2016 წლის საპარლამენტო არჩევნების მოახლოებასთან დაკავშირებით, გურიაში პარტიული ცხოვრება კიდევ უფრო აქტიურდება. წინასაარჩევნო პოლიტიკური ბრძოლა დაწყებულია. ამ ეტაპზე იკვეთება კიდეც საპარლამენტო არჩევნებში ოზურგეთის მაჟორიტარი დეპუტატობის კანდიდატების მსურველთა ვინაობა, ესენია: გურიის გუბერნატორი გია სალუქვაძე, გუბერნატორის მოადგილე სოსო ერქომაიშვილი, ქალაქ ოზურგეთის მერი ბეგლარ სიორიძე და ოზურგეთის მუნიციპალიტეტის საკრებულოს თავმჯდომარე დავით დარჩია.
ოთხივე მათგანი, ჩვენი წყაროს ინფორამციით, თავის საახლობლო -სამეგობრო წრეში დეპუტატობის სურვილს არ მალავს და ღიად გამოხატავს კიდეც საკუთარ პოზიციას ამის, თუმცა ჩვენთან საუბრისას, არცერთი მათგანი აღნიშნულ ინფორმაციას არ ადასტურებს.
აღსანიშნავია, რომ ოთხივე მათგანი სახელისუფლებლო თუ კერძო სექტორის სხვადასხვა ძალების წრეს წარმოადგენენ. საინტერესოა, როგორ მოხდება არჩევნებზე ძალთა გადანაწილება, სწორედ აქედან გამომდინარე გახდება ცნობილი, ვინ იქნება ოზურგეთში მაჟორიტარი დეპუტატობის კანტიდატი.
"გურია ნიუსის" წყაროს ინფორმაციით, პრემიერ – მინისტრის ფავორიტი ოზურგეთის მუნიციპალიტეტის გამგებელი მერაბ ჭანუყვაძეა. ჭანუყვაძეს ლობირებას ქართული კომპანიის "კახური ტრადიციული მეღვინეობის" დამუძნებელი ზურაბ ჩხაიძე უწევს.
გურიის გუბერნატორი გია სალუქვაძე "გურია ნიუსთან" ამბობს, რომ ამ თემაზე საუბარი ჯერ ნაადრევია: " არსად არ განმიცხადებია ამის შესახებ, არც არავისთან მქონია ამ თემაზე საუბარი. იმდენად ჩაფლული ვარ ყოველდღიურ შრომაში, არა მგონია ამ თემაზე მზად ვიყო სალაპარაკოდ. ამ საკითხს საბოლოოდ პოლიტსაბჭო განიხილავს. როგორც წინასწარ ვიცი, ჩოხატაურსა და ლანჩხუთს ეყოლება ერთი მაჟორიტარი დეპუტატი, ოზურგეთს -ერთი. სრულიად ახლებურად ხდება ამ სისტემის ჩამოყალიბება, აქედან გამომდინარე ჯერ აბსოლუტურად ნაადრევია ამ თემაზე საუბარი"_ ამბობს სალუქვაძე.
აღნიშნულ ინფორმაციას უარყოფს გურიის გუბერნატორის მოადგილე სოსო ერქომაიშვილი: "არ არის ეს ინფორმაცია სიმართლე, ამ ეტაპზე მაგაზე საერთოდ არ ვფიქრობ, სხვა ძალიან ბევრი საქმეა გასაკეთებელი" .
ქალაქ ოზურგეთის მერი ბეგლარ სიორიძე "გურია ნიუსის" შეკითხვას, სურს თუ არა მიიღოს მონაწილეობა საპარლამენტო არჩევნებში და გახდეს ოზურგეთის მაჟორიტარი დეპუტატი, პასუხობს: "ესეც ახალი ამბავი… მოდით, ასე გიპასუხებთ: ჯერჯერობით არ ვიცი, ხვალ რისი სურვილი მექნება და რისი არა. ამ ეტაპზე ამის სურვილის არ მაქვს. მე ბევრი საქმე მაქვს გასაკეთებელი, ვნახოთ რის გაკეთებას შევძლებ და მერე შეიძლება ვიფიქრო" – ამბობს სიორიძე.
"გურია ნიუსმა" ქალაქ ოზურგეთის მერს, მის მის მიერ წლების წინ დეპუტატობის სურვილის შესახებ გაჟღერებული ინფორმაცია შეახსენა, რაც სიორიძემ უარყო:
"არასდროს არ მქონდა ამის სურვილი, არც ახლა მაქვს და ხვალ, არ ვიცი რა იქნება!"
ოზურგეთის მუნიციპალიტეტის საკრებულოს თავმჯდომარე დავით დარჩია, რომელიც ამავდრულად არის პარტია "ქართული ოცნების" ოზურგეთის რაიონული ორგანიზაციის თავმჯდომარე, სურვილს, გახდეს ოზურგეთის მაჟორიტარი დეპუტატი, არ უარყოფს და აცხადებს, რომ თუ მისი კანდიდატურაზე მოხდება არჩევანის გაკეთება, ის მზად იქნება ამ პასუხისმგებლობისთვის:
"საუბარი ამ თემაზე ვფიქრობ, ცოტა ნაადრევია და დამოკიდებულია პარტიის გადაწყვეტილებაზე . მე არ გავურბივარ პასუხისმგებლობას, ვალდებულებას და ნებისმიერ პოზიციზე ამ პრინციპებს ვითვალისწინებ. მზად ვარ, ვიყო იქ სადაც ოზურგეთს დასჭირდება."-ამბობს დარჩია.
