_ მას სრული ნდობა გამოუცხადა 90 დელეგატმა.
კონფერენციაზე დავით დარჩიამ განაცხადა, რომ მზად არის პარტიის განვითარებისთვის მხარდამჭერებთან ერთად იბრძოლოს და მომავალში კარგი საქმეების გაკეთება შეძლოს, მისივე თქმით, ამ საქმეებს ის გუნდთან ერთად გააკეთებს.
_ ბატონო დავით, როგორც გუშინ თქვენმა ერთერთმა მხარდამჭერმა ბესო მელუამ განაცხადა პრესკონფერენციაზე, 20 დელეგატი დღევანდელ ყრილობას არ დაესწრებოდა. რა კომენტარს გააკეთებდით ამ ფაქტთან დაკავშირებით?
_ ბოდიშს მოგიხდით, მაგრამ მე გაჩვენებთ რამდენიმე ადამიანს აქ, ვინც გუშინ პრესკონფერენციაზე იმყოფებოდა და თქვენ თვითონ შეაფასეთ შემდეგ _ გეტყვიან როგორ მიჭერენ მხარს. ვერაფერს ვერ გეტყვით. ჩემი აზრით, დალაგდება ეს ყველაფერი _ იყო გაუგებრობა, გაირკვევა და თავის რიტმში ჩაჯდება. დარწმუნებული ვარ, რომ კიდევ მოვლენ, ვინც გუშინ იქ იყო. მოვიდნენ, გამოხატონ თავიანთი აზრი.
_ ბატონო დავით, პრემიერ- მინისტრ ბიძინა ივანიშვილის მიერ ჟურნალისტებთან გაკეთებული განცხადების შესახებ რას იტყოდით? პოლიციის უფროსთან დაკავშირებულ განცხადებას ვგულისხმობ.
_ ეს ფაქტი ნამდვილად მოხდა და იყო. ეს სრული ჭეშმარიტებაა და მე მგონი, ყველაფერი ნათელია, ვერაფერს ვერ დავამატებ.
_ ესე იგი, გურიის სამხარეო მთავარი სამმართველოს უფროსმა ზაზა პეტრიაშვილმა თქვენი პოლიტიკური გადაბირება სცადა? მაშინ გვითხარით, უკავშირდება თუ არა ეს ფაქტი ზაზა პეტრიაშვილის თანამდებობიდან გათავისუფლებას?
_ არ შემიძლია, ეგ რომ გითხრათ, რა! ვერაფერს ვერ გეტყვით.
_ ბატონო დავით, ჩვენი წყარო ამბობს, რომ სპეციალურად უთხარით ეს ბიძინა ივანიშვილს, რომ , რომ პოლიციის უფროსი თავიდან მოგეშორებინათ.
_ არა, არა, რატომ?
_ ბატონო დავით, გვაქვს ინფორმაცია, რომ თქვენ და კოტე შარაშენიძე ძალიან ხშირად სტუმრობით სამხარეო პოლიციის უფროსს და მას ოზურგეთის რაიონული სამმართველოს უფროსის პოსტზე ეროდი გორდელაძის დანიშვნას თხოვდით, პეტრიაშვილმა კი თქვენი წინადადება არ გაითვალისწინა. ამასთან დაკავშირებით, ხომ არ გქონდათ რაიმე უთანხმოება მასთან?
_ მე მგონი, არაფერი და ისე ვთქვათ, რომ გაეთვალისწინებინა რა, არ შეიძლებოდა? ყოველ შემთხვევაში, ეროდი გორდელაძის კანდიდატურას ჩვენ რომ ვაყენებდით და ვთავაზობდით, მისი პროფესიონალიზმიდან გამომდინარე იყო ეს. დარწმუნებული ვარ, რომ ეს კაცი ერთ-ერთი საუკეთესო პოლიციელია ყველა თვისებებით, იგი კარგად იცნობს რაიონს და მიგვაჩნია, ქვეყანას წაადგებოდა, რომ კრიმინოგენული სიტუაცია არ გართულებულიყო.
კიდევ ერთხელ ვიტყვი _ პოლიციის უფროსის მოსაცილებლად ეს არ გამიკეთებია. მე როგორც მეგობარს, ბატონ ბიძინას არ დავუმალე გურიაში არსებული სიტუაცია და საქმის კურსში ჩავაყენე, რომ ეს ფაქტი იყო ყურადსაღები.
_ პრემიერ-მინისტრის მიერ წინასწარ დაანონსებულ ინფორმაციაზე რას გვეტყვით, როცა თქვენ პარტია „ქართული ოცნება დემოკრატიული საქართელოს“ ოზურგეთის რაიონული ორგანიზაციის უკვე არჩეულ თავმჯდომარედ მოგიხსენიათ, როცა კონფერენცია დღეს ჩატარდა და დღეს აგირჩიეს?
_ ჩემი არჩევა მოხდა პოლიტისაბჭოს მიერ ექვსი თვის ვადით და ეს გადაწყვეტილება იყო მიღებული. დღეს, უბრალოდ, ამ გადაწყვეტილების იურიდიული დამტკიცება მოხდა. გავრცელდა ინფორმაცია, რომ თითქოს, შეცდომაში შევიყვანე პრემიერ-მინისტრი, მაგრამ ეს ასე არ იყო.
_ შეიძლება თუ არა დავით დარჩია გახდეს გუბერნატორი?
_ რატომაც არა, არ გამოვრიცხავ.
_ ბატონო დავით, ეს თქვენი პირადი სურვილია თუ თქვენს უკან დგანან პიროვნებები, რომლებსაც თქვენი გუბერნატორობა ხელს აძლევთ?
_ ორივე. ჩემს გვერდით არიან ადამიანები, რომლებიც მე მხარს მიჭერენ ამ პოსტზე.
_ შეგიძლიათ, გვითხრათ, ვინ არიან?
_ გაიხედეთ და ჩემს ირგვლივ ნებისმიერ ადამიანს გულწრფელად უნდათ, რომ გავხდე გუბერნატორი.
_ ბატონო დავით, რა კომენტარს გააკეთებდით კოტე შარაშენიძეს და ნესტორ რამიშვილს შორის მომხდარ ინციდენტთან დაკავშირებით _ თქვენ შარაშენიძისთვის ხელის დაფარებაში გადანაშაულებენ.
_რა ვიცი, რა გითხრათ? ფაქტი და მტკიცებულებები არ არსებობს, საქმეზე გამოძიება მიმდინარეობს. ეს “აწყობს” ადამიანთა ჯგუფს, მაგრამ მე დარწმუნებული ვარ, რომ სიმართლე მალე გაირკვევა. არ შეიძლება ადამიანს ყველაფერი დააბრალო ისე, როცა არ არსებობს მტკიცებულება და მით უმეტეს, მეორე მხარე კატეგორიულად უარყოფს მსგავს ფაქტს. თუმცა, იყო მათ შორის სიტყვიერი დაძაბულობა და შელაპარაკება ნამდვილად, მაგრამ კრიმინალი კოტე შარაშენიძეს ნამდვილად არ ჩაუდენია.
_ ბატონო დავით, ჩვენი წყარო ამბობს, რომ საარჩევნოდ თქვენს ანგარიშზე ირიცხებოდა ძალიან დიდი რაოდენობის თანხა. თქვენი ოპონენტები თქვენ, კოტე შარაშენიძეს და ზვიად კვაჭანტირაძეს ამ თანხის მითვისებაში გადანაშაულებენ.
_ ამასთან დაკავშირებით კომენტარს არ გავაკეთებ. გულწრფელად რომ გითხრათ, არ შეიძლება ამაზე საუბარი. მიმძიმს ძალიან და ძალიან რთულია. ესეც ადამიანთა ერთი ჯგუფის მიერ მოგონილი აბსურდია. მე ვიცი მეგობრობის ფასი და წესრიგი, რომელსაც არასდროს არ ვუღალატებ და დავიცავ მუდამ.
