“2012 წლის 25 ნოემბერს, მასობრივი ინფორმაციის საშუალებებით გავრცელდა ინფორმაცია სახელმწიფო აუდიტის სამსახურის ყოფილი თანამშრომლის, იოსებ ჩიქობავას მკვლელობასთან დაკავშირებით. მომხდარ ფაქტს ჰყავდა თვითმხილველები და შინაგან საქმეთა სამინისტრომ იმავე დღეს გაავრცელა ინფორმაცია დანაშაულის ჩადენაში ბრალდებული პირის დაკავების თაობაზე.
დანაშაულის გახსნასთან დაკავშირებით, შსს-ს განცხადების მიუხედავად, გაზეთ “გურია ნიუსის” ჟურნალისტმა თამარ ლეფსვერიძემ მასობრივი ინფორმაციის საშუალებებით გაავრცელა ინფორმაცია, სადაც იოსებ ჩიქობავას მკვლელობა, ყოველგვარი საფუძვლისა და არგუმენტაციის გარეშე, სახელმწიფო აუდიტის სამსახურს დაუკავშირა, რაც გვაფიქრებინებს, რომ ქალბატონი ლეფსვერიძის განცხადება მიზნად ისახავდა არა ამ განსაკუთრებით მძიმე დანაშაულზე ჭეშმარიტების დადგენას, არამედ სახელმწიფო აუდიტის სამსახურის დისკრედიტაციას.
საქართველოს კანონმდებლობით გარანტირებულია მედიასაშუალებების საქმიანობის თავისუფლება და ხელშეუხებლობა. სახელმწიფო აუდიტის სამსახური განუხრელად დაიცავს ამ უფლების უპირატესობას თავის საქმიანობაში, თუმცა მოვუწოდებთ ყველა დაინტერესებულ პირს, გამოძიების დასრულებამდე თავი შეიკავონ მსგავსი შინაარსის განცხადების გაკეთებისაგან.
აქვე, გვინდა მწუხარება გამოთქვათ იოსებ ჩიქობავას გარდაცვალების გამო და მივუსამძიმროთ გარდაცვლილის ოჯახს”.
“გურია ნიუსის” რედაქცია მიიჩნევს, რომ სახელმწიფო აუდიტის სამსახურის ეს განცხადება სრულიად უსაფუძვლოა და ავრცელებს საპასუხო განცხადებას:
დღეს, სახელმწიფო აუდიტის სამსახურის ოფიციალურ ვებგვერდზე გამოქვეყნდა განცხადება, რომელიც სახელმწიფო აუდიტის სამსახურის ყოფილი თანამშრომლის, იოსებ ჩიქობავას მკვლელობასთან დაკავშირებულ ინფორმაციებს ეხება. განცხადებაში ნათქვამია, რომ “დანაშაულის გახსნასთან დაკავშირებით, შსს-ს განცხადების მიუხედავად, გაზეთ “გურია ნიუსის” ჟურნალისტმა თამარ ლეფსვერიძემ მასობრივი ინფორმაციის საშუალებებით გაავრცელა ინფორმაცია, სადაც იოსებ ჩიქობავას მკვლელობა, ყოველგვარი საფუძვლისა და არგუმენტაციის გარეშე, სახელმწიფო აუდიტის სამსახურს დაუკავშირა, რაც გვაფიქრებინებს, რომ ქალბატონი ლეფსვერიძის განცხადება მიზნად ისახავდა არა ამ განსაკუთრებით მძიმე დანაშაულზე ჭეშმარიტების დადგენას, არამედ სახელმწიფო აუდიტის სამსახურის დისკრედიტაციას”.
მიუხედავად იმისა, რომ “გურია ნიუსი” და ჟურნალისტი ამ საქმესთან დაკავშირებით, ავრცელებს არა საკუთარ მოსაზრებას ან ვერსიას, არამედ, მოკლული რესპონდენტის მიერ გადმოცემულ მასალებს, ოჯახის წევრთა, რესპონდენტთა მოსაზრებებს, შეუსაბამობებს, რომელიც გამოძიების პროცესში არსებობს, სახელმწიფო აუდიტის სამსახურის განცხადებაში ჟურნალისტიც და გამოცემაც პირდაპირაა დადანაშაულებული მიზანმიმართულ დისკრედიტაციაში. იმის მიუხედავად, რომ “გურია ნიუსშიც” და ზოგადად, მედიაში, ძალიან ბევრი კრიტიკული პუბლიკაცია ქვეყნდება ამ სამსახურის წარსული და ახლანდელი საქმიანობის შესახებ, ხოლო ხელისუფლებაში მოსული მაღალი თანამდებობის პირების მიერ, ეს სამსახური ხშირად პოლიტიკური დაკვეთების შემსრულებელ სისტემად მოიხსენიება, აუდიტის სამსახურმა მხოლოდ ახლა დაარღვია დუმილი და გარკვეულწილად, მუქარის და უფლებამოსილების გადამეტების შემცველი განცხადებით გვაფრთხილებს და მოგვიწოდებს, თავი შევიკავოთ “გამოძიების დასრულებამდე მსგავსი შინაარსის განცხადების გაკეთებისაგან”. საგულისხმოა, რომ ამ დღეებში გავრცელებულ ინფორმაციებში მოხსენიებული კონკრეტული პირები, ამ ეტაპზე, აღარ მუშაობენ აუდიტის სამსახურში და საინტერესოა, თუ რატომ ახდენს სახელმწიფო აუდიტის სამსახური მათთან გაიგივებას!
მიგვაჩნია, რომ სახელმწიფო აუდიტის სამსახურის დისკრედიტაციას უფრო მეტად იწვევს უპასუხო კითხვები, რომლებიც საზოგადოებას მრავლად გააჩნია; ამ სამსახურის დახურულ სისტემად გადაქცევა, რაზეც ხშირად იწერება მედიაში; თუნდაც “გურია ნიუსის” მიერ წამოწყებული სასამართლო დავა, რომელიც საეჭვოდ გაჭიანურდა და საჯარო ინფორმაციის ხელმიუწვდომლობა უდევს საფუძვლად; ჟურნალისტურ საქმიანობაში ხელშეშლა, რომლის დამადასტურებელი აუდიოჩანაწერი “გურია ნიუსის” ვებგვერდზე გამოქვეყნდა, რომ აღარაფერი ვთქვათ ჟურნალისტურ მოკვლევებზე და მასალებზე, რომლებსაც სხვადასხვა მედიასაშუალებები აქვეყნებენ და აუდიტის სამსახურის მხრიდან ადეკვატური, კანონით განსაზღვრული რეაქცია, სამწუხაროდ, არ ახლავს.
“გურია ნიუსის” მიზანია, არა რომელიმე სახელმწიფო სამსახურის დისკრედიტაცია, არამედ, ფაქტის, მოვლენის რეალური გაშუქება, სიმართლის დადგენა და ნებისმიერი მხარის კანონიერი უფლებების დაცვა.
და ბოლოს, ერთი დეტალიც, რომელიც უფრო მორალის სფეროს განეკუთვნება: როგორც განცხადებაშივეა აღნიშნული, “განსაკუთრებით მძიმე დანაშაულის” მსხვერპლი ახალგაზრდა, ნიჭიერი პროფესიონალის, 20-წლიანი სტაჟის მქონე, თუნდაც ყოფილი თანამშრომლის ასე ტრაგიკულად დაღუპვის გამო, სამძიმარი ოჯახისთვის აუდიტის სამსახურმა მხოლოდ საპროტესტო განცხადების ბოლოს გაიმეტა!
