2012 წელს კი, სოფლის რწმუნებულის ბახვა კვერღელიძის თქმით, 51 000 ლარი. როგორც სოფელ გურიანთის მცხოვრებლები “გურია ნიუსთან” აღნიშნავენ, სოფლის პროექტები არაკეთილსინდისიერად არის გახორციელებული, ფული არამიზნობრივად არის გახარჯული და სოფლის რწმუნებულის გათავისუფლებას მოითხოვენ. რწმუნებული ბახვა კვერღელიძე კი “გურია ნიუსთან” აცხადებს, რომ სოფელში ყველა სამუშაო კეთილსინდისიერად შესრულდა და ხალხის მოთხოვნა უსაფუძვლოა.
_ მოგმართავთ მთელი სოფლის მცხოვრებთა სახელით, რომ ის ხალხი, რომლებმაც ამ ორი წლის მანძილზე, სოფლის მხარდამჭერი პროგრამის თანხები არამიზნობრივად გახარჯა და სოფელში შესასრულებელი სამუშაოები არაკეთილსინდისიერად შეასრულა, არ გვინდა, წელსაც სოფლის პროგრამის გამხორციელებლები იყვნენ და ახალი პროექტების თანხები მათ განკარგონ. ვითხოვთ რწმუნებულის შეცვლას. ეს აუცილებელია.
ადამიანს, რომელიც პასუხს ვერაფერზე ვერ გვცემს, სადამდე ვუყუროთ? მოვიდეს ისეთი, ვინც სოფლის სამუშაოებს უზრუნველყოფს, _ აცხადებენ “გურია ნიუსთან” ოზურგეთის მუნიციპალიტეტის სოფელ გურიანთის მცხოვრებლები.
ნანა ტოტოჩავა, გურიანთის მცხოვრები: “2011- 2012 წლების განმავლობაში, სოფელ გურიანთაში 92 000 ლარი იყო გამოყოფილი, გვაინტერესებს ინფორმაცია უშუალოდ გურიანთაში ახალი სასაფლაოს მოწყობის შესახებ, რომელიც შარშან გააკეთეს სოფლის მხარდამჭერი პროგრამით გამოყოფილი თანხებით. ჟანგიანი მავთულით ნახევრადაა შეღობილი, 4380 ლარია გაწერილი და თქვენ თვითონ ხედავთ, რა მდგომარეობაშია. ეს არის დაუსრულებელი და ის თანხა, რომელსაც ასახელებენ _ თითქოს 4000 ლარი ამ სასაფლაოს მოწყობაზეა დახარჯული, გაწერილია ძალიან ბევრი და დახარჯულია ცოტა. ამ სასაფლაოზე დადიან ღორები, რაც ძალიან გვაწუხებს. ამ დღეებში სოფელში შეხვედრა იყო და ამოვიდა ოზურგეთის მუნიციპალიტეტის გამგებელი კოტე შარაშენიძე. მაშინ მოვითხოვეთ და დავაყენეთ ეს საკითხი, რაზედაც პასუხი ვერ მივიღე. ღორები რომ შემოდის სასაფლაოზე, რა ვქნათ? ღობეს ჩვენი სახსრებით ვერ ვაკეთებთ. ეს მიწა, რომელიც სასაფლაოზეა დაყრილი, ამბობენ, რომ სოფელში გადმორიცხული ფულით გაკეთდაო, მოიმიზეზა. სინამდვილეში ეს მიწა, წინა საარჩევნოდ გაზი როცა შემოჰყავდათ სოფელში, მაშინ დაყარეს. ამასაც იტყუებიან. მოვითხოვთ პასუხი აგონ იმ პროექტებზე, რაც სოფელში ვითომ გახორციელდა. ჩვენი სოფლის დეპუტატი მერაბ მჟავია მხოლოდ დაპირებებით გვიშორებს, _ ყველაფერი კარგად იქნებაო, ეგაა მისი სიტყვები. ხალხის გამკითხავი არავინაა და არც იქნება. ნახეთ, ზედმეტი თანხები აქვთ გაწერილი. სანიაღვრე არხები გაკეთდაო, რომ ამბობენ, შეგიძლიათ შეამოწმოთ, როგორი გაკეთებულია და სინამდვილეში არცაა, ფაქტობრივად, გაკეთებული. გააკეთეს მოსაცდელი და 3000 ლარია დახარჯულიო, იძახიან. გაკეთდა სკოლის ეზოში ჭა, 2 000 ლარად და ისიც მხოლოდ სანახევროდ. ზოგიერთი ჩამონათვალი ვნახეთ ოფიციალურ სიაში, საერთოდ რომ არაა ხსენებაში, არც კი დაუწყიათ კეთება.
ყველაზე უფრო გვაინტერესებს, სასაფლაოს რა ეშველება. გამოიძიონ კომპეტენტურმა ორგანოებმა ამის შესახებ.”
ოზურგეთის მუნიციპალიტეტის სოფელ გურიანთის რწმუნებული ბახვა კვერღელიძე “გურია ნიუსთან” ამბობს, რომ 2012 წელს სოფლის მხარდამჭერი პროგრამის ფარგლებში 51 000 ლარი იყო გამოყოფილი.
_ ბატონო ბახვა, რამდენი ათასი ლარი იყო გამოყოფილი კონკრეტულად ერთ-ერთი პრიორიტეტის შესრულებისთვის, ეს ეხება ე.წ. “კახურის” მიმდებარე ტერიტორიაზე სასაფლაოს კეთილმოწყობას.
_ 4 3 80 ლარი.
_ ჩვენ შეწუხებულმა მოსახლეობამ მოგვმართა, რომ სასაფლაოზე პირუტყვი შედის, გამოყოფილი თანხები არამიზნობრივად არის გახარჯული. შეღობილია ჟანგიანი მავთულით, ჯებირი არ არის ჩასხმული კაპიტალურად, ეს ჩვენი თვალითაც ვნახეთ.
_ სასაფლაოს ზედა მხარის შეღობვა თავიდან არ იყო გათვალისწინებული ამ თანხებით. აქ სხვა საკითხია. კერძო მესაკუთრეს იქ მდებარე ჩაის ფართობი უნდა შეესყიდა და მიწა დაერეგისტრირებინა, თუმცა, ვერ მოაწესრიგა ეს საბუთები და ამიტომ დარჩა ეს საკითხი მაშინ მოუგვარებელი. ნაცვლად ამისა, რომ სასაფლაო შევიწროვებულ ფარგლებში იყო, ერთი იმდენით გავაგრძელეთ სხვა მხარეს. შეიცვალა ბოძები, ჭიშკარი, ჩაისხა ფუნდამენტი, სამრიგად გაიჭიმა მავთული და ასევე გაიბა მავთულბადე. შიგნით არსებული ძველი ჟანგიანი მავთული, რაზეც მოსახლეობა ამახვილებს ყურადღებას, მოვხსენით და გადავიტანეთ თავში. მე თვითონ მყავს სამი მიცვალებული იქ დასაფლავებული და ჩემი ინტერესიცაა, რომ აღნიშნული სასაფლაო იყოს დაცული. მე დარწმუნებით შემიძლია გითხრათ, რომ თანხების არამიზნობრიობას აქ ადგილი არ ჰქონია.
_ ბატონო ბახვა, რას გვეტყვით, საერთოდ, სოფელში შესასრულებული სამუშაოების შესახებ, აცხადებენ, რომ არამიზნობრივად არის გახარჯული.
_ პირიქით, ყველაფერი არის მიზნობრივად გახარჯული და ეს შეუძლია, შესაბამისმა ორგანოებმა შეამოწმონ. ამასთან დაკავშირებით, პროკურატურაში არის შესული განცხადებები და გამოძიება დაინტერესებულია. ყველანაირი მონაცემი გვაქვს ჩვენ. მე ვამოწმებ ვარგისიანობას, შესრულებულ სამუშაოს და მის მდგომარეობას, ფინანსებთან არანაირ კავშირში არ ვარ.
_ მოსახლეობას პრეტენზია აქვს თქვენთან დაკავშირებით, მოითხოვენ, რომ დატოვოთ თანამდებობა…
_ ჩემი მუშაობის პერიოდში, მე სოფლისთვის ცუდი არაფერი გამიკეთებია, ვასრულებდი და ვასრულებ ჩემს მოვალეობას ისე, როგორც მოითხოვდა საერთო საქმე, ვემსახურებოდი ხალხს. ასე რომ, ასეთი პრეტენზიები ჩემს მიმართ უსაფუძვლოა.
სტატიები მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას
