გაზეთ “გურია ნიუსში” 2013 წლის 2 დეკემბერს გამოქვეყნდა წერილი სათაურით “იანვრიდან გურიის მუნიციპალიტეტებს ახალი გამგებლები ეყოლებათ”
თითქოს ამ სათაურში გასაკვირიც არაფერია და არც ასაღელვებელი, რადგანაც, არც ერთი თანამდებობა არ არის მუდმივი და შეუცვლელი. რატომღაც წერილის ავტორი “განსაკუთრებულ ყურადღებას” ლანჩხუთის მუნიციპალიტეტის გამგებლის მოვალეობის შემსრულებელს ზაზა ურუშაძეს უთმობს. ხელისუფლებას მუშაობის “ტემპის” გამო თურმე “არც ერთი გამგებელი არ მოსწონს”, ეს კიდევ “კარგი”, მაგრამ ზაზა ურუშაძეს კიდევ სხვებისგან გამოარჩევს და საგამოძიებო ორგანოებისკენ მიუთითებს.
“სანდო წყაროს” მიერ მიწოდებული არც ერთი ინფორმაცია არ არის სწორი. იქნებ, ჯობდა, წერილის ავტორს თვითონ შეესწავლა წერილში მოყვანილი “ფაქტები” და თუ დარწმუნდებოდა მის მიერ “სანდო წყაროთი” “მიწოდებული ინფორმაციის” კიდევ უფრო სანდოობაში, მაშინ გამოექვეყნებინა აღნიშნული სტატია.
როგორც ჩანს, ჟურნალისტი შეცდომაშია შეყვანილი, ხოლო “წყაროს” კი სულ სხვა მიზანი ამოძრავებს, რადგანაც ბოლო დროს ლანჩხუთის მუნიციპალიტეტში უპრეცედენტო სამუშაოები ტარდება, რეკლამის გარეშე. სოფლის პროგრამის ფარგლებში 184 პროექტი დასრულდა.
გარდა ამისა, თითოეულ სოფელში საწრეტი არხები, ხიდები, მილხიდები, ყორე-ქვის გაბიონები, ჯებირები, ნაპირსამაგრი სამუშაოები გაკეთდა ხარისხის დაცვით.
მსგავსი მასშტაბის პროექტები ბოლო ათწლეულების განმავლობაში ლანჩხუთის მუნიციპალიტეტში არ განხორციელებულა. ეს არ არის ფასადური, მოჩვენებითი პროექტები, არამედ, რაც გაკეთდა, გაკეთდა საფუძვლიანად. იქნებ ჯობდა მეტი სტიმულირებისათვის ამაზე გამახვილებულიყო ყურადღება. რაც შეეხება “საგამოძიებო სიტუაციას”, ასეთი პრაქტიკულად გამორიცხულია და არც არაფერია გამოსაძიებელი, რადგანაც, მთავრობის განკარგულებით გამგებელს შეეძლო თვითონ გაეფორმებინა ხელშეკრულება შემსრულებელთან, ერთ პირთან მოლაპარაკების გზით. გამგებელმა მისთვის მინიჭებული უფლება მისივე გადაწყვეტილებით, საამისოდ შექმნილ კომპეტენტურ კომისიას მიანდო.
კომისიის შემადგენლობაში შევიდნენ:
ზაზა ურუშაძე _ კომისიის თავმჯდომარე, ლანჩხუთის მუნიციპალიტეტის გამგებლის მოვალეობის შემსრულებელი; ვახტანგ ზენაიშვილი _ კომისიის წევრი, გამგებლის მოადგილის მოვალეობის შემსრულებელი;
მაია აფხაზავა _ კომისიის წევრი, გამგეობის მუნიციპალური შესყიდვების სამსახურის უფროსის მოვალეობის შემსრულებელი; მაგული კუნჭულია _ გამგეობის აპარატის უფროსის მოვალეობის შემსრულებელი; რომან ბიწაძე _ კომისიის წევრი, გამგეობის ეკონომიკისა და საინვესტიციო გარემოს განვითარების სამსახურის უფროსის მოვალეობის შემსრულებელი; შოთა ჩაგუნავა _ კომისიის წევრი, გამგეობის იურიდიული სამსახურის უფროსის მოვალეობის შემსრულებელი; თენგიზ ხელაძე _ კომისიის წევრი, გამგეობის ინფრასტრუქტურისა და არქიტექტურის სამსახურის უფროსის მოვალეობის შემსრულებელი;
გიორგი ფაცურია _ კომისიის წევრი, გამგეობის შიდა აუდიტის სამსახურის უფროსის მოვალეობის შემსრულებელი.
კომისია ერთობლივად იღებს გადაწყვეტილებებს და შედეგებზეც ერთობლივად არის არის პასუხისმგებელი. ამის შესახებ ეტყობა ნაკლებად არის ინფორმირებული “წყარო”. ერთი საყოველთაოდ ცნობილი ანდაზისა არ იყოს “ფიცი მწამს, ბოლო მაკვირვებსო”. აი ეს “ბოლო” კი… კოლექტიურია.
სტიქიის სალიკვიდაციოდ მთავრობამ ასიათასობით ლარი კი არა 4 212 500 ლარი გამოყო. გაფორმებულია 56 ხელშეკრულება.
სამუშაოთა ნაწილი დასრულდა, ნაწილი დასრულების სტადიაშია, დაჯარიმდნენ ის შემსრულებლები, ვინც ხელშეკრულებით დათქმულ ვადას გადააცილა. არ მოხდება იმ პირთა დანდობა, ვინც შეეცდება კანონშეუსაბამომოქმედება ჩაიდინოს აღნიშნულ საკითხებთან მიმართებაში.
რაც შეეხება 800 000 ლარის ღირებულების გზასთან დაკავშირებულ ტენდერს, მსგავს თანხაზე არავითარი ხელშეკრულება ლანჩხუთის მუნიციპალიტეტში არ გაფორმებულა. ტენდერი მოიგო კომპანია “ტერექსი XXI”-მ, რომელიც ვერ ასრულებს თავის მოვალეობას, რის გამოც დაჯარიმებულია თანხით 11 413 ლარის ოდენობით. ხელშეკრულება ცალმხრივად შეწყვეტილია მიმდინარე წლის 4 დეკემბერს და ბანკს გაეგზავნა მიმართვა ხელშეკრულების საბანკო გარანტიის (50 000 ლარის ოდენობით) ანაზღაურების შესახებ, ხოლო შემსრულებელს შესრულებული სამუშაო, დაახლოებით 70 000 ლარი არ აუნაზღაურდება.
საგაზეთო სტატიაში აღნიშნულს არავითარი საერთო გამგებელთან და გამგებლის “ინიციატივებთან” არ აქვს. წერილში მითითებულია, რომ გამგებლის ახლობლებთან ხდება ხელშეკრულების გაფორმება. ასეთი რამ გამორიცხულია, რადგან, როგორც აღინიშნა, საკითხს კომისია წყვეტს.
ასე რომ, ყველა პროცესი გამჭვირვალე და კოლექტიურია. აქ ერთი პირის გადაწყვეტილება რომელიმე საკითხში პრაქტიკულად გამორიცხულია.
კომისიის წევრები
ავტორისგან: ამ საპასუხო წერილის დაწერა, რომელსაც დასაწყისში ხელს პრესსამსახური აწერს, დასასრულს კი კომისიის წევრები, როგორც ჩანს, იმან გამოიწვია, რომ სტატიაში, “იანვრიდან გურიის მუნიციპალიტეტებს ახალი გამგებლები ეყოლებათ” “განსაკუთრებული ყურადღება” ლანჩხუთის მუნმიციპალიტეტის გამგებლის მოვალეობის შემსრულებელს დავუთმეთ. ამ “ყურადღების” მიზეზი კი საკმაოდ სანდო წყარო გახლდათ, რომლის კომპეტენციაშიც ეჭვი ნამდვილად არ გვეპარება, თუმცა, სტატია მხოლოდ წყაროზე დაყრდნობით არ დაწერილა. სწორედაც “განსაკუთრებული ყურადღებით” გადამოწმდა უშუალოდ “ყურადღების” ადრესატთან ზაზა ურუშაძესთან ყველა ის საკითხი, რომელზეც წერილში იყო საუბარი.
როგორც ჩანს, გამგეობის პრესსამსახურს და კომისიის წევრებს, ზემოთ აღნიშნული წერილი ბოლომდე წაკითხული არ აქვთ, წინააღმდეგ შემთხვევაში, ზაზა ურუშაძის პასუხებს აღარ “გაადაამღერებდნენ”.
თუკი სტატიას კარგად წაიკითხავდა, პრესსამსახურს არ უნდა დასჭირვებოდა იმის გაგება, რომ საპასუხო წერილში დასმულ ყველა კითხვაზე გამგებელს უკვე პასუხი აქვს გაცემული.
ჩვენი მოკრძალებული რჩევა იქნება, მედიაში გასული მასალები მეტი გულისყურით წაიკითხოთ და ასე ოპერატიულად მოგვაწოდოთ მოსაზრებები თუ კომენტარების, როცა საქმე მოსახლეობისთვის სასიცოცხლოდ მნიშვნელოვან პრობლემებს ეხება _ პრესსამსახურის მოვალეობაც ხომ ეს არის?
ნატო გოგელია
