რა ხდება არჩევნების შემდეგ რეგიონებში _ გურიის რეგიონი შედეგებით, თბილისის შემდეგ მეორეა, სადაც კოალიცია “ქართულმა ოცნებამ” სამივე მუნიციპალიტეტში გაიმარჯვა, აქ წარმატებას მიაღწიეს ასევე მაჟორიტარი დეპუტატობის კანდიდატებმა: ზვიად კვაჭანტარიძემ (ოზურგეთი), თემურ ჭკუასელმა (ჩოხატაური) და თემურ ჩხაიძემ (ლანჩხუთი). გურია დღეს საკადრო ცვლილებების მოლოდინშია.
ოზურგეთის მუნიციპალიტეტში საკადრო ცვლილება მხოლოდ დეპუტატის ბიუროში მოხდა, სადაც კოალიციის ერთ-ერთი აქტიური სახე, მარინა სუნგულია დაინიშნა. მეორე ცვლილება ის იყო, რომ შსს გურიის პოლიციის სამმართველოს უფროსად, თბილისიდან ზაზა პეტრიაშვილი დანიშნეს, რომელიც “თავისუფალი-დემოკრატების” წევრი იყო. ბოლო პერიოდში მიდის მოლაპარაკებები და საიდუმლო შეხვედრები, ადგილობრივ ხელისუფლებასა და კოალიციის წევრებს შორის. ამ შეხვედრების შესახებ, ნაკლებად საუბრობენ, მაგრამ ჩვენთვის ცნობილი ხდება, რომ ძალიან მალე საკადრო ცვლილებები ოზურგეთის მუნიციპალიტეტის გამგეობას შეეხება.
ოზურგეთელი ლევან მჟავანაძე ამბობს, რომ არჩევნების შემდეგ, გასული პერიოდის სიმცირე (დაახლოებით, 2 თვე გავიდა) არ იძლევა საშუალებას, სრულყოფილად გავაკეთოთ ახალი ხელისუფლების წარმატებების თუ წარუმატებლობის ანალიზი, თუმცა, შესაძლებელია, გარკვეულ აქცენტებზე ვისაუბროთ:
_ შევეცდები, გარკვეული ლოგიკით გადმოგცეთ ჩემი ხედვა, აქვე მინდა განვმარტო, რომ ეს ჩემეული ხედვაა და არანაირი პრეტენზია არ მაქვს, რომ ის სრულყოფილია:
საკადრო პოლიტიკა _ ამ კუთხით მოსახლეობის მოლოდინი ნაწილობრივ გამართლდა, თუმცა, ჩემი აზრით, იყო შეცდომებიც, რადგანაც ზოგიერთ სახელმწიფო სტრუქტურაში (განსაკუთრებით, ძალოვან სტრუქტურებში და არამარტო იქ) დანიშნული პირების მიმართ საზოგადოებას შეკითხვები გააჩნია.
საზოგადოების არასწორი მოლოდინები _ აშკარად შეიმჩნევა, რომ საზოგადოებას აშკარად არასწორი მოლოდინები ჰქონდა და ელოდა ყველა დონის, მათ შორის, ადგილობრივ თვითმმართველობების ცვლილებასაც. ჩემი აზრით, საზოგადოების დიდმა ნაწილმა მხოლოდ არჩევნების შემდეგ გააანალიზა, რომ საპარლამენტო არჩევნები ყველა დონის ხელისუფლების ცვლილებას არ ნიშნავს. ჩვენ უნდა მივეჩვიოთ, რომ ყოველი ცვლილება არჩევნების გზით გახორციელდეს.
მომრავლებული გაფიცვები _ ვფიქრობ, ასეთ მომრავლებულ გაფიცვებს, სახელმწიფო ფართებში შეჭრას (ლტოლვილების მიერ,) აშკარად საბოტაჟის სუნი აქვს, იმდენად ორგანიზებულად და მიზანმიმართულად ხორციელდება.
თანამდებობის პირთა დაკავებები _ “ქართული ოცნება” არჩევნებამდე აკეთებდა განცხადებას, რომ ისინი დაიწყებდნენ ქვეყანაში სამართლიანობის აღდგენაზე ზრუნვას. მოსახლეობის უმრავლესობამ მხარი დაუჭირა მათ, ე.ი. გაიზიარა და საზოგადოებრივ დაკვეთად აქცია სამართლიანობის აღდგენის “ოცნებისეული” ხედვა. შეასრულო საზოგადოების კანონიერი (ხაზს ვუსვამ სიტყვა “კანონიერს”), დაკვეთა ყოველი ქვეყნის სუვერენული უფლებაა, მაგრამ ეს, როგორც მეგობარი ქვეყნების დიპლომატები გვირჩევენ, მართლაც, მეტი გამჭვირვალობით უნდა გახორციელდეს.
პარლამენტი _ აშკარად უფრო ქმედითი გახდა და დაიბრუნა ის ფუნქცია, რაც უნდა ჰქონდეს _ საკანონმდებლო აზრთა ჭიდილისა და არა მარტო ხელის აწევის.
ტარიფები და პენსიები _ ორთავე კუთხით საზოგადოების მოთხოვნა და მოლოდინი აშკარად უფრო დიდი იყო და ეს უკვე აჩენს უკმაყოფილო ჯგუფებს. თუმცა, მე ვთვლი, რომ საგანგაშო, ჯერჯერობით, არაფერია.
ახალი მთავრობის მეტი გამჭვირვალობა _ აშკარად მეტია ღიაობა, პრემიერ-მინისტრი ხშირად ატარებს ბრიფინგებს, მინისტრები დადიან ტელევიზიებში და პასუხობენ ჟურნალისტების შეკითხვებს. მეტია გულწრფელობის ხარისხი, რადგანაც ხშირად პოლიტიკურად წამგებიან სიმართლესაც ამბობენ (მაგალითად, პრემიერ-მინისტრმა როდესაც თქვა, რომ შეგვეშალა ტარიფების დაწევის გაანგარიშებაო). კარგი იქნება, თუ შენარჩუნდება გამჭვირვალობის გაზრდის ტენდენცია.
საგარეო პოლიტიკა _ მხოლოდ იმის დეკლარირება, რომ ჩვენი პრიორიტეტებია ნატო და ევროკავშირი, აშკარად არასაკმარისია. როგორც უცხოურ პრესაში მომრავლებული კრიტიკული სტატიების მომატება გვიჩვენებს, აშკარად გასაუმჯობესებელია ეს მიმართულება.
განათლება _ აშკარაა დეცენტრალიზაციის ტენდენცია ზოგადი განათლების კუთხით, თუმცა, სამინისტროს არ გაუკეთებია კონკრეტული გეგმის განხილვა, თუ როგორ აპირებენ საჯარო სკოლებში არსებული დემოკრატიული ინსტიტუტების გაძლიერებას. მისასალმებელია, რომ დაბრუნდა ეროვნული გამოცდები.
ბოლოს, შეჯამების სახით, ვიტყვი, რომ ცვლილება აუცილებელი იყო და რადგანაც ეს ცვლილება არჩევნების გზით გახორციელდა, ამ მოვლენამ კიდევ უფრო დაგვაახლოვა ევროპას. მთავარია, შევინარჩუნოთ რიგი წარმატებები, რაც წინა ხელისუფლებას ჰქონდა და გამოვასწოროთ ის შეცდომები, რაც ასევე უხვად ჰქონდათ. პარლამენტში არსებობს 2 ძირითადი პოლიტიკური ძალა და კარგი ასპარეზი, ყველა ცვლილება ლეგიტიმურად გახორციელდეს, _ განაცხადა ჩვენთან საუბრის დროს ლევან მჟავანაძემ.
ოზურგეთის მუნიციპალიტეტის საკრებულოს “ერთიანი ნაციონალური მოძრაობის” დეპუტატის, ირინა საჯაიას თქმით, 2012 წლის ოქტომბერში საქართველოში დემოკრატიული არჩევნები ჩატარდა და პირველად ჩვენი ქვეყნის დამოუკიდებლობის მანძილზე, მოხდა ხელისუფლების საარჩევნო გზით გადაცემა.
_ “ქართულმა ოცნებამ” გაიმარჯვა და ისინი უმრავლესობით მოვიდნენ პარლამენტში. რაც შეეხება ადგილობრივი თვითმმართველობის წარმომადგენლობითი ორგანოები _ საკრებულოები 2010 წელს ოთხი წლის ვადით აირჩია ამომრჩევლებმა, მაგრამ, რბილად რომ ვთქვათ, გაუგებრობაა თვითმმართველობებზე ზეწოლები, რომელიც საქართველოს ზოგიერთ მუნიციპალიტეტში მიმდინარეობს.
რაც შეეხება ოზურგეთს, გურულებმა კიდევ ერთხელ დაამტკიცეს პოლიტიკური გონიერება და მსგავსი არეულობა ჩვენთან არ იგრძნობა. საკრებულო ჩვეულ რეჟიმში განაგრძობს მუშაობას. მოგეხსენებათ, წლის ბოლოს განსაკუთრებით ბევრი საქმეა მუნიციპალიტეტის აღმასრულებელ და წარმომადგენლობით ორგანოებში, რაც ბიუჯეტის _ მთავარი საფინანსო დოკუმენტის ფორმირებაში გამოიხატება. 2013 წლის ბიუჯეტის პროექტი შენიშვნების სახით დაუბრუნდა გამგეობას, რაზეც საკრებულოს კომისიებმა, ფრაქციებმა და ბიურომ იმუშავა. საკრებულოს მიერ ახალი ბიუჯეტის პროექტის დამტკიცებამდე უნდა დაიხვეწოს სოციალური და კულტურულ-სპორტული ღონისძიებების პროგრამები, შეჯამდეს ა(ა)იპ-ების მუშაობა და ა.შ.
მინდა აღვნიშნო, რომ ახალი ხელისუფლება, რომელიც ქვეყნისთვის სასიკეთო საქმეებს გააკეთებს, მზად ვარ, ვითანამშრომლო. მე ვრჩები “ერთიანი ნაციონალური მოძრაობის” წევრი და საჭიროების შემთხვევაში, ვიქნები სამართლიანი და კონსტრუქციული ოპოზიციონერი.
ხელისუფლება კარგი რომ იყოს ოპოზიცია უნდა იყოს ფხიზლად! _ გვითხრა ირინა საჯაიამ.
აკაკი სიხარულიძე, “ქართული ოცნების” საარჩევნო შტაბის წევრი “გურია ნიუსთან საუბრის დროს ამბობს: _ არჩევნების შემდეგ საზოგადოებამ ამოისუნთქა, როგორც ოპოზიციურად განწყობილმა, ასევე თვით “ნაციონალებმა” თავისუფლად ამოისუნთქეს. იმის განცდა, რომ მათ ვიღაც უთვალთვალებს, ფარულად არ უსმენს და შეთხზული ბრალდებით არ დააკავებენ, არ გაატარებენ სადამსჯელო წნეხში, არჩევნების შემდგომი პერიოდის უმთავრეს მიღწევად მიმაჩნია.
მიიწურა ორი თვე არჩევნებიდან და რაიონულ ხელისუფლებას ისევ “ნაციონალური” კადრები წარმოადგენენ. ჩანაცვლების პროცესის ტემპი საზოგადოებას არ აკმაყოფილებს და გამარჯვებულის განცდას ვერ უმტკიცებს. ამიტომაც იმატა ოზურგეთში და ქვეყნის სხვა რაიონებში საპროტესტო გამოსვლებმა “ნაცმოძრაობის” მმართველთა გადაყენების მოთხოვნით.
ადგილობრივ ხელისუფალთა წარმომადგენლებს არ აქვთ გათავისებული, რომ ასრულებენ მუხრუჭის როლს სახელმწიფოს მშენებლობის პროცესში. რა მაქვს მხედველობაში: ქვეყნის პრემიერმა განაცხადა, რომ აპირებს ამნისტიის გამოცემას, რომლითაც საჯარო მოხელეების გარკვეულ ფენას მიუტევებენ წინა ხელისუფლების დროინდელ სამსახურებრივ გადაცდომებს. საამისოდ, ეს მოხელეები უნდა მოიქცნენ არსებული რეალობის შესაფერისად, მაგრამ ამნისტია, ბუნებრივია, არ შეეხებათ მაღალ სახელმწიფო თანამდებობებზე მყოფ პირებს. სწორედ ეს უკანასკნელნი აიძულებენ შესაძლო ამნისტია დაქვემდებარებულებს, რომ არ ითანამშრომლონ გამარჯვებულ პოლიტიკურ ძალასთან და ალექსანდრე დიუმას რომანის გმირების დევიზით, “ერთი ყველასათვის, ყველა ერთისათვის” იმოქმედონ. ასეთ ვითარებაში ნაწილი დაბალჩინოსანი კლერკებისა “ნაციონალებიდან”, არ იტოვებენ სხვა შანსს, გარდა იმისა, რომ მათი საქმიანობა საფუძვლიანად იქნეს შესწავლილი და შეფასებული, _ თქვა ჩვენთან საუბრის დროს აკაკი სიხარულიძემ.
ექსპერტ ხათუნა ლაგაზიძის თქმით, საპარლამენტო არჩევნებში გამარჯვება, რა თქმა უნდა, გამარჯვებულ ძალას არ აძლევს უფლებას, შეცვალოს ან პრეზიდენტი ან ადგილობრივი თვითმმართველობის ორგანოების შემადგენლობა: _ ამისთვის საქართველოში არსებობს სხვა ტიპის არჩევნები, შესაბამისად, პრეზიდენტის და ადგილობრივი თვითმმართველობის, რომლებსაც იგივე ხალხი ირჩევს, რომელმაც აირჩია სწორედ პირველი ოქტომბერს გამარჯვებული ძალა. რასაც კატეგორიულად ვერ გაიგებს და ვერ მიიღებს დასავლეთი, არის სწორედ ახალი მთავრობის მცდელობა, მომავალი ადგილობრივი თვითმმართველობის არჩევნებამდე შეცვალონ ადგილობრივი ორგანოების სტრუქტურულ-პარტიული შემადგენლობა. მით უფრო, თუ მათგან არ დაფიქსირდა საბოტაჟის მცდელობა. პრინციპული მნიშვნელობის საკითხია, რომ ახლად არჩეულმა მთავრობამ მაქსიმალურად ეცადოს ადგილობრივ ორგანოებთან თანამშრომლობას, რაც საქართველოში დემოკრატიის დამკვიდრებისთვის სასიცოცხლოდ აუცილებელი პროცესია! _ განაცხადა ხათუნა ლაგაზიძემ.
