შეფასებისა და გამოცდების ეროვნულმა ცენტრმა, მასწავლებელთა სასერტიფიკაციო გამოცდის პროგრამების პროექტი გამოაქვეყნა.
მასწავლებლობის სერტიფიკატის ფლობის მსურველები გამოცდებს 2015 წლის ივლისში, შემდეგ საგნებში ჩააბარებენ: ქართული ენა და ლიტერატურა, ქართული, როგორც მეორე ენა, ქართული ენა და ლიტერატურა (I-VI), მათემატიკა (I-VI), ბუნებისმეტყველება (I-VI), უცხოური ენები, მათემატიკა, პროფესიული უნარები, სახვითი და გამოყენებითი ხელოვნება, სამოქალაქო განათლება, ისტორია, გეოგრაფია, ბიოლოგია, ქიმია, ფიზიკა.
შეფასებისა და გამოცდების ეროვნული ცენტრის ზოგადი უნარების ჯგუფის ხელმძღვანელი, სოფო დოლიძე "გურია ნიუსთან“ საუბარში აცხადებს, რომ სერთიფიცირების ახალი სქემა, რომელიც საქართველოს განათლებისა და მეცნიერების სამინისტრომ პარლამენტს წარუდგინა, ჯერ არ დამტკიცებულა, შესაბამისად, ყველაფერი რჩება ისე, როგორც იყო აქამდე და შეფასებისა და გამოცდების ეროვნული ცენტრიც გამოცდების ჩასატარებლად, ჩვეულებრივ, ემზადება.
"აქამდე მასწავლებლობის სერთიფიკატის მოსაპოვებლად ორი გამოცდის ჩაბარება იყო საჭირო. ერთი – პროფესიული უნარების, მეორე – საგნობრივი გამოცდის იმ საგანში, რომელსაც ასწავლის. არ ვიცი, როგორი სახით მიიღებენ სამომავლოდ ცვლილებებს, მაგრამ გეტყვით, შეთავაზებული ცვლილებების ახლანდელ პაკეტში რა როლი აქვს შეფასების და გამოცდების ეროვნულ ცენტრს.
პრაქტიკოსი მასწავლებლის კატეგორიიდან წარჩინებული მასწავლებლის კატეგორიაში გადასასვლელად სავალდებულოა საგნობრივი გამოცდის ჩაბარება. რაც შეეხება პროფესიული უნარების გამოცდას, ის ერთ-ერთი ალტერნატივაა, რამდენიმე სხვა საშუალებას შორის, რომ კრედიტები დააგროვოს მასწავლებელმა. გარკვეული კრედიტების რაოდენობის დაგროვება აუცილებელია საფეხურიდან საფეხურზე გადასვლისთვის. პროფესიული უნარების გამოცდის ალტერნატივა შეიძლება ყოფილიყო გრიფირებული სახელმძღვანელოს თანაავტორობა,
კონკრეტული საგანმანათლებლო პროდუქტის შექმნა, პროექტში მონაწილეობა და ა.შ. ამ აქტივობების შემუშავებაში მასწავლებელთა პროფესიული განათლების ეროვნული ცენტრი იღებს მონაწილეობას. შეფასებისა და გამოცდების ეროვნული ცენტრი ასევე მონაწილეობს გაკვეთილის დაკვირვების პროცესში, რომელიც ერთ-ერთი აუცილებელი კომპონენტია, ახალი სქემის მიხედვით, მასწავლებლის შეფასებისთვის. ჩვენ ჯერ-ჯერობით ვცდილობთ, შევისწავლოთ საერთაშორისო გამოცდილება ამასთან დაკავშირებით. მოვარგოთ ის ქართულ კონტექსტს, რომ პირდაპირ არ გადმოვიტანოთ. ძალიან დიდი პასუხისმგებლობა გვეკისრება, რადგან მასწავლებელთა შეფასებასთან გვაქვს საქმე", _ამბობს სოფო დოლიძე.
საქართველოს პარლამენტმა "მასწავლებელთა პროფესიაში შესვლის, განვითარებისა და კარიერული ზრდის“ სქემა დაიწუნა და გადასამუშავებლად ისევ განათლებისა და მეცნიერების სამინისტროს დაუბრუნა.
კანონპროექტის თანახმად, მასწავლებელთა სერტიფიცირების მოდელი შეიცვლება მასწავლებლის პროფესიაში შესვლის, განვითარებისა და კარიერული ზრდის ახალი სქემით, რომელიც დაეფუძნება მასწავლებლის შეფასების კომპლექსურ სისტემას. ზოგადსაგანმანათლებლო დაწესებულების მასწავლებლები კომპეტენციებისა და საქმიანობის შედეგების მიხედვით დაიყოფიან პროფესიულ კატეგორიებად: მენტორი მასწავლებელი (უმაღლესი კატეგორია), მკვლევარი (პირველი კატეგორია), წარჩინებული (მეორე კატეგორია), პრაქტიკოსი (მესამე კატეგორია).
როგორც განათლებისა და მეცნიერების სამინისტროს პრესსამსახურში აცხადებენ, მასწავლებელთა სერთიფიცირების გაუქმება არ იგეგმებოდა, უბრალოდ სერთიფიცირების მოდელი შეიცვალა.
განათლების მინისტრის, თამარ სანიკიძის თქმით, მასწავლებელთა ატესტაციის ცვლილება იმან გამოიწვია, რომ არსებული კანონმდებლობით 2014 წლიდან ვისაც სერთიფიცირების გამოცდა ჩაბარებული არ ექნებოდა, სკოლა უნდა დაეტოვებინა:
"გამოცდები არსებული სახით აღარ იქნება. იქნება სქემა, რომელიც მოიცავს გარკვეულწილ საგნობრივ გამოცდას. დანარჩენი იქნება საკლასო შეფასება და პრაქტიკაში რასაც სწავლობენ. რაც ხდებოდა აქამდე, ეს იყო არაადეკვატური, არანორმალური, რაც განსაკუთრებით კარგად გამოჩნდა, როცა წლიდან წლამდე თარიღი გადაჰქონდათ კანონში და 2014 წლის ბოლოს მასწავლებლების 80% სახლში უნდა გაგვეშვა. ეს იყო კატასტროფა, ძალიან ცუდად დაგეგმილი და გაუაზრებელი რამ. ჩვენი ვალია, ეს შევცვალოთ და მასწავლებლებს შევთავზოთ ადეკვატური სქემა, სადაც ისინი შეძლებენ თავის თავზე მუშაობას, განვითარებას და ცოდნის გამოხატვას. საბოლოო ჯამში, ეს ხარისხის ამაღლებას უზრუნველყოფს", – ამბობდა მინისტრი.
როგორც შეფასებისა და გამოცდების ეროვნულ ცენტრში აცხადებენ, ცვლილებების განხორციელებამდე ისინი არსებულ კანონმდებლობას მიჰყვებიან და მომავალი გამოცდებისთვის მზადებას განაგრძობენ.
რაც შეეხება 2014 წლის მასწავლებელთა სასერტიფიკაციო გამოცდებს, როგორც სოფო დოლიძე ამბობს, მშვიდად ჩაიარა, მასწავლებელთა დაბალი აქტივობის ფონზე.
" მასწავლებელთა აქტივობა არ იყო ისეთი, როგორიც წინა წლებში, თუმცა, პრინციპში, მაინც ბევრმა მასწავლებლობის მსურველმა მიიღო მონაწილეობა სასერთიფიკაციო გამოცდებში. 3-ათასამდე ადამიანმა ჩააბარა პირველი-მეოთხე კლასების გამოცდა (დაწყებითების მასწავლებლებისთვის ქართულში, მათემატიკასა და ბუნებაში კომბინირებული ტესტია). საგნობრივ ტესტებში 1-6 კლასების ქართული ჩააბარა დაახლოებით 1600 ადამიანმა, მათემატიკა, დაახლოებით 1200-მა, ბუნება 600-მა", _ აღნიშნა სოფო დოლიძემ.
