“ის ყველაზე ეფექტური მინისტრი იყო, რამდენჯერ დაურეკავს დილის 5 საათზე, 6 საათზე, რომ ახალი ანძა დავაყენეთ, ეს გავაკეთეთ, ის გავაკეთეთ, 5 სართული დავადგით, ოთხი კილომეტრი დავამატეთ, ასეთი ხალხი საძებარია… რაც ორდენები არსებობს ყველა მიცემული მაქვს მისთვის, აღარ ვიცი ახლა, კიდე რა შეიძლება მივცე…” _ განაცხადა პრეზიდენტმა სოფელ შემოქმედში სტუმრობისას, გასული წლის სექტემბერში.
_ ეს გზა რამაზმა გააკეთა; ეს კაცი, რამაზ ნიკოლაიშვილია, რომელმაც გულის 4 ოპერაცია გაიკეთა უკვე _ მესამე გულის ოპერაცია რომ გაიკეთა, ამის გარეშე წავედი რიკოთის გვირაბის გასახსნელად და მარტომ გავიარე რიკოთის გვირაბი, გავიხედე, უკან მოვიხედე და ვიღაცა უკან მომდევს, კრეისერული სიჩქარით, გავიხედე ვინ არის და საწოლიდან ამდგარი გადაბინტული რამაზი, გულის ოპერაციიდან მოვიდა მშენებლობაზე! აი, ესეთი ხალხი ბევრი არა გვყავს. ეს არის ყველაზე საუკეთესო, მიბაძეთ, მეც ვბაძავ და ვსწავლობ რამაზისგან “ _ ეს სიტყვებიც პრეზიდენტ სააკაშვილს ეკუთვნის..
დღეს, გურიაში (და არა მარტო გურიაში. ავტ) აქტიურად საუბრობენ იმაზე, რომ შესაშური კოაბიტაცია შედგა “ქართულ ოცნებასა“ და რამაზ ნიკოლაიშვილს შორის. მიუხედავად იმისა, რომ არჩევნებამდე მასზე არაერთი პრეტენზია გამოითქმოდა მაშინდელი ოპოზიციის ანუ “ქართული ოცნების” მხრიდან, დღეს მის არსებობას არც კი ახსენებენ. უფრო მეტიც, მიუხედავად რეგინული განვითარების მინისტრის დავით ნარმანიას მიერ გაკეთებული არაერთი მწვავე განცხადებისა, რომელიც სწორედ რამაზ ნიკოლაიშვილის დროინდელ დარღვევებს ეხებოდა, “გურია ნიუსის” ცნობით, ყოფილი მინისტრი დაკითხვაზეც კი არავის დაუბარებია.
არადა, ოქტომბრის საპარლამენტო არჩევნებამდე რამაზ ნიკოლაიშვილის უშუალო მითითებით, ლამის “ტერორი” ხორციელდებოდა “ქართული ოცნების” მხარდამჭერთა მიმართ და ამის დამადასტურებელი არაერთი მასალა მოიპოვება მოიპოვება “გურია ნიუსის” არქივში.
ორი თვის წინ რეგიონული განვითარებისა და ინფრასტრუქტურის მინისტრი დავით ნარმანია “გურია ნიუსთან” ინტერვიუში აცხადებდა, რომ რამაზ ნიკოლაიშვილის პერიოდთან დაკავშირებით, სამინისტროს აუდიტის სამსახურს “ზღვა მასალა“ აქვს, რომელთაგან ნაწილი არის ინფრასტრუქტურული პროექტების გახორციელებასთან დაკავშირებით, ეს გახლავთ “ნიუ ენერჯი.“
“ჩვენ 800-მდე გვერდი კონკრეტული დოკუმენტაცია გადავაგზავნეთ ამ კომპანიასა და მის პროექტებზე. ნაწილი ფინანსთა სამინისტროს საგამოძიებო სამსახურს გადაეცა, ნაწილი კი _ პროკურატურას“. _ აცხადებდა დავით ნარმანია.
რეგიონული განვითარების და ინფრასტრუქტურის სამინისტროს ხელმძღვანელობის განცხადებით, ყოფილი მინისტრის, რამაზ ნიკოლაიშვილის პერიოდში სამინისტრომ სახელმწიფო 10 მილიონით აზარალა.
კონკრეტულად, საუბარია თბილისი-სენაკი-ლესელიძის საავტომობილო გზის და თელავის ქუჩების გარეგანათებაზე.
ტენდერებში სახელმწიფო არარეალურად გაზრდილ ფასებს იხდიდა. მინისტრმა დავით ნარმანიამ ფინანსთა სამინისტროს საგამოძიებო სამსახურს 13 საქმე გადასცა შესასწავლად.
მაშინ, “გურია ნიუსი“ რამაზ ნიკოლაიშვილს დაუკავშირდა, რომელმაც ამ განცხადებასთან დაკავშირებით კომენტარი გააკეთა.
_ რა ვიცი, აბა, 10 მილიონის გაფლანგვა ადვილი არ არის და ჩემი აზრით, ყველაფერი გაირკვევა. ეგრე არ არის რა! როცა გაირკვევა, მიხვდებით რომ ეგრე არ არის, ამდენი ლარის გაფლანგვა შეუძლებელია.
იყო თუ არა, ან რატომ არ იყო მიხეილ სააკაშვილის ფავორიტი მინისტრი “ნაციონალური მოძრაობის” მიერ დაგეგმილ 19 აპრილის აქციაზე და როგორ მოახერხა მან “ქართულ ოცნებასთან” კოაბიტაცია, ამასთან დაკავშირებით, თავად რამაზ ნიკოლაიშვილიგან გვინდოდა პასუხი მიგვეღო.
თავდაპირველად მან ჩვენს სატელეფონო ზარს უპასუხა, შემდეგ კი მიუხედავად ჩვენი მრავალგზის მცდელობისა, ყურმილი აღარ აიღო. ამის შემდეგ გავუგზავნეთ სატელეფონო შეტყობინება, სადაც ვწერდით, რომ თუ დღის განმავლობაში არ გვიპასუხებდა, მასალას მისი კომენტარის გარეშე გავუშვებდით.
აქედან რამდენიმე წუთში დაგვიკავშირდა გურიის ვიცე-გუბერნატორი ლელა თავართქილაძე და გვითხრა, რომ ბატონ რამაზს მამა ჰყავს ძალიან ცუდად და მას თხოვა, დაგვკავშირებოდა და გაერკვია, რასთან დაკავშირებით გვქონდა კითხვა
ქალბატონ ლელას ვკითხეთ, შეეძლო თუ არა მას რამაზ ნიკოლაიშვილის მაგივრად პასუხის გაცემა, რაზეც, რა თქმა უნდა უარით გვიპასუხა.
_ ქალბატონო ლელა, გვაინტერესებს იყო თუ არა ბატონი რამაზ ნიკოლაიშვილი აქციაზე და თუ არ იყო, რატომ?
_ კარგით, გადავცემ ბატონ რამაზს და დაგიკავშირდებით.
რამდენიმე წუთში ლელა თავართქილაძე ისევ დაგვიკავშირდა:
_ მოკლედ, შევთანხმდით, თუ თვითონ შეძლებს დარეკვას, დაგირეკავს, თუ არადა, მაშინ გექნება ყველანაირი უფლება, მორალურიც, რომ გაუშვა მასალა უკომენტაროდ, _ გვითხრა თავართქილაძემ.
გურიის გუბერნიაში საზოგადოებასთან და მედიასთან ურთიერთობა, ვიცე-გუბერნატორ ლელა თავართქილაძეს ევალება, რასაც მოწმობს გუბერნატორის მიერ ჩვენს სახელზე მოწერილი ოფიციალური წერილიც, თუმცა ამ წერილში არაფერია ნათქვამი იმაზე, რომ მას რამაზ ნიკოლაიშვილის პრესსამსახურის უფროსობაც ჰქონდა შეთავსებული…
