ევროპარლამენტის მიერ საქართველოსთან ასოცირების შეთანხმების რატიფიკაციასთან დაკავშირებით, საგარეო საქმეთა სამინისტროში საგაგნებო ბრიფინგი გაიმართა. საგარეო საქმეთა მინისტრმა, თამარ ბერუჩაშვილმა და საქართველოში ევროკავშირის ელჩმა იანოშ ჰერმანმა კიდევ ერთხელ შეაფასეს საქართველოსა და ევროკავშირს შორის ასოცირების შეთანხმების მნიშვნელობა და მიესალმნენ ევროპარლამენტის მიერ 18 დეკემბერს ასოცირების შეთანხმების რატიფიცირებას.
"ევროპის პარლამენტმა გუშინ კიდევ ერთხელ დაადასტურა სრული ევროპული მხარდაჭერა საქართველოს ტერიტორიული მთლიანობის და სუვერენიტეტის მიმართ. ასევე მტკიცედ გადაწყვიტა, რომ თქვენთან ერთად იმუშავებს კონფლიქტების გადაწყვეტის კუთხით. გუშინ დადასტურდა სრული რწმენა, ნდობა, რომელიც ჩვენს ქვეყნებს შორის გამყარდა და მზად ვართ, მხარი დავუჭიროთ საქართველოს იმ გზაზე, რომელზეც ერთობლივად დავდექით. ჩვენ გვინდა, რომ ვნახოთ საქართველო, როგორც სტაბილური დემოკრატიული ქვეყანა მაღალგანვითარებულ ევროპულ ოჯახში", – განაცხადა იანოშ ჰერმანმა.
საქართველოს საგარეო საქმეთა მინისტრის შეფასებით, ევროპარლამენტის მიერ ასოცირების შეთანხმების რატიფიცირება ჩვენი ქვეყნისადმი და მისი ევროპული მომავლისადმი ცალსახა მხარდაჭერის დემონსტრირებას წარმოადგენს.
"ევროპარლამენტის მიერ ასოცირების შეთანხმების რატიფიკაციას მნიშვნელოვანი პოლიტიკური, სამართლებრივი და სიმბოლური დატვირთვა აქვს. დღევანდელი ფაქტი მძლავრი სიგნალია ევროკავშირის წევრი ქვეყნებისთვის დროულად დაასრულონ რატიფიკაციის პროცესი. აქვე, მსურს ვისარგებლო შემთხვევით და მადლობა გადავუხადო იმ ქვეყნებს, რომლებმაც უკვე განახორციელეს რატიფიკაცია"-აღნიშნა მინისტრმა.
მინისტრის განცხადებით, ასოცირების შეთანხმება საქართველოსა და ევროკავშირის ერთობლივი ძალისხმევის შედეგია და წარმოადგენს ევროკავშირთან ურთიერთობების კიდევ უფრო გაძლიერებისა და გაღრმავების მყარ საფუძველს.
"ასოცირების შეთანხმება არის ჩვენი ინვესტიცია საქართველოს მომავალში და მძლავრი სტიმული რეფორმებისთვის"-აღნიშნა ბერუჩაშვილმა.
საგანგებო ბრიფინგზე მინისტრმა ასევე ისაუბრა ევროპარლამენტის მიერ საქართველოს შესახებ მიღებულ რეზოლუციაზე, რომელიც ცალსახად უჭერს მხარს საქართველოს ტერიტორიულ მთლიანობას, გმობს რუსეთის უკანონო ქმედებებს საქართველოს ოკუპირებულ რეგიონებში და ცალსახად აღნიშნავს, რომ ასოცირების შეთანხმების რატიფიკაცია არ არის საბოლოო მიზანი; აღიარებს, რომ საქართველოს, როგორც ნებისმიერ სხვა ევროპულ სახელმწიფოს, გააჩნია ევროპული პერსპექტივა და უფლება აქვს წარადგინოს განაცხადი ევროკავშირის წევრობაზე.
ევროპარლამენტის რეზოლუციაში მოცემულია ასევე რეკომენდაციები ქვეყანაში რეფორმების პროცესის შემდგომი გაგრძელების თაობაზე, კერძოდ კანონის უზენაესობის, კარგი მმართველობის, დამოუკიდებელი სასამართლოს გაძლიერების, ადამიანის უფლებებისა და ძირითადი თავისუფლებების დაცვის სფეროში.
"მსურს აღვნიშნო, რომ საქართველოს ხელისუფლება ევროპული ფასეულობების ერთგულია და მზად არის მეტი აქტიურობით გააგრძელოს დემოკრატიული რეფორმები ევროპული დღის წესრიგის მიხედვით. ამ პროცესში, ჩვენ, რა თქმა უნდა, ვითვალისწინებთ ჩვენი პარტნიორების, მათ შორის ევროპარლამენტის რეკომენდაციებს" – დასძინა მინისტრმა. საგარეო საქმეთა სამინისტროში თამარ ბერუჩაშვილისა და იანოშ ჰერმანის საგანგებო ბრიფინგი 2014 წლის 19 დეკემბერს გაიმართა.
