რას პასუხობენ ს/კ “გურიას” განცხადებას საკრებულოს თავმჯდომარე და ყოფილი დირექტორატი

_ უმაღლეს ლიგაში გადასვლისა და გრიგოლეთის საწვრთნელი ბაზის დაბრუნების შემდეგ, როგორც კლუბის მესვეურები აცხადებდნენ, სპონსორთა რამდენიმე ვარიანტი განიხილებოდა. მუნიციპალიტეტის გამგებლის მოვალეობის შემსრულებელი ზაზა ურუშაძე თვეების წინ ამბობდა, რომ კლუბს პატრონი აუცილებლად ეყოლებოდა და “გურია” მაჩანჩალა არ იქნებოდა.

ამ მოლოდინში რამდენიმე თვე გავიდა. ამ რამდენიმე დღის წინ ზაზა ურუშაძემ განაცხადა, რომ კლუბის ხელმძღვანელობა მას სპონსორს ჰპირდებოდა, თუმცა “დღეს-ხვალეს” ძახილში თვეები გავიდა.

უკვე საქმე იქამდეც მივიდა, რომ კლუბი დამფუძნებელს დაუპირისპირდა: “2014 წლის ბიუჯეტში პროექტის სახით წარვადგინეთ მოთხოვნა 1 700 000 ლარზე, თანხის ნაწილი უნდა მოხმარდეს ფეხბურთელთა, კლუბის თანამშრომელთა მიმდინარე წლის სახელფასო დავალიანების დაფარვას. ადგილობრივი პრესის ფურცლებზე საკრებულოს თავმჯდომარის მხრიდან კეთდება განცხადება, თითქოსდა, ამ თანხის გამოყოფის შემთხვევაში ბიუჯეტი ვერ დააფინანსებს საბავშვო ბაღებს და „მთელი ლანჩხუთი კლუბ „გურიად“ გადაიქცევა“. გასულ ჩემპიონატში, როცა “გურია” პირველ ლიგაში გამოდიოდა, ადგილობრივი ბიუჯეტიდან კლუბის დასაფინანსებლად გამოიყო 900 000 ლარი, ამის გარდა ბანკიდან აღებულ იქნა 400 000 ლარის კრედიტი. საქმე გვაქვს პარადოქსთან: თუ პირველი ლიგაში ჯამში დაიხარჯა 1 300 000 ლარი, უმაღლეს ლიგაში წარმატებულად მოასპარეზე გუნდისთვის 1 700 000 ლარით დაფინანსებაზე უარს ამბობენ. “გურია“ წარმოადგენს მუნიციპალიტეტის მიერ დაფუძნებულ არასამეწარმეო (არაკომერციული) იურიდიულ პირს და მისი დაფინანსება სწორედ მუნიციპალიტეტის ვალდებულებაა, რომელმაც ან უნდა შეინახოს, ანდა გამოაცხადოს მისი ლიკვიდაცია,” _ ესაა ნაწყვეტი „გურიას“ პრესსამსახურის მიერ გავრცელებულ განცხადებიდან.

ლანჩხუთის საკრებულოს თავმჯდომარე ამირან გიგინეიშვილი ბრალდებას არ იღებს და აცხადებს, რომ სუბორდინაცია დარღვეულია: “ბუნებრივია, ამხელა თანხით კლუბის დაფინანსება ვერ მოხდება. საერთოდ, საინტერესოა, ვისი დაწერილია ეს ტექსტი. ამაზე საკმაოდ მკაცრი მოთხოვნა მექნება. ეს თანხა რომ გამოვყოთ ბიუჯეტიდან, გამოდის, რომ მუნიციპალიტეტში არსებული 14 ა(ა)იპ-ი უნდა გაჩერდეს და ყველანაირი სერვის-მომსახურება შეწყდეს. განცხადებაში საუბარია, რომ ადრე კლუბისთვის 900 ათასი ლარი იყო გამოყოფილი. ჩემს წინა მთავრობაში რა ხდებოდა, არ ვიცი, მაგრამ ზუსტად ვარ ინფორმირებული, რომ ამხელა თანხა კლუბისთვის არ გამოყოფილა. რომ აცხადებენ, კლუბის დავალიანება არის ბანკების მიმართ 500 ათასი ლარი, ეს თანხა ჩვენ მოგვეცით და გადავიხდითო, უკაცრავად, მაგრამ ეს თანხა კლუბისთვის პირდაპირ არავის მიუცია. თანხა კრედიტის სახით აიღო მუნიციპალიტეტმა და ის გადაიხდის. დასასრულ ვიტყვი, რომ პრესსამსახური უნდა დაფიქრდეს იმაზე, რომ ლანჩხუთის მუნიციპალიტეტის ადგილობრივი შემოსავალი სულ 1,2 მილიონს შეადგენს. გამომდინარე აქედან, 1,7 მილიონის მოთხოვნა მუნიციპალიტეტის ყველა მცხოვრების დაცინვაა! საერთოდ, თუ განხილვის პროცესში მდგარი საკითხის ასე გამომზეურება და დამფუძნებელზე შეტევა ა(ა)იპ “გურიას” ხელმძღვანელობის პოზიციაა, ეს ცალკე განხილვის თემაა, რადგან შესაძლო სპონსორზე საუბარი მათი მხრიდან 5 თვეა მიმდინარეობს. მათ აუცილებლად ვკითხავ, სად არის დაპირებული სპონსორი?!” _ აცხადებს ჩვენთან საუბარში საკრებულოს თავმჯდომარე.

ასევე დაგვიკავშირდნენ “გურიას” ყოფილი დირექტორატის წევრები და პოზიციის დაფიქისრება გვთხოვეს: “უპირველეს ყოვლისა, გულწრფელად მოხარულები ვართ, რომ ჩვენი გუნდში ყოფნის დროს დაწყებულ აღმასვლას “გურია” წარმატებულად განაგრძობს და შეშფოთებულები ვართ, კლუბის მომავალთან დაკავშირებული ფინანსური პრობლემის გამო. ასევე ვწუხვართ, რომ კლუბის დღევანდელი ხელმძღვანელობა უკვე მერამდენედ ავრცელებს არასწორ ინფორმაციას, რითაც საზოგადოებაში სურს დისკრედიტაცია გაგვიკეთოს ადამიანებს, რომლებსაც კარგის მეტი არაფერი გაგვიკეთებია და “გურია” უმაღლეს ლიგაში გადავიყვანეთ. უკვე მერამდენედ ხდება გამოგონილი ციფრებით სპეკულირება _ თურმე, უმაღლეს ლიგაში გადასასვლელად ბიუჯეტიდან 1,3 მილიონი მიგვიღია. გვინდა გითხრათ, ჩვენზე მაღალი დაფინანსების მქონე კლუბები უმაღლესი ლიგიდან გამოვარდნენ და პირველი ლიგიდან აღზევება ვერ მოახერხეს. თუმცა “გურიას” უმაღლეს ლიგაში გადასვლა ბიუჯეტს დაუჯდა არა 1,3 მილიონი, არამედ ამის ნახევარი _ 750 ათასი ლარი!!! პირველ წრეში ბიუჯეტიდან თანხა არ გამოყოფილა _ დავალიანების გასასტუმრებლად აღებულ იქნა სესხი _ 250 ათასი ლარი, ხოლო თებერვლიდან მაისამდე არსებული ხარჯები _ 500 ათას ლარამდე. ამას გარდა, გვინდა აღვნიშნოთ, რომ ჩვენ რაიონის ხელმძღვანელობას შევთავაზეთ ექვსეულში მოხვედრა და ხარჯთაღრიცხვაც წარვუდგინეთ _ 500 ათასი ლარი, ამასთან, სამი თვის მანძილზე ფეხბურთელებს დაფინანსების გარეშე გავაჩერებდით. იყო სეზონები, როცა 6 თვე არ გვქონდა დაფინანსება, გასულ სეზონშიც კი სამთვიანი დავალიანება გვქონდა. ზაზა ურუშაძემ დააფიქსირა, რომ ბიუჯეტიდან თანხას ვერ გასცემდა. კლუბი ამჟამინდელმა დირექტორმა, კობა მირზაშვილმა განაცხადა, რომ მოიყვანდა სპონსორს და ეს საკითხი გადაწყვეტილი იყო. რადგან საქმე კერძო ინვესტორთან გვქონდა, ჩვენ ახალ ხელმძღვანელობას სრული თავისუფლება მივეცით და ყველა შტატი გავუთავისუფლეთ. მაშინ გამგებელმა აღნიშნა კიდეც, თუ ბიუჯეტის დასაფინანსებელი გახდებოდა “გურია”, ჩვენი გათავისუფლება უმადურობა იქნებოდა და ამას არ გააკეთებდა. დღეს კი გამოჩნდა, რომ კლუბის ახალმა ხელმძღვანელობამ სპონსორის თემა ჩვენს ჩასანაცვლებლად გამოიყენა, ამით შეცდომაში შეიყვანა ადგილობრივი ხელისუფლება, რითაც საბოლოოდ კლუბი უფსკრულის პირას აღმოჩნდა. იმედია, პრობლემა მოგვარდება და ვიღაცების პირად ინტერესებს არ შეეწირება კლუბის მომავალი.”