ჩვენ მას საკადრო ცვლილებასთან დაკავშირებით დავუკავშირდით და მაშინ კოტე შარაშენიძემ გვითხრა, რომ არავინ არ იყო დანიშნული ვაკანტურ ადგილებზე. ჩვენს მიერ მოპოვებული ინფორმაციით გამგებლის მოვალეობის შემსრულებლის მოადგილედ, კოტე სარიშვილი სოფლის განვითარების დარგში 1 მარტს დაინიშნა, სწორედ ამ დღეს მოხდა კიდევ ერთი საკადრო ცვლილება, ზედამხედველობის სამსახურის უფროსად, გელა ჭანუყვაძის დანიშვნა. სანამ კოტე სარიშვილი ზემოთ აღნიშნულ თანამდებობას დაიკავებდა, სოფლის მეურნეობის განვითარების სამსახურის უფროსი იყო.
რაც შეეხება გელა ჭანუყვაძეს, გავრცელდა ხმა, რომ ის გამგებლის მოადგილედ ინიშნებოდა. ჩვენ 2 მარტს დავუკავშირდით მას და ეს ინფორმაცია უარყო, ისიც არ უთქვამს, რომ 1 მარტს უკვე ზედამხედველობის სამსახურის უფროსად იყო დანიშნული. გელა ჭანუყვაძე “ქართული ოცნება – დემოკრატიული საქართველოს” ოზურგეთის რაიონული ორგანიზაციის თავმჯდომარის, დავით დარჩიას მეგობარია. დავით დარჩიას თქმით, ის საკადრო ცვლილებებში არ ერევა. სანდო წყაროს ინფორმაციით, ამ ეტაპზე სწორედ კოტე შარაშენიძე და დათო დარჩია წყვეტს კადრების დანიშვნას. რაც შეეხება მესამე მოადგილის ადგილს, დღემდე ვაკანტურია და ზუსტად არ იციან, როდის დაინიშნება ახალი კადრი.
ნინო სალუქვაძის ინფორმაციით, ოზურგეთის მუნიციპალიტეტის გამგეობაში კიდევ ერთი საკადრო ცვლილება მოხდა. საფინანსო-საბიუჯეტო სამსახურის უფროსად, ალეკო ბერიძე დაინიშნა. “გურია ნიუსის” ინფორმაციით, ალეკო ბერიძე პირველი ოქტომბრის არჩევნების შემდეგ გადმოვიდა სამუშაოდ ოზურგეთში.
