ოზურგეთის გამგებელი: “დადონ ფაქტები და მზად ვარ, ნებისმიერ ბრალდებას ვუპასუხო!”

ამ ულტიმატუმებს ულტიმატუმითვე პასუხობს შარაშენიძე, რომელიც ადგილობრივ მედია წარმომადგენლებს მოუწოდებს, რომ აქციის იმ მონაწილეების  წარსული ცხოვრებით დაინტერესდნენ, ვინც მას რაიონის სირცხვილს უწოდებს. ორი დღის წინ  კი, როგორც აქციის მონაწილეებმა მედია საშუალებებს განუცხადეს, კოტე შარაშენიძემ პლაკატები ჩამოხია და მათ სიტყვიერი შეურაცხყოფა მიაყენა. ამ განცხადებას პასუხობს გამგებელი, რომელიც აღნიშნავს, რომ არცერთი მათგანისთვის არანაირი სიტყვიერი შეურაცხყოფა არ მიუყენებია, თუმცა პლაკატის ჩამოხევას არ უარყოფს და აღნიშნულ ფაქტს ასე ხსნის: “ადმინისტრაციულ შენობაზე ნებართვის გარეშე თვითნაკეთი პლაკატების და სიმბოლიკების გაკვრა არის უკანონო, რაც შეეხება შეურაცხყოფას, არცერთი მათგანისთვის არავითარი სიტყვიერი შეურაცხყოფა არ მიმიყენებია, _ ამბობს შარაშენიძე.

_ აქცია მხოლოდ რამდენიმე მოქალაქისაგან შედგება და ბუნებრივია მიჩნდება კითხვა – ჩემი, როგორც გამგებლად ყოფნა -არყოფნის საკითხი მხოლოდ ამ ადამიანების გადასაწყვეტია? სად არიან და თუ არიან, მაშინ რატომ არ უერთდებიან მათ ჩემი საქმიანობით უკმაყოფილო სხვა ადამიანები? აქციის მონაწილეებს მოვუწოდებ, რომ შეეშვან უსაფუძვლო ბრალდებებს და იმით დაინტერესდნენ, თუ რა გაკეთდა მუნიციპალიტეტისათვის მთელი ამ შვიდი თვის განმავლობაში.

უარგუმენტო და არადამაჯერებელია ამ ადამიანებისაგან იმაზე საუბარი, რომ თითქოს მე ოზურგეთის სირცხვილი ვარ.

_ბატონო კოტე, თქვენს მიერ სოციალურ ქსელში გავრცელებულ განცხადებაში ნათქვამია:  “მოვუწოდებ ადგილობრივ მედია საშუალებებს, აქციის მონაწილეების წარსული ცხოვრებით დაინტერესდნენ“. ვის და რას გულისხმობთ?

_ ვგულისხმობ თითოეული მათგანის პოლიტიკურ წარსულს. ვერცერთმა მათგანმა ვერ დაიმკვიდრა სახელი ვერცერთ პარტიაში, არიან გაბოროტებულები და რატომღაც ჩემსკენ იშვერენ თითს, თითქოს მათი მარცხი ჩემი ბრალია. კონკრეტულად კი ვგულისხმობ ბატონ ნუგზარ გიორგაძეს, ქალბატონ ლელა ნაცვალაძეს და დიმიტრი კვერღელიძეს, დაინტერესდით მათი  პოლიტიკური თუ ისე, ცხოვრებისეული წარსულით, რა გაუკეთებიათ ამდენი ხნის განმავლობაში, იცით? დავიწყებ ლელა ნაცვალაძით, _ პარტია “მოქალაქეთა კავშირი”, “ნაციონალური მოძრაობა”, “კონსერვატორები”, “ნოღაიდელის პარტია”, “გაერთიანებული ოპოზიცია”, “სახალხო კრება”.  ქალმა, რომელსაც  ამდენი პარტია აქვს გამოცვლილი,  ვერ დაიმკვიდრა თავისი ადგილი და ახლა მიტმასნილია “ქართულ ოცნებას“. რა უნდა საერთოდ,  ვინ ეკითხება , რა უფლებით საუბრობს ჩემზე? იგივეს გეტყვით დიმიტრი კვერღელიძის შესახებ, ვინ იყო დიმიტრი კვერღელიძე არჩევნებამდე, იცნობდა ვინმე? დამისახელოს იმ აქციის მონაწილეებმა,  არჩევნებამდე თუ უნახავს თვალად ვინმეს ეგ ადამიანი, რა გაუკეთებია “ქართული ოცნებისთვის”, სად იყო აქამდე, ახლა რომ მოაქვს თავი “ქართული ოცნების” მხარდამჭერად?

პირდაპირ  გეტყვით,  უხეშად ერევა კოალიციის საქმიანობაში, მას არანაირი უფლება არ აქვს ამის. იცით რამე მისი საქმიანობის შესახებ? სწორედ მისი და ლელა ნაცვალაძის ინტრიგნობით ხდება კოალიციაში განხეთქილებები. თქვენი გაზეთის საშუალებით მინდა მივმართო აქციის მონაწილეებს, თქვან დიმა კვერღელიძე ერთხელაც თუ ჰყავთ ნანახი აქამდე? ან რატომ არ უერთდება მათ? მაინტერესებს პასუხი ჩემი თანამებრძოლებიდან ამ ყველაფერზე..

_ თუმცა, დიმიტრი კვერღელიძეს ღიად უჭერს მხარს ოზურგეთის მაჟორიტარი დეპუტატი, ზვიად კვაჭანტირაძე…

_ეს არის ფორმალური ყველაფერი.  ეს დეპუტატის პრობლემაა, ყველა ნორმალურმა, განათლებულმა ადამიანმა იცის დიმიტრი კვერღელიძის საქმიანობის შესახებ და ასევე იციან ჩემი… ჰკითხეთ ზვიად კვაჭანტირაძეს, მის გამარჯვებაში რა როლი ითამაშა დიმიტრი კვერღელიძემ.

_ კვერღელიძემ საკმაოდ ხმაურიანი განცხადება გააკეთა საკრებულოს სხდომის დასრულების შემდეგ: “გპირდებით კონსტანტინე შარაშენიძეს რამდენიმე დღეში დავატოვებინებ  “ქართულ ოცნებას” და მას პარტიიდან მალე გარიცხავენ”… რამდენად შესაძლებელია,  რომ თქვენ დატოვოთ “ქართული ოცნება”?

_ არანაირი მექანიზმი და საფუძველი არ არსებობს იმისა, რომ მე ვინმეს განცხადების საფუძველზე დავტოვო პარტია, ამის ილუზია ნურავის  ექნება.  ეს განცხადება არის დიმა კვერღელიძის დიდი პოლიტიკური შეცდომა და არა მარტო ეს, ისიც რასაც სხდომამდე აკეთებდა ჩემი მისამართით.  მინდა დავამშვიდო საზოგადოება, რომ მე წარმოვადგენ “ქართულ ოცნებას” და ვიქნები მუდამ.

_ რას გვეტყვით იმ ბრალდებებზე, რომ გარიგებაში ხართ “ნაციონალურ მოძრაობასთან” და საკრებულოს დეპუტატებზე ზეწოლას ახორციელებდით, რათა  თქვენთვის სასურველი კანდიდატისთვის მიეცათ ხმა?

_ მოდით, გეტყვით, ამ დეპუტატებმა ერთხმად დამიჭირეს მხარი გამგებლის პოსტზე, მათ მე ნდობა გამომიცხადეს. ჯერ ერთი, ვინც არ უნდა ყოფილიყო ჩემს ადგილას,  ის გამგებელი არ იქნებოდა “ნაციონალების” მიერ არჩეული? ან იგივე პროცესი არ ხდებოდა საკრებულოს თავმჯდომარის არჩევნებში?  თუ დიმა გავიდოდა, მაშინ ვის მიერ არჩეული იქნებოდა? ან თუ “ნაციონალები”  არიან ეს დეპუტატები და  ძალიან ცუდები არიან, რატომ თხოვდა ზვიად კვაჭანტირაძე მათ მხარდაჭერას? რატომ მოაწყო მან რამდენიმე შეხვედრა დეპუტატებთან დიმიტრი კვერღელიძის მხარდასაჭერად? ეს ის დეპუტატები არ არიან? და მე მოვახდინე ზეწოლა მათზე?  დადონ ერთი ფაქტი იმ ბრალდებებისა რასაც აცხადებენ,  ეს ყველაფერი აბსურდის თეატრია,  განაწყენებული ადამიანების უარგუმენტო  ბრალდებები.

_პირდაპირ გკითხავთ, რა ძალით და მექანიზმით მიაღწიეთ გამარჯვებას?

_ გეტყვით მეც პირდაპირ, აქ არის ელემენტარული რამ. ეს ყველაფერი დიმიტრი  კვერღელიძის პიროვნული თვისებების გამო მოხდა.  ადამიანი, რომელიც ამდენი ხნის განმავლობაში ემუქრებოდა დეპუტატებს, რომ დაიჭერდა, შევიდოდა  პროკურატურა ყველა სოფელში… იგივე ალეკო მამეშვილს დაემუქრა, რომ მის შესახებ იცოდა რაღაც და თუ არ გადადგებოდა, მაშინ იტყოდა ამის შესახებ, აყენებდა დეპუტატებს სიტყვიერ შეურაცხყოფას, რომ ისინი იყვნენ “ნაციონალები”, რომლებსაც მერე თავად თხოვდა მხარდაჭერას, რა იცის დიმა კვერღლიძემ?  ესე  იგი იცის რაიმე კონკრეტული დანაშაულის შესახებ და მისი არჩევის შემთხვევაში ამის შესახებ არ განაცხადებდა? მალავს დანაშულს?  მარტივად მოხდა ყველაფერი. დეპუტატებმა გადაწყვეტილება თავად მიიღეს, კვერღელიძემ  ვერ დაიმსახურა დეპუტატების პატივისცემა და სიყვარული, რომლებზეც ყველანაირი მექანიზმით ცდილობდა ზეწოლა განეხორციელებინა იმისთვის,  რომ გამხდარიყო თავმჯდომარე.  სიტყვა “ზეწოლა” ეს არის ლელა ნაცვალაძის და დიმა კვერღელიძის საყვარელი სიტყვა.

საკრებულოში სულ 5 წევრია “ნაციონალური მოძრაობის” და გეტყვით ერთს. ზვიად კვაჭანტირაძე სხდომის დროს ნახევარი საათი ესაუბრებოდა მიხეილ გოგოტიშვილს, ამით რატომ არ დაინტერესდით?

_ლელა ნაცვალაძემ გამგეობის წინ გამართულ პრესკონფერენციაზე განაცხადა, რომ თქვენ სამსახურში  იარაღით დადიხართ.

_ ეს ქალბატონ ლელა ნაცვალაძეს უნდა, რომ იარაღით ვიარო. დადონ ფაქტი, ფაქტებით ვისაუბროთ..

_ იარაღით არ დადიხართ?

_ არა..

_ბატონო კოტე, როგორ შეიძლება განვითარდეს მოვლენები. რა შემთხვევაში შეიძლება გადადგეს კოტე შარაშენიძე, ან გაათავისუფლონ?

_ უნდა დავუშვა შეცდომა, რასაც ნამდვილად არ ვაპირებ. ნებისმიერი შეცდომა კანონით დასჯადია.  აქციის მონაწილეების მოთხოვნით ნამდვილად შეუძლებელია გადადგეს გამგებელი. მათ აქვთ უფლება ჩემი ნებისმიერი დანაშაული დაამტკიცონ ფაქტებით. დადონ ფაქტები და  მე მზად ვარ, ნებისმიერი ადამიანის ბრალდებას ვუპასუხო.

_ ბატონო კოტე, გქონიათ თუ არა საკრებულოს სხდომის შემდეგ ზვიად კვაჭანტირაძესთან რაიმე სახის ურთიერთობა?

_არანაირი ურთიერთობა არ მქონია, არც სატელეფონო, არ შემომხმიანებია… თუმცა მე არ ვარ დაინტერესებული სიტუაციის დამძიმებით.