შეგახსენებთ, რომ საზოგადოებრივი საბჭოს წევრების ვინაობა გუშინ გახდა ცნობილი. იგი 12 წევრისგან შედგება. კომისიაში არიან – სოსო ცისკარიშვილი, ლია მუხაშავრია, უმარ იდიგოვი, ზაურ გუმაშვილი, ხასო ხანგოშვილი, მორატ ქავთარაშვილი, ვახტანგ მაისაია, კახა კახიშვილი, მამუკა არეშიძე, თამარ გაბისონია და გელა ნიკოლაიშვილი. საბჭოსა და საკონსტულაციო ჯგუფს ხელმძღვანელობას და კორდინაციას თვითონ ნანუაშვილი გაუწევს.
საბჭოს საქმიანობაში მონაწილეობას მიიღებენ პანკისის ხეობის უხუცესთა საბჭოს წარმომადგენლები და სამოქალაქო საზოგადოების აქტიური სხვადასხვა სპეციალობის პირები, რომლებიც არ არიან არც ერთი პოლიტიკური გაერთიანების წევრები.
“ხაზგასმით უნდა აღინიშნოს, რომ საბჭო არ წარმოადგენს ალტერნატიულ საგამოძოებო უწყებას და პირიქით, ხელს შეუწყობს გამოძიების ყოველმხრივ ეფექტურად და გამჭვირვალედ წარმართავს”, _ განაცხადა უჩა ნანუაშვილმა.
აღსანიშნავია, რომ გამოძიებაში მონაწილეობის მიღებაზე უარი განაცხადეს არასამთავრობო ორგანიზაციებმა “საერთაშორისო გამჭვირვალობა-საქართველო” და ახალგაზრდა იურისტთა ასოციაციამ.
სახალხო დამცველის აპარატთან საზოგადოებრივი საბჭოს შექმნას გამოეხმაურა შს მინისტრი ირაკლი ღარიბაშვილი და აღნიშნა, რომ ლაფანყურის სპეცოპერაციის შემსწავლელი საზოგადოებრივი კომისიის ეფექტურობაში ეჭვი ეპარება.
“მათ ჰქონდათ უფლება რომ შეექმნათ კომისია, მაგრამ მე ვფიქრობ, ის არ იქნება ეფექტური”, _ განაცხადა ღარიბაშვილმა.
მისივე განმარტებით, შსს-ის მიერ აღნიშნულ საკითხზე გამოძიება ძალიან ეფექტურად მიმდინარეობს.
“გამოძიებას ძალიან მალე დავასრულებთ და ჩვენ პასუხს გავცემთ ყველა კითხვას”, _ აღნიშნა შს მინისტრმა.
საზოგადოებრივი საბჭოს წევრი გელა ნიკოლაიშვილი “გურია ნიუსთან” საუბრისას ამბობს, რომ თუ შს მინისტრი წინასწარ ასეთ განწყობას შეიქმნის და კომისიასთან არ ითანამშრომლებს, რა თქმა უნდა, ისინი გამოძიებას ეფექტურად ვერ წარმართავენ.
“თუ ირაკლი ღარიბაშვილისა და ზოგადად სახელმწიფო უწყებების განწყობა იქნება ისეთი, რომ ეს კომისია ვერაფერს რეალურს ვერ გამოიძიებს და ჩვენთან არ ითანამშრომლებენ, რა თქმა უნდა, ეფექტური არ იქნება. იმედი მაქვს, რომ ჩვენ რაღაცას შევძენთ შსს-ს საგამოძიებო ჯგუფს და ისინიც თავის მხრივ რა დოზითაც შესაძლებელია, ინფორმაციას არ დაგვიმალავენ.
მიმაჩნია. რომ ესაა საზოგადოებისთვის საინტერესო საერთო საქმე. ვფიქრობ, ნდობის თვალსაზრისით საზოგადოებრივი ჯგუფი უფრო მეტს იმსახურებს. განა იმიტომ, რომ შინაგან საქმეთა სამინისტრო ცუდი უწყებაა, უბრალოდ სახელმწიფო სტრუქტურები ინფორმაციის დამალვისკენაა მიმართული.
თუ იქნება კეთილგანწყობა ჩვენს და ამ უწყებას შორის, ვფქრობ, მთლაინობაში გამოძიება შედეგიანი და ეფექტური იქნება. ერთმანეთს უნდა დავეხმაროთ და ერთმანეთის ინფორმაციები უდნა შევავსოთ”, _ უთხრა “გურია ნიუსს” ნიკოლაიშვილმა.
თუმცა, განსხვავებული მოსაზრება აქვს იურისტ პაატა შავაძეს, რომელიც აღნიშნავს, რომ საზოგადოებრივი საბჭოს შექმნით, სახალხო დამცველმა თამაში დაიწყო.
“როგორც კი გავიგე რომ ასეთი კომისია შეიქმნა, ვიფიქრე, რომ სახალხო დამცველმა თამაში დაიწყო. ესაა გამოძიების ფუნქციებში უხეში ჩარევა. მინისტრი ვერანაირად ვერ ითანამშრომლებს ვერცერთ ასეთ კომისიასთან, რადგან გამოძიება ისეთი რამეა, რომელსაც აქვს საიდუმლოებები. ისეთი მოქმედებები ტარდება, რაც ყველამ არ უნდა იცოდეს. გამოძიება ამ კომისიას ვერ მიაწვდის ისეთ მასალებ, რაც უშუალოდ გამოძიებისთვის უნდა იყოს ცნობილი. ვფიქრობ, ეს კომისი ეფექტური ვერ იქნება და შედეგსაც ვერ მოგვიტანს”, _ ამბობს შავაძე.
მისივე თქმით, არაა გამორიცხული უჩა ნანუაშვილსა და შს მინსიტრს შორის რაიმე სახის უთანხმოება არსებობდეს.
“ვფიქრობ, რომ თავისთავად ასეთი საბჭოს შექმნა, ღარიბაშვილსა და ნანუაშვილს შორის უთანხმოებაზე მიგვანიშნებს. ასეთი დისონანსი მათ შორის არ უნდა არსებობდეს. სახალხო დამცველს აქვს თავისი ბევრი ფუნქცია და მან ეს უნდა შეასრულოს. შსს არის სამართალდამცავი ორგანო და ასეთი საკითხები მან უნდა გამოიძიოს. ვფიქრობ, ნანუაშვილი კანონით გათვალისწინებულ თავის მოვალეობებს ცოტა აჭარბებს”, _ უთხრა “გურია ნიუსს” შავაძემ.
