რომ რეგიონში დაწყებული, იქნება ეს ინფრასტრუქტურული თუ სხვა პროექტები, განხორციელდეს წარმატებით, ეფექტურად და დროულად, რომ არ იყოს ჩამორჩენა. ადგილზე უნდა გაეცნოთ არსებულ პრობლემებს. რაც მთავარია, მოსახლეობის პრობლემებს. დღევანდელი მთავრობა ვართ მოსახლეობაზე და ადამიანებზე ორიენტირებული მთავრობა. ჩვენი ამოსავალი წერტილი უნდა იყოს ადამიანი.
შესაბამისად, ჩემი მოწოდება არის, რომ 24-საათიან რეჟიმში იმუშაოთ ჩვენი მოქალაქეების კეთილდღეობისთვის,” _ასე მიმართა პრემიერ-მინისტრმა ირაკლი ღარიბაშვილმა ახალ გუბერნატორებს თანამდებობებზე წარდგენისას.
2014წელს, რეგიონებში განსახორციელებელი ინფრასტრუქტურული პროექტებისთვის სახელმწიფო ბიუჯეტიდან 180 მილიონ ლარზე მეტი გამოიყოფა, საიდანაც პირველ ეტაპზე 135 მილიონი ლარის 430 პროექტია დამტკიცებული.
რა ხდება სამეგრელო-ზემო სვანეთში და როგორ აპირებს ახალი გუბერნატორი მოსახლეობისთვის ყველზე მნიშვნელოვანი საკითხების, დასაქმებისა და სოციალური პრობლემების მოგვარებას, ამის შესახებ “გურია ნიუსთან” სამეგრელო-ზემო სვანეთის ახლადადანიშნული გუბერნატორი ლევან შონია საუბრობს.
“სამეგრელო-ზემო სვანეთში 19,941,389 ლარის ღირებულების 39 პროექტი დამტკიცდა: 18 პროექტი – გზებისა და ხიდების რეაბილიტაციას მოიცავს; 7 პროექტი – წყლის, სანიაღვრე არხებისა და კანალიზაციის მოწესრიგებას; 3 პროექტი – საბავშვო ბაღებისა და კულტურის სახლების რეაბილიტაციას; 5 პროექტი – კორპუსების გადახურვას, ლიფტების და ეზოების კეთილმოწყობას; 6 პროექტი – სხვადასხვა ინფრასტრუქტურის მოწესრიგებას”, _ აამბობს ლევან შონია “გურია ნიუსთან”.
_ ბატონო ლევან, როგორი ეკონომიკური მდგომარეობაა დღეს სამეგრელო-ზემოსვანეთში და რაც ყველაზე მნიშვნელოვანია, რა კეთდება მოსახლეობისთვის ყველაზე მნიშვნელოვანი პრობლემის, დასაქმების საკითხის მოსაგვარებლად?
_ ასე უცებ, მაგ კითხვაზე პასუხს ვერ გაგცემთ, რადგან ახლა მტკიცდება ბიუჯეტი და ჯერ კიდევ განხილვის სტადიაშია ყველაფერი. ჩვენი მიზანია, ერთობლივად გადავჭრათ ყველა ის საკითხი, რაც მუნიციპალიტეტის დასახლებებში პრობლემატურია, შევინარჩუნოთ და გავამდიდროთ ის რესურსი, რაც გაგვაჩნია, დავასაქმოთ რაც შეიძლება მეტი ადგილობრივი მოსახლე და შევქმნათ ყველა პირობა, რათა უკეთეს პირობებში მოუწიოს საზოგადოებას ცხოვრება. ჩვენ ყველა წამოჭრილ პრობლემას სახელმწიფო ხელისუფლებასთან ერთად განვიხილავთ და გადაჭრის გზებსაც გამოვნახავთ. ამ შემთხვევაში, უმნიშვნელოვანესია ინვესტიციების მოზიდვა, რომელიც პირდაპირ კავშირშია დასაქმებასთან. ინტენსიური მოლაპარაკებები მიდის ინვესტორებთან. მოგეხსენებათ, სანამ ინვესტორი გარემოს და პირობებს არ შეისწავლის, ძნელია თვალდახუჭულმა მიიღოს გადაწყვეტილება. ჩვენ მაქსიმალურად ვცდილობთ, ინვესტორებს ყველანაირად ხელსაყრელი პირობები შევუქმნათ.
_ კონკრეტულად რომელ ინვესტორებზეა საუბარი და რა მიმართულებით იგეგმება ინვესტიციების ჩადება?
_ ჯერ ბოლომდე მიყვანილი არ არის მოლაპარაკებები და არა მგონია, ამა თუ იმ კომპანიასა და ინვესტორზე საუბარი კონკრეტულად სწორი იყოს. არის ისეთი საკითხები, რის გასაჯაროვებისგან, ჯერჯერობით, თავს შევიკავებ. როგორც კი საბოლოო შედეგი გახდება ცნობილი, მაშინვე ჩაგაყენებთ საქმის კურსში.
თუმცა, აქვე გეტყვით, რომ ეკონომიკური განვითარების თვალსაზრისით, როგორც პრემიერმა განაცხადა და მეც ასე ვფიქრობ, ერთ-ერთი ყველაზე პრიორიტეტული ქვეყნისთვის ენერგეტიკული სექტორის განვითარება და ამ მიმართულებით ინვესტიციების მოზიდვაა. ენერგოდამოუკიდებლობა ქვეყნის უსაფრთხოებისთვისაც უმნიშვნელოვანესია. იმაზე დიდი ბედნიერება, როცა არავისზე ხარ დამოკიდებული, ქვეყნისთვის რა არის? როცა ენერგორესურსებს შენ თვითონ ფლობ და ხელგაწვდილი არ ხარ ვინმეს წინაშე. მითუმეტეს, როცა ქვეყანას პრობლემა არ ექნება ენერგომატარებლებზე, ეს უკვე ძალიან წინ გადადგმული ნაბიჯია.
_ რამდენად აისახება ეს ინვესტიციები ადამიანების ყოფაზე, იქნება თუ არა პირდაპირი პირობა ინვესტორისთვის წაყენებული, რომ დასაქმდეს ადგილობრივი მოსახლეობა?
_ ეგ პირობა ყოველთვის დგას სახელმწიფოს მხრიდან და ამ შემთხვევაშიც ასე იქნება. მაგალითად, სამეგრელო ზემო-სვანეთში დაგეგმილია ერთ-ერთი უსერიოზულესი პროექტის, ხუდონჰესის აშენება, რომელსაც მე, როგორც ამ ქვეყნის მოქალაქე, მხარს ვუჭერ. თქვენ დასაქმების საკითხი ახსენეთ და მინდა გითხრათ, რომ ამ პროექტის განხორციელებით ათასობით ადამიანი დასაქმდება და ათასობით ოჯახი ამოისუნთქავს. ეს უბრალო პროექტი ხომ არ არის. 7-წლიანი ციკლის პროექტია და ამ ხნის განმავლობაში რამდენი ადამიანი ამოისუნთქავს, აბა თქვენ თვითონ დათვალეთ. 4000 ადამიანზეა საუბარი და რაც მთავარია, დასაქმდებიან ადგილობრივები, დასაქმდებიან ახალგაზრდები.
_ თუმცა, მასე მარტივადაც არ არის საქმე, ადგილობრივ მოსახლეობას თავისი პოზიცია აქვს და გარკვეული პრობლემებიც არის.
_ დიახ, გეთანხმებით, მაგრამ მთავრობას აქვს იმის უნარი, რომ აუხსნას მათ, რამდენად მნიშვნელოვანია ეს პროექტი არა მხოლოდ ქვეყნისთვის, მათთვისაც. მათ ხომ შვილები, შვილიშვილები ჰყავთ და ნორმალურად ცხოვრება უნდათ. ხელისუფლება ყველაფერს გააკეთებს იმისთვის, რომ არანაირი პრობლემა და გაურკვევლობა არ დარჩეს ამ საკითხის ირგვლივ. თანაც, ეს ხომ მხოლოდ სამეგრელოსთვის არ არის? მთელი ქვეყნისთვისაა. ეს არის ქვეყნისთვის და ჩვენი მომავლისთვის უმნიშვნელოვანესი პროექტი.
_ მეორე დიდი პრობლემა არის სოციალურად დაუცველი ადამიანები, რომელთა რაოდენობა, სამწუხაროდ, ყველა რეგიონში მატულობს. მათ დასახმარებლადრაპრიორიტეტებიიქნა განსაზღვრული თქვენი მხრიდან?
_სამუშაო თუ არ არის, სოციალური პრობლემებიც იქნება. ეს ყველაფერი მიბმულია ერთმანეთზე. ამას ვერ გავექცევით, თუმცა, სახელმწიფომ საყოველთაო ჯანდაცვის პროგრამის განხორციელებით ძალიან მნიშვნელოვანი ნაბიჯი გადადგა. წარმოიდგინეთ, რეგიონში ამ მოკლე ხანში 151 000-მა ადამიანმა ისარგებლა ამ პროგრამით, საუბარია მონაცემებზე 10 იანვრის ჩათვლით.
გახსოვთ ხომ, 2 წლის წინ ე. წ 5 ლარიანი დაზღვევა რომ ჰქონდათ? რა უნდა გაეკეთებინათ მაგით? ვერაფერს გააკეთებდი, ცხადია. სამეგრელოს რეგიონში 466 000 ადამიანია და აქედან 151 000 საყოველთაო ჯანდაცვის პროგრამით სარგებლობს. არაა ეს პატარა საქმე.
_ მოსახლეობასთან როდის აპირებთ შეხვედრებს და მათი პრობლემების მოსმენას?
_ თავიდანვე მაგით მინდოდა დამეწყო, მაგრამ შემდეგ გადავწყვიტე, რწმუნებულებს შევხვედროდი და ჯერ მათგან მომესმინა ინფორმაციები, რათა ამ ყველაფრის ანალიზი გავაკეთო და შემდეგ ხალხს შევხვდე. სამეგრელოს რეგიონის თითოეულ მოსახლეს პირადად შევხვდები და მოვისმენ რა აწუხებთ მათ. ვერ გეტყვით, რომ ეს ერთ და ორ დღეში მოხერხდება, რადგან, მოგეხსენებათ, საკმაოდ დიდი რეგიონია, მაგრამ ამას აუცილებლად გავაკეთებ.
