სადაც აღნიშნა: “მე არასოდეს მითქვამს, რომ საქართველო იყო აგრესორი და ომი დაიწყო. ჩვენს ჯარს არ გადაუკვეთავს სხვა ქვეყნის საზღვარი და არ გადასულა სხვა ქვეყნის ტერიტორიაზე. სწორედ რუსეთმა დაარღვია სუვერენული სახელმწიფოს ტერიტორიული საზღვრები და განახორციელა აგრესია ჩვენი ქვეყნის წინააღმდეგ, რასაც ჩვენი ტერიტორიების ოკუპაცია მოჰყვა. მაგრამ, ამის მიუხედავად, ჩვენი ვალია, უპასუხოდ არ დარჩეს არც ერთი კითხვა, რომელიც აღელვებს ჩვენს საზოგადოებას. ჩვენ უნდა გამოვიძიოთ და დავადგინოთ სიმართლე, რაც დარწმუნებული ვარ, არავითარ შემთხვევაში არ დააზარალებს ჩვენი ქვეყნის იმიჯს და ვერაფერი შეეხება მის ტერიტორიულ მთლიანობას.”
ამ განცხადებას დიდი აჟიოტაჟი და გამოხმაურება მოჰყვა. “გურია ნიუსი” “ქართული დასის” ლიდერს, ჯონდი ბაღათურიას ესაუბრა აგვისტოს ომის ხელახალი გამოძიების შესახებ.
_ პრემიერის განცხადებას ყველამ სხვადასხვანაირი შეფასება მისცა, თქვენ რას ფიქრობთ ამ განცხადებაზე და აგვისტოს ომის მოვლენების ხელახლა გამოძიებაზე?
_ მე ყურადღებით მოვისმინე პრემიერმინისტრის განცხადება ამ საკითხზე. პირველი განცხადების მერე, სიმართლე გითხრათ, გამიჩნდა სურვილი, რომ ყოფილიყო დაზუსტება, რაც მეორე დღესვე მოხდა. მე მთლიანად ვეთანხმები პრემიერის განცხადების დაზუსტებულ ვარიანტს და შემიძლია ერთმნიშვნელოვნად ვთქვა, რომ ომი საქართველოს არ დაუწყია და აქ გამოსაძიებელი არის პრეზიდენტის და მისი “გენერლების” ლაჩრული გაქცევა, დაცვის ხაზის მოხსნა და ხალხის, განსაკუთრებით, ქალების, ბავშვების და მოხუცების დაუცველად დატოვება, რასაც მოჰყვა ბანდფორმირებების დაუსჯელი თარეში, ქალების გაუპატიურება, მოხუცების და მშვიდობიანი მოსახლეობის ძარცვა-რბევა და ხოცვა-ჟლეტა… სააკაშვილმა, როგორც მთავარსარდალმა, ლაჩრულად მიატოვა განსაცდელში მშვიდობიანი მოსახლეობა და თავის გარემოცვასთან ერთად გაიქცა საკუთარი ტყავის გადასარჩენად. ეს არის მძიმე დანაშაული. ყველას გვახსოვს წითელ ხიდზე ჩინოვნიკების სამარცხვინო რიგი, როცა ისინი გარბოდნენ თავის და ქონების გადასარჩენად აგვისტოს ომის დღეებში.
_ თუ ყველა ერთმნიშვნელოვნად თანხმდება, რომ ომი საქართველოს არ დაუწყია, მაშინ რატომ დადგა ამ თემის ხელახალი გამოძიების აუცილებლობა?
_ იმიტომ, რომ მთავარსარდლის და მისი გარემოცვის სამარცხვინო გაქცევა და კორუფცია, რაც ამ ომს მოჰყვა, არ გამოძიებულა. რაც შეეხება ომს, ეს ომი ჩვენ არ დაგვიწყია _ რუსეთმა ყველა საერთაშორისო სამართლის ნორმების დარღვევით დაარღვია საქართველოს საზღვარი და განახორციელა საქართველოს ტერიტორიის უკანონო დაკავება.
_ რას შეცვლის ეს გამოძიება რუსეთ-საქართველოს ურთიერთობაში?
_ ჩვენთვის შეცვლის იმას, რომ ლაჩრები, რომლებმაც ხალხი მიატოვეს სეპარატისტების საძარცვავად და დასახოცად, იქნებიან გასამართლებულნი! თუ ხარ მთავარსარდალი ან საერთოდ ხარ სამხედრო და ხელში იარაღი გიჭირავს, შენ უკვე ომობანას აღარ თამაშობ _ ვალდებული ხარ, თუნდაც საკუთარი სიცოცხლის ფასად დაიცვა საკუთარი სამშობლო, ხალხი და რომ გაქცევა ამ დროს არის დანაშაული! თუ ეს არ შეგიძლია, ნურც შენ იწვალებ და ნურც სხვას დაღლი შენი ენის ტლიკინით პატრიოტიზმზე. იცოდე, რომ ხარ ლაჩარი, იჯექი სახლში და დაელოდე ლოგინში სიკვდილს.
