ზაზა ურუშაძე, რომელიც ამჟამად მუნიციპალიტეტის გამგებლის მოვალეობას ასრულებს, “გურია ნიუსთან” საუბრისას ამბობს, რომ მის მიმართ არანაირი პრეტენზიები არ არსებობს და არსად წასვლასაც არ აპირებს. თუმცა, ჩვენი წყარო ამბობს, რომ ურუშაძის შეცვლა გარდაუვალია. უფრო მეტიც, როგორც გვითხრეს, ლანჩხუთის მუნიციპალიტეტის გამგებლად, ბორის ჭყონია დაინიშნება, რომელიც წარმოშობით სუფსიდანაა. თავად ჭყონია, ჩვენთან საუბრისას ამბობს, რომ ასეთი საუბარი არის, თუმცა, გადაწყვეტილება ჯერ არ მიუღია:
_ იყო ასეთი საუბარი. დიახ, განიხილება ჩემი კანდიდატურა, _ ამბობს ჭყონია.
_ ვისთან იყო ეს საუბარი, უშუალოდ ვინ მიიღო გადაწყვეტილება, რომ თქვენ ლანჩხუთის გამგებელი უნდა გახდეთ?
_ მოსახლეობის მოთხოვნაც იყო ეს.
_ პირადად თქვენ ვისთან გქონდათ საუბარი?
_ გინდა თუ არა თქვენ უნდა იყოთ გამგებელიო, ასეთი საუბარი არავისთან მქონია. წარმოუდგენელია, ეს ვინმეს ასე გადაეწყვიტა, როცა ამ წუთას გამგებელი ადგილზეა.
_ ბატონო ბორის, უშუალოდ ხელისუფლებისგან თუ გქონდათ შემოთავაზება, რომ დაბრუნდეთ ლანჩხუთში და გამგებელი გახდეთ?
_ ხელისუფლებისაგან არა. ეს მოსახლეობისგან იყო და კულუარებშიც იყო ამაზე საუბარი. მე ჯერ არც თანხმობა განმიცხადებია და არც ვიცი, როგორ წარიმართება მომავალი.
_ თუმცა, ბოლო დროს მედიაში გამოჩნდით, როგორც ლანჩხუთის გულშემატკივარი…
_ დიახ. ეს არის კულტურული და სოციალური დახმარებები. ჩემი და ჩემი მეგობრების დახმარებით ნამდვილად ვაპირებ პროექტების განხორციელებას.
_ რატომ ახლა?
_ ეს ახლა გადაწყდა. კეთილი ფორმით, კეთილი ზრახვებით, ეს არის სიყვარულის გამოხატვა ლანჩხუთისა და ლანჩხუთელების მიმართ.
_ როდის შეიძლება, გიხილოთ ლანჩხუთის გამგებლად?
_ ეს არავინ იცის.
_ ამ ეტაპზე ლანჩხუთის მეგობრის სტატუსით აპირებთ მოღვაწეობას?
_ დიახ. მხოლოდ ეს არის.
_ თქვენი და თქვენი მეგობრების დახმარება რამდენად აისახება საფეხბურთო კლუბ “გურიაზე”, რომელსაც სერიოზული ფინანსური პრობლემები აქვს?
– ძალიან კარგად. უკვე მოლაპარაკება მიმდინარეობს სპონსორებთან. მოგეხსენებათ, რომ ლანჩხუთის “გურია” ლანჩხუთის უსაყვარლესი გუნდია, მაგრამ ეს ლანჩხუთელების კეთილდღეობის ხარჯზე არ უნდა აისახოს. ამიტომ, სპონსორები დებენ პირობას, რომ თავიანთ თავზე აიღებენ გუნდის ყველა ხარჯის გასტუმრებას. ლანჩხუთის ბიუჯეტში მოხდება თანხის შეტანა და არა პირიქით, ბიუჯეტიდან გადაქაჩვა გუნდისთვის. ამბობენ, რომ ძალიან უჭირს დღეს ლანჩხუთის ბიუჯეტს და ეს სავალალო სიტუაციაა. არ შეიძლება, ასეთი რამე მოხდეს. სპონსორები გვპირდებიან, რომ ამას ააცილებენ ლანჩხუთის მოსახლეობას და გუნდს გაიყვანენ უეფაზე.
_ იცნობთ სპონსორებს?
_ კი, როგორ არა, მაგრამ, ჯერჯერობით, თავს შევიკავებ დასახელებისგან.
_ თქვენს კანდიდატურას მოსახლეობის გარდა ვინ უჭერს მხარს? როგორც გვითხრეს, ახალ გუბერნატორთან არცთუ კარგი ურთიერთობა გაქვთ?
_ ეს ვინ თქვა? კარგი რატომ არ უნდა მქონდეს?! შევხდით კიდეც.
_ როდის შეხვდით, როცა გუბერნატორი გახდა?
_ არა. მანამდე. მას შემდეგ თბილისში ვარ და ვერ მოვახერხე შეხვედრა. თუმცა, მასთან ჩემს შესაძლო გამგებლობაზე საუბარი არ ყოფილა. კიდევ ერთხელ გეტყვით, რომ გიორგის ძალიან დიდ პატივს ვცემ და მიხარია, რომ ლანჩხუთელი კაცია, მონდომებული ადამიანია და ვიცი, რომ ნამდვილად უყვარს გურია.
გურიის გუბერნატორი, გიორგი ჩხაიძე ჭყონიასთან შეხვედრის დეტალებს ვერ იხსენებს, თუმცა, არ გამორიცხავს რომ შეხვედრია.
_ ბატონო გიორგი, ბორის ჭყონიას იცნობთ?
_ არ მახსენდება.
_ ლანჩხუთელი ადამიანია, სუფსიდანაა და, როგორც გვითხრეს, ლანჩხუთის გამგებლად მოიაზრება. თავად, ჩვენთან საუბარში ამბობს, რომ ამაზე საუბარი ნამდვილად არის. ამბობს იმასაც, რომ სანამ გუბერნატორად დაინიშნებოდით, შეხვდით კიდეც…
_ შეიძლება, თუ ამბობს, სიმართლე იქნება. ასე არ მახსენდება.
_ თქვენ, პირადად, ფლობთ ინფორმაციას, რომ შესაძლოა, ბორის ჭყონია ლანჩხუთის გამგებელი გახდეს?
_ მასეთ ინფორმაციას არ ვფლობ, როგორც ასეთი. ჯერ გამგებელი არის და საკრებულოსგან არ მომისმენია განცხადება, რომ რაღაცას აპირებენ გამგებლის წინააღმდეგ. რამდენადაც ვიცი, გამოცხადდება კონკურსი მაგ თანამდებობაზე და, აქედან გამომდინარე, მოხდება შერჩევა.
_ კონკურსი შემოდგომისთვის გადაიდო. მანამდე თუ არის მოსალოდნელი გამგებლების შეცვლა?
_ ვერანაირად ვერ ვიტყვი. ეს არ შედის ჩემს კომპეტენციაში.
_ რეკომენდაციას თუ გაწევთ შეცვლასთან დაკავშირებით?
– რეკომენდაციას არ გავწევ იმიტომ, რომ ესეც ჩარევად ჩამეთვლება. რომ შევისწავლი სიტუაციას, ვიტყვი, სად როგორი სიტუაციაა. ეს შედის ჩემს კომპეტენციაში. რეკომენდაცია უკვე განაცხადია, რომ გამგებელი აუცილებლად უნდა შეიცვალოს. ეს საკრებულოს კომპეტენციაა. მე ჩემს მოსაზრებას ვეტყვი და დანარჩენი მათი გადასაწყვეტია. შეიძლება, ჩემი მოსაზრება არ მიიჩნიონ საკმარისად იმისთვის, რომ გამგებელი შეიცვალოს.
