15 ნოემბერს დაკავებულ ყოფილ ვიცე- მერს, შოთა ხიზანიშვილს აღმკვეთი ღონისძიების სახით პატიმრობა შეეფარდა. ამ ფაქტის გამო, გიგი უგულავამ სასწრაფოდ შეწყვიტა თავისი ვიზიტი იტალიაში და შოთა ხიზანიშვილის მხარდასაჭერად სასამართლოშიც მივიდა. პროცესის დასრულების შემდეგ კი განაცხადა, რომ სასამართლომ და მოსამართლემ ვერ გაუძლეს ზეწოლას. როგორც ჩანს, მაშინ უგულავას სულ არ გახსენებია ის ფაქტი, რომ წინა ხელისუფლების საამაყო და რეფორმირებულ სასამართლოს ისევ ის ხელმძღვანელი ჰყავს, რომელსაც აქამდე სრულ ნდობას უცხადებდნენ.
21 ნოემბერს, შსს თბილისისი მერის გიგი უგულავას მეგობარი, გიორგი ქელბაქიანი დააკავა . რომელიც შპს “ენსისის” მეწილე და გენერალური დირექტორია.
საჯარო რეესტრის მონაცემებით კომპანია “ენსისის” 70% წილი ქელბაქიანს ეკუთვნის, 30% წილის მფლობელი კი გიორგი გიორგაძეა. შსს სამინისტრომ ქელბაქიანთან ერთად დააკავა კომპანია “ენსისის” ფინასური მენეჯერი არჩილ ჩოგოვაძე. მათ ბრალად სახელმწიფო სახსრების დიდი ოდენობით მითვისება ედებათ. გარდა ამისა, მათ მიმართ მიმდინარეობს გამოძიება რიყეზე მდებარე “ბუდაბარის” საკუთრების კანონიერების შესახებ, აგრეთვე თბილისის შემოგარენში მშენებარე ფეშენებელური აგარაკების სამშენებლო სახსრების წარმომავლობასთან დაკავშირებით.
“თბილისის წყლის” ყოფილი გენერალური დირექტორის, თავისი მეგობრის, გეგა ქელბაქიანის დაკავებას კი უგულავას მორიგი განცხადება მოჰყვა პრემიერ-მინისტრის მისამართით, _ მე დამიჭირეთ შეთითხნილი ბრალდებითო…
როგორც ჩანს, ხიზანიშვილის დაკავების შემდეგ, ზოგიერთმა სამშენებლო კომპანიამ მოსალოდნელი საფრთხე იგრძნო. თბილისის მერიაში, პროკურატურის თანამშრომლების მიერ შოთა ხიზანიშვილის კაბინეტის ჩხრეკის დასრულებისთანავე, მერიასთან თეთრი ფერის “ჯიპი” გამოჩნდა.
ამ დროს “გურია ნიუსი” ქალაქის მერიის შენობასთან იმყოფებოდა. მანქანიდან ერთი მამაკაცი გადმოვიდა წიგნაკით ხელში. რამდენიმე წუთში, მას მეორე მამაკაცი შეუერთდა. ორივე მათაგანი მერიის შენობაში შევიდა. დაცვის 10-მდე თანამშრომელმა ისინი შენობაში უპრობლემოდ შეუშვა.
“გურია ნიუსის” კითხვა, _ იყვნენ თუ არა ისინი პროკურატურის თანამშრომლები, _ მათ უპასუხოდ დატოვეს. მძღოლმა, რომელმაც ერთ-ერთი მათგანი უგულავას უწყებაში მოიყვანა, გვითხრა, რომ ისინი სამშენებლო კომპანიიდან არიან და საქმეზე არიან მოსულები. მან სამშენებლო კომპანიის დასახელებისგან თავი შეიკავა.
ამ ისტორიების ერთ-ერთმა წამყვანმა ფიგურამ, თბილისის განვითარების ფონდის ყოფილმა დირექტორმა გიორგი საბანაძემ ყველაზე ადრე იგრძნო მოახლოებული საფრთხე და არჩევნების დასრულების შემდეგ, საქართველოდან გაიქცა. ინფორმაცია ამის შესახებ საკრებულოს წევრმა, ფრაქცია „ქრისტიან-დემოკრატების“ თავმჯდომარემ, ზაზა გაბუნიამ გაავრცელა. მისივე თქმით, საბანაძემ ქვეყნიდან საკმაოდ მნიშვნელოვანი დოკუმენტაცია გაიტანა.
2 535 000 მილიონიანი “ატკატი”
თუმცა, გაუტანელი დოკუმენტაციის მიხედვით ირკვევა, რომ თბილისის მთავრობის დაკვეთით. დედაქალაქში მიმდინარე სამშენებლო სამუშაოებს „ენსისი“ ექსკლუზიურად ასრულებდა, რომელთა ღირებულებამ 2009-2012 წლებში 200 მილიონ ლარამდე შეადგინა. ამის შესახებ ოფიციალური განცხადება შსს-ს საზოგადოებრივ საქმეთა დეპარტამენტის ხელმძღვანელმა ნინო გიორგობიანმა გააკეთა. მან უკანონო შემოსავლების ლეგალიზაციის ბრალდებით გიორგი ქელბაქიანისა და არჩილ ჩოგოვაძის საქმეზე ახალი მტკიცებულებები გაავრცელა.
სამინისტროს ინფორმაციით – “ენსისის” გენერალურმა დირექტორმა გიორგი ქელბაქიანმა და ამავე საწარმოს ფინანსურმა დირექტორმა არჩილ ჩოგოვაძემ სახელმწიფო სახსრების დიდი ოდენობით მითვისების მიზნით, ერთ-ერთ ფიზიკურ პირს კონტრაქტის გარეშე ჩაურიცხეს 6 309 885 ლარი, საიდანაც აღნიშნულმა პირმა 3 032 091 ლარი ნაღდი ფული, უკან დაუბრუნა გიორგი ქელბაქიანს და არჩილ ჩოგოვაძეს.”
გიორგობიანის განმარტებით, გიორგი ქელბაქიანის პირადი კომპიუტერის დათვალიერების შემდეგ აღმოჩნდა, რომ შპს „ენსისის“ ფინანსური დირექტორი არჩილ ჩოგოვაძე ქელბაქიანს ცხრილებს უგზავნიდა, სადაც ჩანს თუ რა მოცულობის თანხებს ურიცხავდნენ ფიზიკურ პირს, გოჩა დარსაძეს 2009-2012 წლებში სამშენებლო სამუშაოებისთვის.
აუდიტორების მიერ მომზადებული შუალედური დასკვნის თანახმად, “ლეპტოპის” დათვალიერებისას მოპოვებულ ინფორმაციასა და საბანკო ამონაწერს შორის რადიკალური სხვაობაა. “ფაქტიურად შპს “ენსისის” მიერ 2009 – 2012 წლებში გოჩა დარსაძისა და მისივე კონტროლის ქვეშ მყოფ შპს „გვირაბ გამყვანისათვის“ კონტრაქტის გარეშე სულ ჩარიცხულია 6 589 000 ლარი, საიდანაც შპს „ენსისის“ დირექტორმა გიორგი ქელბაქიანმა და ფინანსურმა დირექტორმა, არჩილ ჩოგოვაძემ ე.წ. “ატკატის” სახით უკან დაიბრუნეს 2 535 000 ლარი,” – აცხადებს ნინო გიორგობიანი.
გამოძიების მიერ მოწმის სახით დაკითხულმა არჩილ ჩოგოვაძემ და გოჩა დარსაძემ თავდაპირველ ჩვენებაში სამუშაოების შესრულების შემდეგ ფინასური ანგარიშსწორების დროს რაიმე სახის სამართალ დარღვევის ჩადენის ფაქტი უარყვეს. დამატებითი დაკითხვის შემდეგ კი, “გოჩა დარსაძემ განაცხადა, რომ ვიდრე პირველ დაკითხვაზე გამოცხადდებოდა, შინაგან საქმეთა სამინისტროში ის და შპს “გვირაბგამყვანის” დირექტორი იმედა ბოჭორიშვილი არჩილ ჩოგოვაძემ თავისთან დაიბარა და გააფრთხილა, გამოძიებისთვის ცრუ ჩვენება მიეცათ, რომ თითქოს და საბანკო ამონაწერებში ნაჩვენები თანხები მათ სრულად ჰქონდათ მიღებული. ამასთანავე შეჰპირდა, თუ კი მოხდებოდა მათი დაკავება, ის და გიორგი ქელბაქიანი აუცილებლად დაიხსნიდნენ მათ საპატიმროდან. შესაბამისად, გოჩა დარსაძემ თავდაპირველ გამოძიებას ცრუ ჩვენება მისცა,” – ამბობს გიორგობიანი.
გოჩა დარსაძემ გამოძიებას დამატებითი ინფორმაცია მიაწოდა, რომ მას გიორგი ქელბაქიანმა სოფელ წავკისში 3 სააგარაკე სახლის მშენებლობა შეუკვეთა. პირველი ორისგან განსხვავებით, მესამე მშენებარე სახლის მეპატრონის ვინაობა დარსაძისთვის უცნობია.
“ნიშანდობლივია, რომ აგარაკების მშენებლობა მიმდინარეობდა კომპანია “ენსისის” კუთვნილი თანხებით, რომელიც 100 პროცენტით საბიუჯეტოა, ვინაიდან, კომპანია მხოლოდ სახელმწიფო დაკვეთებზე მუშაობდა. აღსანიშნავია, რომ კომპანია “ენსისის” ჰყავს ორი დამფუძნებელი, გიორგი ქელბაქიანი და გიორგი გოგიბერიძე, ხოლო კომპანიის სახსრებით შენდებოდა 3 აგარაკი. აქედან გამომდინარე, გამოძიება დაადგენს, ხომ არ ჰყავდა კომპანიას ფარული ბენეფიციარი სახელმწიფო მოხელის სახით, რომელსაც ეკუთვნოდა მესამე გასაიდუმლოებული აგარაკი. კიდევ ერთი მნიშვნელოვანი დეტალი. კომპანია წლების მანძილზე არ იხდიდა გადასახადებს და დეკლარაციებს ნულოვანი მოგებით აბარებდა. შეკრებილი მტკიცებულებებით შეიქმნა გიორგი ქელბაქიანისა და არჩილ ჩოგოვაძის მიმართ სისხლის სამართლებრივი დევნის დაწყების საკმარისი საფუძველი. შესაბამისად, მოხდა მათი დაკავება,”– განაცხადა საზოგადოებრივ საქმეთა დეპარტამენტის ხელმძღვანელმა.
იტალიელი მასიმილიანოს მუსიკალური ცენტრი და 89 მილიონიანი რიყე
შსს–მ ასევე წარმოადგინა ოთხი ხელშეკრულება, რომლებიც დედაქალაქში განხორციელებულ თუ მიმდინარე სამშენებლო–სარეაბილიტაციო სამუშაოების შესასრულებლად, შპს “ენსისისსთან” არის გაფორმებული. ოთხივე ხელშეკრულებას ხელს თბილისის მერის, გიგი უგულავას მეგობარი და შპს “ენსისის” დირექტორი გიორგი ქელბაქიანი აწერს.
2010 წლის 10 მაისს უშუალოდ თბილისის მერის მოადგილემ დავით ალავიძემ შპს „ენსისისთან“ ხელშეკრულება გააფორმა. დოკუმენტის თანახმად, სამშენებლო კომპანიას დიღმის მასივში, დავით აღმაშენებლის ძეგლთან მრავალწლიანი უფლებით საავტომობილო გვირაბის მოწყობის სამუშაოების შესრულება დაევალა. პროექტის ღირებულება 8 465 000 ლარს შეადგენს.
მომდევნო ხელშეკრულება 2011 წლის 16 მარტს ამჯერად “თბილისის განვითარების ფონდის” თავმჯდომარე გიორგი საბანაძესა და შპს “ენსისის” დირექტორ გიორგი ქელბაქიანს შორის, რიყის ტერიტორიაზე მიწისქვეშა სამუშაოების შესასრულებლად გაფორმდა. 2012 წლის 30 მაისს დასრულებული პროექტისთვის კომპანიის ანგარიშზე 16 141 756 ლარი ჩაირიცხა.
ასევე ქელბაქიანისა და საბანაძის ხელმოწერებია 2011 წლის 20 სექტემბრით დათარიღებულ ხელშეკრულებაზე. დოკუმენტის თანახმად, რიყის ტერიტორიაზე შენობა–ნაგებობების მშენებლობის სამუშაოები კომპანია „ენსისის“ 2012 წლის 20 სექტემბრისთვის უნდა დაესრულებინა. კერძოდ, რიყეზე უნდა აშენებულიყო მუსიკალური ცენტრი და საგამოფენო დარბაზი, თუმცა ის ჯერაც დაუმთავრებელია. პროექტის ავტორი იტალიელი არქიტექტორი მასიმილიანო ფუქსასია.
როგორც ჩანს, თბილისის მერი გიგი უგულავა, იტალიაში ოფიციალური ვიზიტის დროს, მასიმილიანო ფუქსასს შემთხვევით სულაც არ “გადაყრია”. მერიის ოფიციალურ ვებგვერდზე გამოქვეყნებულ ინფორმაციაშია მუსიკალური ცენტრის და საგამოფენო დარბაზის მშენებარე კონსტრუქციის შესაძლო დემონტაჟთან დაკავშირებით ვკითხულობთ:
“მასიმილიანო ფუქსასი შეშფოთებულია ობიექტის დემონტაჟთან დაკავშირებით, გავრცელებული ინფორმაციით და მზადყოფნას გამოთქვავს პროექტის დასაცავად და მხარდასაჭერად, მსოფლიოში წამყვანი არქიტექტორების მობილიზაცია მოახდინოს და თავადაც ჩამოვიდეს საქართველოში. თბილისის მერმა არქიტექტორი დაამშვიდა და მასთან საუბარში აღნიშნა, რომ მიუხედავად მუქარისა იმედოვნებს, მსგავსი ვანდალიზმი არ განხორციელდება,”– აღნიშნულია მერიის ოფიციალურ განცხადებაში.
“თბილისის განვითარების ფონდიდან” კომპანია FUKSAS–ის პირობების შესაბამისად, სამშენებლო სამუშაოების ჩასატარებლად, შპს „ენსისის“ ანგარიშზე 89 მილიონი ლარი ჩაირიცხა.
გრაფიკი ასეთია: 2011 წლის 30 სექტემბერი _ 11 მილიონი ლარი; 2011 წლის 31 დეკემბერი _ 11 მილიონი ლარი; 2012 წლის 15 თებერვალი _ 8 მილიონი ლარ; 2012 წლის 31 მარტი _ 8 მილიონი ლარი; 2012 წლის 30 აპრილი _ 12 მილიონი ლარი; 2012 წლის 30 მაისი _ 6 მილიონი ლარი; 2012 წლის 30 ივნისი _ 6 მილიონი ლარი; 2012 წლის 30 ივლისი_ 6 მილიონი ლარი; 2012 წლის 30 აგვისტო _ 12 მილიონი ლარი, ბოლო ჩარიცხვა კი 2012 წლის 9 ოქტომბერს განხორციელდა _ 6 მილიონი ლარი.
თბილისის განვითარების ფონდის თავმჯდომარე გიორგი საბანაძესა და “ენსისის” დირექტორ გიორგი ქელბაქიანს შორის 2011 წლის 21 სექტემბერს კიდევ ერთი ხელშეკრულება გაფორმდა, რომლის თანახმადაც სამშენებლო კომპანია „ენსისის“ თბილისის ზღვაზე სარეკონსტრუქციო–სარეაბილიტაციო სამუშაოები უნდა შეესრულებინა. პროექტის ჩაბარების ბოლო ვადა 2014 წლის 31 დეკემბერია. მისი ღირებულება კი 20 580 136 ლარს შეადგენს.
მივა თუ არა პროკურატურა გიგი უგულავას სამეგობროდან თავად ქალაქის მერამდე, ეს ალბათ უახლოეს პერიოდში გამოჩნდება.
