რეალური პოლიტიკური ვითარებიდან გამომდინარე, რამდენიმე კითხვით გუბერნატორის მოადგილეს პაატა მანჯგალაძეს მივმართეთ.
_ბატონო პაატა, რის საფუძველზე დატოვა ილია ვაშაყმაძემ თანამდებობა?
_როცა ადამიანი მიდის თანამდებობიდან, მით უმეტეს, საკრებულოს მიერ არჩეული გამგებელი, ამ საკითხზე, უმჯოებესია, თავად გააკეთოს განცხადება. თუმცა, თვითონ არ საუბრობს ამაზე და თავისი ნება გამოხატა მხოლოდ განცხადებით. მე რამდენჯერმე გავაკეთე განცხადება, ილიასთან დაკავშირებით, რომ ხდებოდა სხვადასხვა ძალოვან სტრუქტურებში მისი დაბარება. მიმდინარეობს გამოძიება. როგორც ჩემთვის არის ცნობილი, თავად ილია არ საუბრობს ამ თემაზე. ჩემი მხრიდან ზედმეტი აქტივობა კი, არ მინდა იქცეს ხელისშემშლელ ფაქტორად გამოძიების პროცესში. ამიტომ ამ ეტაპზე თავს შევიკავებ კომენტარისგან. თუმცა, გამოძიებას მივადევნებ თვალყურს, არა მარტო მე, არამედ მთელი ნაციონალური გუნდი, ვინც ილიასთან ერთად ვმუშაობდით ამ ხნის მანძილზე.
_თქვენ ამბობთ, რომ ძალოვან სტრუქტურებში ვაშაყმაძის დაბარების ფაქტი უკავშირდებოდა, მის მიერ თანამდებობის დატოვებას. ილია ვაშაყმაძემ თანამდებობა დატოვა, თუმცა გამოძიება გრძელდება. . . შეიძლება თუ არა, ამით გამოძიება სხვა თანამდებობის პირებზე გასვლას ცდილობდეს?
_ამ კითხვის კონტექსტში პოლიტიკური მოტივი იგრძნობა. თქვენ სწორად მიანიშნეთ, შეიძლება, იყოს გათვლა იმაზეც, რომ გავიდნენ უფრო მაღალი თანამდებობის პირებზე. მე მინდა, პირველ რიგში, დაგარწმუნოთ თქვენ, ჟურნალისტები და საზოგადოება, რომ არჩევნების მიმდინარეობის პროცესში აქ ვიმყოფებოდი და რა ინფორმაციაც გამაჩნია ამ კონკრეტულ ფაქტთან დაკავშირებით, არის ის, რომ ილია ვაშაყმაძე მაშინაც ასრულებდა და ახლაც ასრულებს პარტია “ნაციონალური მოძრაობის” თავმჯდომარის ფუნქციას. ამიტომ ის ამ ტიპის შეხვედრებს ნამდვილად ახორციელებდა.
_არა მარტო ილია ვაშაყმაძე . ..
_კი, ბატონო, დაგეთანხმებით. ასევე სხვა თანამდებობის პირებიც, მათ შორის, უფრო მაღალი თანამდებობის პირები იყვნენ ჩართული საარჩევნო პროცესში. ჩემი აზრით, აქ კანონის დარღვევაზე საუბარი არც არის. იმიტომ, რომ ყველა შვებულებაში იმყოფებოდა და მათ პარტიული წესით დავალებების მიცემის უფლება ჰქონდათ. ილია ვაშაყმაძის ფაქტს სერიოზული სარჩული, ჯერჯერობით, ნამდვილად არ აქვს. შეიძლება, ეს წმიდა გამოძიების ინტერესი იყოს. შესულია საჩივარი და რეაგირებას საჭიროებს, მაგრამ ეს ყველაფერი საეჭვოდ ემთხვევა ილიასთან დაკავშირებულ იმ “კეთილ შემონათვალებს” , რომლის შინაარსი იყო ის, რომ თუ დროზე არ მიიღებდა გადადგომის გადაწყვეტილებას, ცუდ დღეში აღმოჩნდებოდა. რამდენად არის ეს ყველაფერი ერთმანეთთან კავშირში, ამას დრო გვიჩვენებს.
_ბატონო პაატა, შეგიძლიათ , დააკონკრეტოთ, ვინ იყვნენ “კეთილი შემონათვალის” ავტორები?
_ კონკრეტული ადამიანების დასახელებისგან თავს შევიკავებ. ზუსტ ციტირებასაც ვერ მოვიყვან, მაგრამ დაახლოებით, ასეთი შემონათვალი იყო: „თქვენ მიიღეთ გადადგომის შესახებ გადაწყვეტილება, დროზე, თორემ შეგექმნებათ პრობლემა“. აი, თუ თვითონ არ გაახმაურებს ამას ბატონი ილია, მე ვერ ვისაუბრებ.
_ თქვენი აზრით, ყოფილი გამგებელი ილია ვაშაყმაძე შეშინდა?
_ არა. შეშინებულს ნუ დავარქმევთ. კაცი როცა ხედავდა, რომ თავისი არწასვლით პრობლემებს შეუქმნიდა სხვა ადამიანებსაც, წავიდა. მას ამ შემთხვევაში, უფრო მაღალი პასუხისმგებლობა მართებდა. მე ვეთანხმები ილიას იმაში, რომ არცერთი თანამდებობა არ ღირდა იმად, რომ თავისი არწასვლით კიდევ ვინმესთვის პრობლემები შეექმნა.
_ ბატონო პაატა, როგორ ფიქრობთ, თუკი გამგებელს არაფერი დაუშავებია, რატომ დატოვა თანამდებობა?
_ ეს საინტერესო კითხვაა. მე პროფესიით იურისტი ვარ, ვმუშაობდი ადვოკატად, ასევე ვმუშაობდი აუდიტშიც, მქონია ურთიერთობა სხვადასხვა საგამოძიებო სტრუქტურებთან. 2003 წლამდე იყო მავნე პრაქტიკა, _ მთავარი იყო, ოღონდ პოლიტიკური ნება ყოფილიყო და ნებისმიერი ადამიანის დაკავება მოხდებოდა. (არადა, ეს პრაქტიკა ხომ მთელი სისრულით 2003 წლის შემდეგ დაინერგა საქართველოში. ავტ.) . თუ ჩვენ ძველ დროს დავუბრუნდებით, მაშინ უნდა ვივარაუდოთ, რომ ნებისმიერ პირზე, მათ შორის, ჩემზეც, მიუხედავდ იმისა, რომ არ ვარ ნარკოტიკის მომხმარებელი, არც სხვა ტიპის სამართალდარღვევა ჩამიდენია, არ მქონია ადმინიტრაციული გადაცდომა, შესაძლებელია, ხვალ გაიგოთ, რომ ჩემზეც დაიწყო გამოძიება. ამას ვერ გამოვრიცხავ, მაგრამ ეს იქნება პოლიტიკურად მოტივირებული.
_ თქვენ თვლით, რომ ილია ვაშაყმაძის მიერ თანამდებობის დატოვებას პოლიტიკური სარჩული დაედო?
_ ჯერ ჩნდება პიროვნების მიმართ პრობლემები და მერე იწყება მის ირგვლივ საქმეების მოძიება. რა მიზეზი შეიძლება, ამ ადამიანს დაუდონ დაკავების სარჩულად, წინასწარ ძნელი სათქმელია.
_ბატონო პაატა, როცა ყველას კარგად ახსოვს ყოფილი გამგებლის გია ტაკიძის დაკავება, თქვენი აზრით, ილია ვაშაყმაძე საკრებულოს თავმჯდომარის საქმის კურსში ჩაყენების გარეშე, დამოუკიდებლად ნაბიჯს გადადგამდა ?
_ალბათ, მხედველობაში გაქვთ კონკრეტული სამართალდარღვევის ფაქტები. მე გამოვრიცხავ ასეთი ფაქტების არსებობას. რომ არსებობდეს, ეს უკვე იქნებოდა გამოყენებული ილიას საწინააღმდეგო ბერკეტად და არა ის ყურით მოთრეული შვიდი თვის წინანდელი ფაქტი.
_ ეს საარჩევნო დარღვევა მარტო ილიავაშაყმაძეს არ ჩაუდენია. იგივეს ახორციელებდნენ: საკრებულოს თავმჯდომარე, ნებისმიერი სამსახურის უფროსი, სკოლის დირექტორი, ა.ა. ი. პ-ის ხელმღვანელები, საჯარო მოხელეები.
_ ვერ გეტყვით. თუმცა, ყველა ადამიანმა უნდა აგოს პასუხი, სამართალდარღვევასთან დაკავშირებით. არსებობს მაღალი ალბათობის ეჭვი, რომ ილიას მიმართ “კეთილი შემონათვალები” და მისი ძალოვან სტრუქტურებში დაბარება, შემთხვევით არ დაემთხვა ერთმანეთს.
_თუმცა, საკრებულოს მთლიანმა შემადგენლობამ ახლა ახალ გამგებელს კოტე შარაშენიძეს დაუჭირა მხარი. . .
_ზუსტად გეტყვით. რაც შეეხება საკრებულოში მიმდინარე პროცესს, ეს არის პოლიტიკა. არსებობს ადამიანების კატეგორია, რომლებსაც აქვთ განცდა, რომ მუდმივად უნდა იყონ ხელისუფლებაში, მათ გააკეთეს ახალი არჩევანი. თუმცა, მათი გადასაწყვეტი რომ ყოფილიყო ილიას წასვლა, ისინი ხელს მის წასვლაზე არ აწევდნენ. ჩვენ ამ ტიპის გამოკითხვა ჩატარებული გვაქვს და ვიცით, რომ ილიას წასვლაზე ხელს არავინ აწევდა. თუმცა, წარმატებულად და ასევე ერთხმად მოხდა ახალი გამგებლის არჩევა.
_როგორი აზრის ხართ ახალ გამგებელზე?
_ახალ გამგებელს, დიდი ხანი არ არის, რაც ვიცნობ. ამიტომ თავს შევიკავებ კომენტარისგან. დაველოდოთ, ჩვენ გაგვიხარდება, თუ კი სხვა ჩვენზე მეტ საქმეს გააკეთებს.
_ თქვენეული შეფასება გვაინტერესებს ლანჩხუთსა და ჩოხატაურში მიმდინარე პოლიტიკურ პროცესებზე.
_არ მინდა, ზედმეტი აგრესია გამომივიდეს. ისედაც დაძაბული ფონია, ეს არ არის ნამდვილად ჯანსაღი პროცესი. ამ ფორმით გამგებლის გადადგომის მოთხოვნა, ანუ შიმშილობა 20 კაცის მიერ, შემდგომშიც წაახალისებს ქმედებებს. ბოლოს კი ქაოსამდე მივა ყველაფერი. გამგებლის და საკრებულოს თავმჯდომარის არჩევას აქვს თავისი წესი, რომელიც არის კანონით დადგენილი. 2014 წელს გამარჯვებული პარტია თავისთავად დააკომპლექტებს თავის გუნდს.
პოლიტიკურად მშვიდი სიტუაციაა ჩოხატაურში. ვნებათაღელვა მაღალი არ არის, დეპუტატიც კონსტრუქციულად მიუდგა ამ საკითხს. გარკვეული გადაწყვეტილებები აქაც იქნება, მაგრამ არა იმ ფორმით, როგორითაც ლანჩხუთში ხდება.
საერთოდ, მთელი საქართველოს მასშტაბით ხდება ის, რომ “ქართული ოცნება” გამგეობების ხელში ჩაგდებას ცდილობს. მაგრამ ვინ როგორი ტაქტიკა აირჩია ამასთან დაკავშირებით, ამაშია საქმე. მე არ მინდა ზედმეტი აქტიურობა, რომ მერე ამ აქტიურობამ გამოძიება დააზარალოს. ისე კი, გულისყურით დავაკვირდებით ამ პროცესს და თუ ილია დამნაშავედ უნდა იქნეს ცნობილი, “ნაციონალების” მხრიდან
ამას მოჰყვება მყისიერი და უმკაცრესი რეაგირება, არა მარტო ადგილობრივ, არამედ ცენტრალურ და საერთაშორისო დონეზე.
