მურთაზ ქვილითაია: _ 2012 წლამდე, აბაშის რაიონის სოფელ ტყვირში იყო ანასეულის კვლევითი ინსტიტუტის საცდელი მეურნეობა, რომელიც შემდეგ შპს “აგრომეტმა” დაიკავა. 1993 წლიდან მე იმ მეურნეობის დირექტორი ვიყავი, უხელფასოდ ვმუშაობდით და ყველაფერს ვაკეთებდით მეურნეობის შესანარჩუნებლად. ერთ დღეს დამირეკა ჩემთვის მანამდე უცნობმა მერაბ შურღაიამ და მითხრა, რომ მთელი ტერიტორია კახა ბენდუქიძემ შეიძინა და თქვენ განთავისუფლებულები ხართო. ამის მერე დამიბარეს თბილისში, აგრარულ უნივერსიტეტში, ლაშა გოცირიძესთან და მითხრეს, თუ მეურნეობაში არ მიხვალ და გაჩუმდები, ხელფასს მოგცემთო. ბევრი რამ არის გასარკვევი უნივერსიტეტში გოცირიძის რექტორობის დროს, ბენდუქიძე და გოცირიძე ერთი გუნდია.
– ვინ გითხრათ ეს ან რა ხელფასზე იყო საუბარი?
– ლაშა გოცირიძის კაბინეტში ვიყავით, საუბარს მერაბ შურღაიაც ესწრებოდა. ხელფასს სიჩუმის სანაცვლოდ მთავაზობდნენ, ოღონდ 30 სექტემბრის ჩათვლით, აჩევნებამდე.
– რა თანხაზე იყო საუბარი?
– 200 ლარი იქნება ხელფასიო. სამი თვის განმავლობაში 600 ლარი გამოდიოდა. ჩემი აზრით, ეს წინასაარჩევნო მოქრთამვა უფრო იყო, ხმაური რომ არ ამეტეხა და “ნაციონალური მოძრაობის” წინააღმდეგ არ წავსულიყავი. მე საკრებულოს წევრი და სოფლის დეპუტატი ვარ. რა თქმა უნდა, არ დავთანხმდი. მითხრეს, შენთვისვე აჯობებს, დაფიქრდეო. რა იყო აქ დასაფიქრებელი, როგორ უნდა გავჩუმებულიყავი, როცა ამხელა მეურნეობა ბენდუქიძემ აგრარულ უნივერსიტეტს გადასცა? გოცირიძეს ამას არავინ მიცემდა და არც კი იცის საერთოდ, სად არის მათ დაქვემდებარებაში არსებული ტერიტორია.
– თქვენ, როგორც მეურნეობის დირექტორმა, არ იცოდით, რომ ამ ტერიტორიის შესყიდვა მოხდა?
– მე კი არა, არავინ იცოდა, არც სოფლის და არც რაიონის ხელმძღვანელობამ. საერთოდ რა ხდება იქ, არც ამჟამინდელმა დირექტორმა იცის.
“გურია ნიუსი” სოფელ ტყვირის გამგებელს, კახა ცომაიას დაუკავშირდა.
კახა ცომაია: _ არანაირი შესყიდვა არ მომხდარა, თორემ აუცილებლად გვეცოდინებოდა. მოვიდნენ ვიღაც უცხო ადამიანები, დაიკავეს აღნიშნული მეურნეობა, ყოფილი თანამშრომლები დაითხოვეს და მხოლოდ ის გვითხრეს, რომ ახალი მფლობელი იყო “აგრომეტი” და ტერიტორია აგრარული უნივერსიტეტის მფლობელობაში გადავიდა. არც რაიონის საკრებულო და გამგეობა იყო საქმის კურსში. ჩვენი გულისტკივილი ისაა, რომ რატომ უნდა შემოვიდეს სხვა სოფლის ტერიტორიაზე. თუ დასაქმებაა, ადგილობრივები უნდა დასაქმდნენ პირველ რიგში. ახლა რომ უსმინო ახალ მფლობელებს, ამბობენ ყველაფერი გაჩანაგებული იყოო, აბა, ეს ამხელა ხეები, ნარგავები საიდან მოვიდა? ხალხის მოთხოვნა სწორედ ეს არის, დაუბრუნდეს სოფელს უკანონოდ გასხვისებული ტერიტორია. კახა ბენდუქიძეს მიწები აკლია, კიდევ რომ ართმევს ხალხს?
– ახლა ვინ არის მეურნეობის დირექტორი?
– მამუკა სახოკიაა. ისიც არ არის აბაშელი, სენაკიდან ჰყავთ მოყვანილი.
ჩვენ ადგილზე დავათვალიერეთ მეურნეობა და დირექტორს, მამუკა სახოკიას ვესაუბრეთ.
– ბატონო მამუკა, რამდენი ხანია აქ ხართ?
– უკვე მე-9 თვეა.
– მანამდე ვის ეკუთვნოდა მეურნეობა?
– ანასეულის კვლევითი ინსტიტუტის საცდელი მეურნეობა იყო, ახლა ჩემი პირადი უფროსი მერაბ შურღაიაა, ისე კი კახა ბენდუქიძის საკუთრებაა და აგრარული უნივერსიტეტის დაქვემდებარებაშია.
– რამდენად იქნა შესყიდული ტერიტორია და იხდით თუ არა გადასახადს ადგილობრივ ბიუჯეტში?
– არ ვიცი, რამდენად და ვის მიერ იქნა ტერიტორია შეძენილი. თანხა თვითონ მიაქვთ, რაიონის ბიუჯეტში არაფერს არ ვრიცხავთ. მე აქ ხელშეკრულებით ვარ. ხომ გითხარით, ჩემი პირადი უფროსი მერაბ შურღაიაა და ის უფრო გეტყვით.
“გურია ნიუსი” მერაბ შურღაიას ტელეფონით დაუკავშირდა. მისი განმარტებით, იგი “არა დირექტორი, არამედ ერთ-ერთი მენეჯერია, ტერიტორია სახელმწიფოს გადაწყვეტილებით გაიყიდა, თუმც იხდიან თუ არა მისი მეპატრონეები გადასახადებს, ეს მისთვისაც უცნობია.
ტყვირის მოსახლეობა კი კახა ბენდუქიძისგან აღნიშნული ტერიტორიის სოფლის საკუთრებაში გადაცემას მოითხოვს.
