ქალაქ ოზურგეთში მრავალსართულიანი ბინების საკითხი კვლავ რთულია, კორპუსებში არსებული პრობლემები კი _ სხვადასხვაგვარი: ზოგს დაზიანებული სახურავი, ზოგს _ კანალიზაციის არქონა, ზოგს კი უვარგისი ფუნდამენტი აწუხებს.
ქალაქ ოზურგეთში ფარნავაზ მეფის ქუჩაზე მდებარე #127 მრავალსართულიანი კორპუსების მცხოვრებლებმა, რომელთაც კანალიზაცია არ აქვთ და შენობის საძირკველი გაბზარულია, დახმარებისთვის ქალაქ ოზურგეთის მერიას 22 ოქტომბერს მიმართეს.
აღნიშნული ბინების მცხოვრებლები "გურია ნიუსთან" კორპუსში არსებულ პრობლემებზე საუბრობენ.
ნანული ჩომახიძე: _ რამდენიმე წელია, რაც ჩვენს ბინას საძირკველი გაბზარული აქვს. წლებია, არ არის კანალიზაცია, გასაკეთებელია ლიფტის უჯრედი. ჩვენი ბინები 2 წლის წინ გადახურეს, მაგრამ უსახურავოდ დატოვეს კიბისა და ლიფტის უჯრედი. ამასთან დაკავშირებით, ერთი წლის წინ, აგვისტოში, განცხადებით მივმართეთ მუნიციპალიტეტის გამგეობას და შესაბამის კომისიას, მაგრამ უშედეგოდ. ახლა, 22 ოქტომბერს, ისევ შევიტანეთ წერილი ქალაქის მერიაში.
ირმა ჯაველიძე: _ ბზარია გაჩენილი ფუძეზე, მალე დაიშლება ბინა. თავდაპირველად, 4 წლის წინ მივმართეთ გამგეობას. მოდიოდნენ და გვეუბნებოდნენ, რომ საშიშია, მაგრამ არაფერი. განცხადების შეტანის შემდეგ, ქალაქის მერიიდან მოვიდნენ ალეკო ბურჭულაძე და შუქრი გაბრიჩიძე. გვითხრეს, რომ საშიში და საპრობლემო არაფერი არაა, მაგრამ მაინც გავამაგრებთო ფუნდამენტსო.
ნათია ჯაველიძე: _ ყოფილი ხელისუფლების წარმომადგენლები რომ მოვიდნენ, გვითხრეს, გასასახლებელი ხართ აქედან, მალე დაინგრევა ეს ბინა და საშიშიაო. მართლაც ცუდ მდგომარეობაში ვართ. ორი წლის წინ წინა ხელისუფლებამ შენობა გადახურა და დაგვიტოვა კიბისა და ლიფტის უჯრედი ღია. წვიმის დროს ისეთი მდგომარეობაა, შეიძლება ლიფტში ყოფნის დროს დენი გადმოვიდეს და ადამიანი მოკვდეს.
მანანა ლომინეიშვილი: _ კანალიზაცია ცუდ მდგომარეობაშია _ ეზოში ვერ გაივლი, ისეთი სუნი დგას. ძველია მილები, ვერ ატარებს ფეკალურ მასებს, რომელიც იღვრება სახლის ქვეშ. ეს პრობლემა წლებია გვაწუხებს. ხანდახან მოდიან წყალკანალიდან, წმენდენ, მაგრამ ჩვენც მოგვყავს ჩვენი ხარჯებით მანქანა და ვწმენდთ. პირველ და მეორე სართულზე ისეთი სიტუაციაა, შეიძლება ადამიანები მოიწამლონ.
ქალაქ ოზურგეთის ცენტრში, რუსთაველის ქუჩა #6-ში მდებარე ოთხსართულიანი ბინის მცხოვრებლები, წლებია, დახმარებას ამაოდ ითხოვენ. რამდენიმე წლის წინ დაწყებული სარემონტო სამუშაოები ჯერაც არ არის დასრულებული. რაც გაკეთდა, მოსახლეობის განცხადებით, უპასუხისმგებლოდ არის გაკეთებული _ ბინები, რემონტის შემდეგ კიდევ უფრო დაზიანდა და ოთახებში ისე წვიმს, როგორც გარეთ. აღნიშნულ ფაქტთან დაკავშირებით პასუხისმგებელი პირი არ ჩანს. ყოფილი ხელისუფლება "გურია ნიუსთან" აცხადებდა, რომ პასუხისმგებელი პირი თვითონ არ იყო, ამასობაში კი მოსახლეობა წვიმას ოთახებში თასებით ებრძვის.
"გურია ნიუსი" ქალაქ ოზურგეთში აღნიშნული ბინების სარემონტო სამუშაოებთან და მოსახლეობის პრობლემებთან დაკავშირებით არაერთხელ წერდა. მას შემდეგ ორი წელი გავიდა. მიუხედავად ხელისუფლების შეცვლისა, ბინებში კვლავ ისეთი მდგომარეობაა _ ოთახებში ისევ ჩამოდის წვიმა, მოსახლეობა დახმარებას ითხოვს, თუმცა, მათივე თქმით, ამაოდ.
მარკრიტ სარუხანიანი: _ ვცხოვრობ მეოთხე სართულზე. სახლში მიცვალებული მესვენა და წყალი პირდაპირ ოთახში ჩამოდიოდა. 50 წელია, ამ ბინებში ვცხოვრობ და არ გვახსოვს, წყალი ჩამოსულიყოს. ესაა გაკეთებული? არც ერთი ხელისუფლება ჩვენთვის არაა. რამდენჯერმე ვიყავი შესული მერთან, რომელიც მპირდება, რომ აუცილებლად დამეხმარება, მაგრამ როდის, არ აკონკრეტებს. მითხრა, ახალ წლამდე აღარ მოხვიდე, ეს პრობლემა მანამდე მაინც ვერ მოგვარდებაო. ახალ წლამდე ორი თვეა, ამ ზამთარში რა გვეშველება? არჩევნები სანამ იქნებოდა, ჩვენთან შეხვედრაზე განაცხადა ბეგი სიორიძემ, რომ მისი არჩევის შემთხვევაში, ამ ბინებს დახურავდა. ახლაც კი მპირდება, მიმიღო, მაგრამ როდის გაკეთდება, არ ვიცით.
"გურია ნიუსი" ამ პრობლემებთან დაკავშირებით ქალაქ ოზურგეთის მერის მოადგილეს ალეკო ბურჭულაძეს ესაუბრა:
_ არის დაზიანებები, სწავლობს კომისია. როცა შეისწავლის და დადებს დასკვნას, იმის საფუძველზე ვიმოქმედებთ. დაზიანებები ნამდვილად ჩანს. უნდა გაკეთდეს ხარჯთაღრიცხვა. ამის შემდეგ შეგვეძლება ზუსტი კომენტარის გაკეთება.
_ ბატონო ალეკო, მოსახლეობა ამბობს, რომ მათ წინა ხელისუფლების წარმომადგენლებმა უთხრეს, საშიში მდგომარეობის გამო, აქედან უნდა გამოგასახლოთო, ახალი ხელისუფლების წარმომადგენლებს კი მიაჩნიათ, რომ საშიში არაფერია.
_ მე ვერ გეტყვით, წინა ხელისუფლებამ რის საფუძველზე უთხრა იქ მცხოვრებლებს მსგავსი რამ, ან რა გამოსახლებაზე იყო საუბარი. ვიზუალური დათვალიერების საფუძველზე როგორ შეიძლება განაცხადო ეს?! თუ ასეთი საშიშროება იყო და არსებობს ახლაც, ეს სიტყვიერად კი არ უნდა ეთქვათ, შესაბამისი დასკვნა უნდა დაედოთ და რეაგირებაც მოეხდინათ ამაზე. ვიზუალური დათვალიერების შემდეგ რაც ვნახეთ, იმის მიხედვით იქ მცხოვრებლებს პრობლემა არ უნდა ჰქონდეთ. თუმცა, ჩვენ აუცილებლად შევისწავლით აღნიშნულ საკითხს და შესაბამისად, ვიმოქმედებთ კიდეც.
_ ბატონო ალეკო, აღნიშნული ბინაში მოუწესრიგებელია კანალიზაცია, არ არის დახურული ლიფტის უჯრედი, რამაც შეიძლება სერიოზული საფრთხე შეუქმნას ადამიანებს.
_ ამგვარი პრობლემები მარტო მაგ ბინის მცხოვრებლებს არ აქვთ. ანალოგიური პრობლემების წინაშეა გაგარინის ქუჩაზე მდებარე ბინები, ასევე, ე.წ. "ზვანის" ბინები, ყველა შესასწავლია და ეტაპობრივად მოხდება ამ პრობლემების აღმოფხვრაც.
_ რუსთაველის ქუჩაზე #6-ში მდებარე ბინებზე რას გვეტყვით? წლების განმავლობაში მოსახლეობას თავზე აწვიმს. მათ იმედი არ აქვთ, რომ ეს პრობლემა ახალი ხელისუფლების მიერ მოგვარდება…
_ ვიცი, ვიცი… გუმბათის დადგმის დროს წარმოიშვა ეს პრობლემა. ტექნიკურად რთული შესასრულებელი სამუშაოა და არასწორად გაკეთდა. თარიღს ვერ დავასახელებ, როდის მოგვარდება პრობლემა, მაგრამ ვმუშაობთ აღნიშნულ საკითხზე, მზადდება პროექტი სამინისტროსთან შეთანხმებით და ვცდილობთ, რომ რაც შეიძლება მოკლე ვადებში მოგვარდეს. ანალოგიური პრობლემების წინაშე დგანან ქალაქ ოზურგეთში ჭავჭავაძის ქუჩაზე მდებარე მრავალსართულიანი ბინების მცხოვრებლებიც. ვმუშაობთ და ეტაპობრივად ყველაფერს გავაკეთებთ, _ გვითხრა ალეკო ბურჭულაძემ.
ამ თემაზე ქალაქ ოზურგეთის მერის ოფიციალური კომენტარი მოგვაწოდა მერიის საზოგადოებასთან ურთიერთობისა და საინფორმაციო განყოფილებამ:
"ქალაქში სახურავის პრობლემა აქვს სულ 187 ოჯახს (მათ შორის, 28 მრავალსართულიანი საცხოვრებელი სახლია). ამის შესახებ, ქალაქის მერმა ბეგლარ სიორიძემ პირადად ესაუბრა და წერილობით მიმართა ინფრასტრუქტურის მინისტრს. მერიის შესაბამისმა სამსახურებმა შეისწავლა მსგავსი ოჯახების მდგომარეობა, შეადგინეს მათი სია, მოამზადა ხარჯთაღრიცხვა, რომელიც, დაახლოებით, 700 000 ლარს შეადგენს და გადასცა შესაბამის სამინისტროს. მგონი, გასაგებია, რომ აღნიშნული პრობლემა საკმაოდ რთული გადასაჭრელია და ამას ადგილობრივი ბიუჯეტით ვერ შევძლებთ. მივიღეთ შესაბამისი პასუხი ინფრასტრუქტურის სამინისტროსგან, რომელშიც ნათქვამია, რომ ამ საკითხის მოგვარება 2015 წლის ბიუჯეტიდან მოხდება. ასე რომ, ქალაქის მერია უყურადღებოდ არც ერთ ოზურგეთელს არც ერთი მიმართულებით არ ტოვებს და ყველა სამსახური სრული დატვირთვით მუშაობს, რომ შესაძლებლობის ფარგლებში, მაქსიმალურად აღმოფხვრას ყველა ის პრობლემა, რომელიც, ამა თუ იმ კუთხით, მძიმე პირობებს უქმნის თითოეულ ოზურგეთელს", _ აღნიშნულია ოფიციალურ კომენტარში.
