შეხვედრის დროს ითქვა, რომ 2012 წლის განმავლობაში კომისიაში შემოვიდა მოქალაქეთა 1072 განცხადება/საჩივარი კომპანიების წინააღმდეგ. (ელექტროენერგეტიკის, ბუნებრივი გაზისა და წყალმომარაგების სექტორები). გარდა ამისა, 2012 წლის განმავლობაში კომისიასთან არსებულმა მომხმარებელთა ინტერესების საზოგადოებრივი დამცველის სამსახურმა მიიღო და კომისიის საჯარო სხდომაზე განსახილველად გამოიტანა მოქალაქეთა 424 განცხადება/საჩივარი. დავის საგანს, ძირითადად, წარმოადგენდა ენერგეტიკისა და წყალმომარაგების სექტორებში მოქმედი კომპანიების მხრიდან მომხმარებელთა უფლებების დარღვევა და მათ მიერ თანხების უსაფუძვლოდ დარიცხვა.
2012 წლის განმავლობაში, კომისიის საჯარო სხდომებზე მოქალაქეებსა და კომპანიებს შორის არსებული დავების განხილვის შედეგად, კომპანიების მიერ მომხმარებელთათვის დარიცხული თანხებიდან, კომისიამ უსაფუძვლოდ მიიჩნია და მომხმარებლებს ჩამოაწერა სულ 987 359.76 ლარი. (აღნიშნული ინფორმაცია დეტალურად იქნება მოყვანილი კომისიის 2012 წლის ანგარიშში).
აღსანიშნავია, რომ კომპანიების მხრიდან მოქალაქეებზე თანხების უსაფუძვლოდ დარიცხვის ფაქტები საკმაოდ ხშირია. ბოლო სამი წლის განმავლობაში (2010 წლიდან 2012 წლის ჩათვლით) კომპანიების მიერ მომხმარებლებისათვის დარიცხული თანხებიდან, კომისიამ სულ 2 523 112, 36 ლარის დარიცხვა მიიჩნია უსაფუძვლოდ.
მომხმარებელთა უფლებების დარღვევის გამო, 2012 წლის განმავლობაში კომისიის მიერ სახელმწიფო ბიუჯეტის სასარგებლოდ დაჯარიმდნენ შემდეგი კომპანიები: შპს “ჯორჯიან ვოთერ ენდ ფაუერი” – ჯამში 65 ათასი ლარით; შპს “საქართველოს გაერთიანებული წყალმომარაგების კომპანია” – 5000 ლარით; სს “ენერგო პრო ჯორჯია” – 5000 ლარით;
გარდა ზემოთ აღნიშნული კომპანიებისა, კანონმდებლობის დარღვევის გამო 2012 წლის განმავლობაში სხვა კომპანიებიც დაჯარიმდნენ სახელმწიფო ბიუჯეტის სასარგებლოდ: ბუნებრივი გაზის სექტორში ჯარიმების საერთო რაოდენობამ შეადგინა 100 ათასი ლარი; წყალმომარაგების სექტორში – 70 ათასი ლარი; ელექტროენერგეტიკის სექტორში – 40 ათასი ლარი.
მიმდინარე წლის 30 იანვრის სხდომაზე, სახელმწიფო ბიუჯეტის სასარგებლოდ 5000-5000 ლარით დაჯარიმდნენ სს “თელასი” და სს “ენერგო პრო ჯორჯია”.
იმის გამო, რომ შპს “საქართველოს გაერთიანებული წყალმომარაგების კომპანიამ” არ უზრუნველყო ერთ-ერთი აბონენტის მიმართ შეწყვეტილი წყალმომარაგების აღდგენა, რაც განსაზღვრულია ”სასმელი წყლის მიწოდებისა და მოხმარების წესებით”, მიმდინარე წლის 13 თებერვალს კომისიის სხდომაზე განიხილება კომპანიის დაჯარიმების საკითხი.
შეხვედრა ქუთაისის საინფორმაციო ცენტრის და სემეკის საზოგადოებასთან და საერთაშორისო ურთიერთობათა დეპარტამენტის ორგანიზებით ჩატარდა.
