ქ. მცხეთაში, სვეტიცხოვლის მიმდებარე ტერიტორია რომელიც მოიცავს 5066.00 კვ.მ (ხუთი ათას შვიდას კვ.მ-მდე) ფართობს და ასევე ქ. მცხეთაში, არსუკიძის ქუჩაზე 1093.00 კვ.მ. (ათას ოთხმოცდაცამეტი კვ.მ) ფართობს, არის შპს “ქვაჩის” საკუთრება.
აღნიშნული ტერიტორია არის სარეკრეაციო ზონა და არ ექვემდებარება გასხვისებას. მიუხედავად ამისა, ეს მიწის ნაკვეთები ჯერ გახდა სახელმწიფო საკუთრება, შემდეგ გადმოეცა მცხეთის მუნიციპალიტეტს, ამ უკანასკნელმა, საკრებულოს თავმჯდომარის დადგენილების საფუძველზე გადასცა შპს “ქვაჩის”. რომელმაც თავის მხრივ აღნიშნული ნაკვეთი იჯარით გადასცა შპს “მაგი სტილს”. მაგი სტილის მიერ იქნა ყველა სამუშაო შესრულებული.
მეწარმეთა და არასამეწარმეო (არაკომერციული) იურიდიული პირების რეესტრის ამონაწერიდან ირკვევა, რომ ამ ორივე სუბიექტის დამფუძნებლები არიან ერთიდაიგივე პიროვნებები.
ზემოაღნიშნულ ნაკვეთებზე 2010 წლიდან – მიმდინარეობდა უნებართვო და უპროექტო მშენებლობები. ამ მშენებლობებით მუნიციპალიტეტი 2012 წლის 29 ოქტომბრამდე არ დაინტერესებულა.
კვალის დაფარვის მიზნით 2012 წლის 29 ოქტომბერს მოხდა შპს “ქვაჩისათვის” ადმინისტრაციული ჯარიმის გამოწერა უნებართვო მშენებლობის გამო, 8000 (რვა ათასი) ლარის ოდენობით. აღნიშნული ჯარიმა ყოველგვარი პრეტენზიის და გასაჩივრების გარეშე გადახდილ იქნა 2012 წლის 2 ნოემბერს (ორ დღეში) რისი დამადასტურებელი მოწმობაც თან ერთვის აღნიშნულ საქმეს. ამ მაქინაციური სქემით მათ ავტომატურად უფლება მიეცათ შემდეგი 6 თვის განმავლობაში ისევ გაეგრძელებინათ უკანონო მშენებლობები.
შპს “ქვაჩის” 33-%-ანი წილის მფლობელი და შპს “მაგი სტილის” 33%-ანი წილის მფლობელი, რეგისტრირებული არიან ერთი და იგივე მისამართზე.
ამავე მისამართზეა რეგისტრირებული საქართველოს ეკონომიკისა და მდგრადი განვითარების ყოფილი მინისტრი ვერა ქობალია, რაც დამატებითი ეჭვის საფუძველს იძლევა.
სახელმწიფო საკუთრების მიტაცების ფაქტზე შემდეგი რეაგირებისათვის საქმე გადაეცემა საგამოძიებო ორგანოს, _ იუწყება მცხეთის მუნიციპალიტეტის გამგეობის პრესსამსახური
