ამასთან დაკავშირებით, დღეს, საქართველოს, შრომის, ჯანმრთელობისა და სოციალური დაცვის სამინისტროში, მინისტრმა, დავით სერგეენკომ ჟურნალისტებთან შეხვედრაზე განაცხადა: “1 ივნისიდან იზრდება ბევრი რამ და იზრდება სოციალური შემწეობები. ის რაც იყო 30 ლარი, ხდება 60 ლარი; ხოლო ის, რაც იყო 24 ლარი, ხდება 50 ლარი. ეს არის ის ერთ-ერთი ცვლილება, რომელიც გახორციელდება 1 ივლისს. ასევე იგეგმება, სხვა სოციალური პაკეტების გაზრდა _ 1 ივლისიდან ფართოვდება საყოველთაო ჯანდაცვის პაკეტი. ჩვენი დაპირებების გზაზე ერთ-ერთი ქვაკუთხედი სწორედ 1 ივლისი იქნება.”
მინისტრმა აღნიშნა, რომ პროგრამა ითვალისწინებს ამბულატორიაში ოჯახის ექიმის მომსახურებას, ინსტრუმენტული და ლაბორატორიული კვლევების დაფინანსებას. ასევე, დაფინანსდება ონკოლოგიური პაციენტების მკურნალობა; ორსულთა პატრონაჟი და მშობიარობა.
შეძლებს თუ არა საქართველოში არსებული სამედიცინო დაწესებულებები, უპასუხოს ჯანდაცვის სამინისტროს ახალ გამოწვევას, ამის შესახებ “გურია ნიუსთან” სოციალური მომსახურების სააგენტოს ხელმძღვანელი, ნოე ქინქლაძე ამბობს: _ ჯანდაცვის სამინისტროს გათვლებით, სამედიცინო დაწესებულებებს არ უნდა ჰქონდეთ პრობლემები. წინასწარ შევისწავლეთ საქართველოში არსებულ სამედიცინო დაწესებულებების ყველა შესაძლებლობები, რაც მათ ჰქონდათ. სამინისტროს გათვლებით, არანაირი პრობლემა არ იქნება.
_ საყოველთაო ჯანდაცვის პაკეტის გაფართოება ხომ არ შეუქმნის სადაზღვევო კომპანიებს გარკვეულ პრობლემებს?
_ არანაირი პრობლემა არ შეექმნებათ, რადგან, სადაზღვევო კომპანიებს ბაზარზე თავისი ნიშა აქვთ.
_ სადაზღვევო კომპანიები ფიქრობენ, რომ, შესაძლოა, ჯანდაცვის სამინისტროს ახალმა პროექტმა სადაზღვევო კომპანიების ჩაძირვა გამოიწვიოს.
_ მე ასე არ ვფიქრობ, რადგან, იმ სადაზღვევო კომპანიებს, რომლებიც საბაზრო პრინციპებით მუშაობენ და ჰყავთ კარგი მენეჯმენტი, არანაირი პრობლემა არ შეექმნებათ.
_ სადაზღვევო პაკეტის კორპორატიულ მომხმარებელს, რომელსაც სურვილი აქვს გადავიდეს სახელმწიფო დაზღვევაზე, გარკვეული პრობლემები ექმნებათ. როგორ უნდა მოახერხონ გადასვლა?
_ აქ ჩვენი მიდგომა არის ასეთი _ ამ პროგრამაში ჩაერთვებიან ის მოქალაქეები, რომლებსაც 1 ივლისის მდგომარეობით არანაირი დაზღვევა არ ჰქონდათ. თუ 1 ივლისის შემდეგ, დაუმთავრდებათ კორპორატიული დაზღვევა, ჩვენ გარკვეული გარდამავალი პერიოდი ავიღეთ. ეს ადამიანები საყოველთაო დაზღვევის პირველი პაკეტით, ურგენტული, ანუ გადაუდებელი მომსახურებით ისარგებლებენ, ხოლო გარკვეული პერიოდის შემდეგ, შეეძლებათ ჩაერთონ საყოველთაო ჯანდაცვის პროგრამაში.
