“ნაციონალების” განცხადების პროექტს მხოლოდ 18 დეპუტატმა დაუჭირა მხარი, 31-მა კი პროექტის წინააღმდეგ მისცა ხმა.
უმცირესობის განცხადების პროექტში ძირითადად საუბარი უკრაინის მოვლენებთან დაკავშირებით იყო. მასში გამოთქმულია სრული მხარდაჭერა უკრაინელი ხალხისა და უკრაინის სუვერენიტეტის მიმართ, რაც გულისხმობს, საგარეო პოლიტიკის უკრაინის ინტერესების შესაბამისად წარმოებას.
პროექტში ასევე აღნიშნულია, რომ უკრაინის თავისუფალი ერების ევროპული ოჯახისკენ სვლის შეჩერება შეუძლებელია. ყოველგვარი ძალისხმევა, რომელიც მიმართულია უკრაინის ევროპული ინტეგრაციის შესაფერხებლად, თავისუფლების წინააღმდეგ არის მიმართული.
უმცირესობის პროექტში გამოთქმულია შეშფოთება უკრაინის მიერ ევროპის კავშირთან ასოცირების ხელშეკრულების ხელმოწერაზე უარის თქმის მიზნით, რუსეთის ფედერაციის მიერ უკრაინის ხელისუფლებაზე ბოლო თვეების განმავლობაში განხორციელებული პოლიტიკური და ეკონომიკური ზეწოლისა და შანტაჟის გამო.
პროექტში გამოთქმულია იმედი, რომ მოხერხდება არსებული წინააღმდეგობების გადალახვა. უკრაინის მთავრობა არ დაექვემდებარება რუსეთის ფედერაციის შანტაჟს და არ გადაუხვევს ევროპული ინტეგრაციის გზას.
უმრავლესობამ და უმცირესობამ ევროინტეგრაციის თემასთან დაკავშირებით ცალ-ცალკე განცხადების პროექტები მას შემდეგ წარადგინა, რაც მათ შორის განცხადების პროექტზე შეჯერება ვერ მოხერხდა. მმართველი გუნდისთვის ოპოზიციის მიერ შემუშავებული განცხადების პროექტის შინაარსი მიუღებელი იყო.
