუთრებულ დავალებათა დეპარტამენტის პირველი სამმართველოს უფროსი დავით ვეკუა.
ბრალდების მიხედვით: “ბაჩანა ახალაიამ მიიღო ინფორმაცია, რომ შს სამინისტროს შვიდი თანამშრომელი თანაუგრძნობდა ოპოზიციურ პარტიათა კოალიცია “ქართულ ოცნებას”, რა დროსაც ის იყო რა სახელმწიფო პოლიტიკური თანამდებობის მქონე პირი და მმართველი პარტიის – “ნაციონალური მოძრაობის” ხელმძღვანელთა გუნდის წევრი, ბოროტად გამოიყენა თავისი სამსახურებრივი უფლებამოსილება, დაარღვია მისთვის მიუღებელი პოლიტიკური შეხედულებების მქონე მოქალაქეთა კონსტიტუციური უფლებები და პირდაპირი განზრახვით ორგანიზება გაუკეთა მოქალაქეობრივი პოზიციის გამო, პოლიტიკური ნიშნით მათ დასჯა-წამებას, დამამცირებელ და არაადამიანურ მოპყრობას.
დაზარალებულების ჩვენებების მიხედვით წამების მეთოდები ასეთი იყო: ხოხვა ჭაობში, ხოხვა კანალიზაციაში, თმების ატრუსვა სანთებლით, ორმოში ჩაყრა და მიწის დაყრა ზემოდან, ეროვნული ნიშნით ცოცხზე გადასმა “ბაბაიაგა ვარ”-ს ძახილით, ცემა ჯაჭვის და ჯოხის გამოყენებით, თავში და სახეში იარაღის კონდახის ჩარტყმა…
“ეს იყო ჩვეულებრივი სამუშაო პროცესი, საწვრთნელი პროგრამა, რეინჯერთა მოსამზადებელი პროგრამა”, – განაცხადა ბაჩო ახალაიამ სასამართლო პროცესზე. მისი თქმით, ე.წ. დაზარალებულებმა ვერ გაუძლეს ძლიერ ფიზიკურ დატვირთავს, რადგან ისინი სპეცრაზმისთვის იყვნენ შეუფერებლები, არ ჰქონდათ შესაბამისი ფიზიკური მომზადება.
ახალაია ადვოკატების შეფასებით, პროკურატურის მტკიცებულებები ფალსიფიცირებულია, მოწმეთა ჩვენებები კი პროკურატურის მითითებით შედგენილი, რის გამოც სასამართლომ ახალაიას და სხვებს გამამართლებელი განაჩენი უნდა გამოუტანოს.
პროკურატურა ამტკიცებს, რომ ბაჩანა ახალაიას ბრალის დასადასტურებლად ყველა მტკიცებულება აქვს. “გურია ნიუსი” პროკურატურისგან ამ მტკიცებულებების მოპოვებას შეეცადა.
წარმოდგენილი დოკუმენტაციიდან ირკვევა:
1. ახალაიას ბრძანებაში რეინჯერების პროგრამა საერთოდ არ არის ნახსენები.
2. იალღუჯაზე პროგრამას ახორციელებდნენ ინსტრუქტორები, რომლებიც იმ პერიოდისთვის დათხოვნილები იყვნენ შეიარაღებული ძალებიდან;
3. პირები, რომლებიც თითქოს წვრთნის საბაბით აიყვანეს იალღუჯას პოლიგონზე, ასევე დათხოვნილები იყვნენ შსს-ს ორგანოებიდან.
“რეინჯერთა კურსის” თავისებურებანი _ რა მტკიცებულებები აქვს პროკურატურას
რეინჯერების პროგრამასთან დაკავშირებით, “გურია ნიუსმა” საქართველოს მთავარ პროკურატურას შემდეგი კითხვებით მიმართა:
_ ბაჩანა ახალაიას დაცვის მხარე აცხადებს, რომ წვრთნები ტარდებოდა რეინჯერების პროგრამით. შეესაბამება თუ არა ეს ფაქტი სინამდვილეს?
_ კითხვაზე გიპასუხებთ, რომ ბაჩანა ახალაიას მიერ გაცემულ ბრძანებაში, რის საფუძველზეც აღნიშნული პირები აიყვანეს იალღუჯას პოლიგონზე, რეინჯერების საწვრთნელი პროგრამა საერთოდ არ არის ნახსენები.
იმის დასტურად, რომ ბაჩანა ახალაიას ბრძანებაში საუბარი არ ყოფილა, რეინჯერების პროგრამაზე გიგზავნით აღნიშნული დოკუმენტის ასლს.
_ რას ითვალისწინებდა რეინჯერების პროგრამა და რომელი ბრძანებით იყო ის გათვალისწინებული?
_
რეინჯერების კურსთან დაკავშირებით უნდა არსებობდეს სპეციალური პროგრამა, რომლის დამტკიცების გარეშე რეინჯერების საწვრთნელი კურსის ჩატარება დაუშვებელია. აქვე გაგიმარტავთ, რომ შინაგან საქმეთა სამინისტროს ისტორიაში არ ყოფილა შემთხვევა, რომ აღნიშნული კურსით განხორციელებულიყოს წვრთნა. აღნიშნული კურსი დანერგილია მხოლოდ თავდაცვის სამინისტროში.
_ რომელი ინსტრუქტორები ახორციელებდნენ ამ პროგრამას და როგორი იყო მათი კვალიფიკაცია?
_ აღნიშნული კურსი ჩაატარეს პირებმა, რომლებიც საწვრთნელი კურსის ჩატარების მომენტში დათხოვნილნი იყვნენ საქართველოს შეიარაღებული ძალების რიგებიდან და იყვნენ ჩვეულებრივი მოქალაქეები. ისინი 2012 წლის 26 ივლისიდან დათხოვნილები იყვნენ საქართველოს შეიარაღებული ძალებიდან. აღნიშნული წვრთნა კი, როგორც ბაჩანა ახალაიას ბრძანებიდან ირკვევა, ჩატარებულია 2012 წლის 19 აგვისტოდან 2012 წლის 19 სექტემბრამდე. (დამადასტურებლად ვურთავთ დოკუმენტს)
_ აქვე განგიმარტავთ, რომ პირები, რომლებიც თითქოსდა წვრთნის საბაბით აიყვანეს იალღუჯის პოლიგონზე მინისტრ ბაჩანა ახალაიას ბრძანებით, წვრთნის დაწყების დღეს, ანუ 2012 წლის 19 აგვისტოს დაითხოვეს შინაგან საქმეთა სამინისტროს ორგანოებიდან. ამის დამადასტურებელ დოკუმენტსაც ვურთავთ თქვენს შეკითხვას.
ახალაიასთან ერთად ბრალდებული ინსტრუქტორები ამბობენ, რომ ის მკაცრი პროგრამა, რომლითაც სპეცრაზმელებს წვრთნიდნენ, თავადაც აქვთ გავლილი და ეს კრიმინალს არ წარმოადგენს.
მათივე თქმით, წვრთნისას ჯარისკაცებს აყენებენ გაუსაძლის ფიზიკურ და ფსიქოლოგიურ მდგომარეობაში, მით უმეტეს, მაშინ, როცა საქმე ეხება განსაკუთრებულ დავალებათა დეპარტამენტის თანამშრომლებს, სპეცრაზმელებს, რომლებსაც უნდა ჰქონდეთ მაღალი დონის ფსიქოლოგიური და ფიზიკური მომზადება. ყოფილი ინსტრუქტორებისვე განმარტებით, რეინჯერთა კურსის მიზანია, მოხდეს რაც შეიძლება მეტი ოდენობის ჯარისკაცის გაცხრილვა წვრთნისთვის, რათა წვრთნას გაუძლოს ძალიან ცოტა, მაგრამ ხარისხიანმა ჯარისკაცმა, ამისთვის კი ინსტრუქტორები სხვადასხვა ხასიათის ფსიქოლოგიური და ფიზიკური დატვირთვის ხერხს მიმართავენ. ისინი ასევე აცხადებენ, რომ საქმეზე დაზარალებულები სუსტი სამხედროები აღმოჩნდნენ, ისინი ვერ აბარებდნენ ელემენტარულ ნორმატივებს და ამის მაგალითად მოყავთ ერთ-ერთი მათგანის ჩვენება, რომელმაც განაცხადა, რომ ხოხვა მისთვის შეურაცხმყოფელია….
ითვალისწინებდა თუ არა “რეინჯერთა მომზადების კურსი” ჯოხით გაუპატიურებას და რატომ ატარებდნენ წვრთნებს სამოქალაქო პირები, ამაზე საბოლოო სიტყვას სასამართლო იტყვის…
