თბილისის 187-ე საჯარო სკოლის გასხვისების ამბით, საქართველოს მთავარი პროკურატურა და შსს დაინტერესდა. საქმე იმაშია, რომ რამდენიმე წლის წინ, დიდი დიღმის მე-2 მიკრო რაიონში, სკოლა, სადაც 700-მდე მოსწავლე სწავლობდა და რომელიც მსოფლიო ბანკის მიერ იყო გარემონტებული, გასხვისდა. მისი მეპატრონე კი მანანა გურჯიშვილი გახდა.
"გურია ნიუსთან" 187-ე საჯარო სკოლის ყოფილი მასწავლებელი, მარინა კორძახია, ამბობს, რომ განათლების სამინისტროში სკოლის გასხვისების საკითხთან დაკავშირებით იყო მისული. თუმცა, გასხვისების ამბავით არავინ დაინტერესებულა.
"ჩემთვის გაუგებარია, როცა ევროპაში შევდივართ, ასეთ დროს თბილისში, ბავშვებს არ აქვთ საჯარო სკოლა, სადაც საშუალება ექნებათ უფასოდ ისწავლონ.
დიდი დიღმის მე-2 მიკრორაიონში არის 187-ე სკოლა, რომელიც წინა მთავრობამ გაყიდა, სადაც 700 მოსწავლე დადიოდა და მსოფლიო ბანკის მიერ იყო გარემონტებული. მე ამ მიკრორაიონის მცხოვრები ვარ. ამ მთავრობას 2 წელია დავდევთ, არ დაგვიტოვებია ივანიშვილი, მარგველაშვილი, ქალბატონო თამარ სანიკიძე, ვეუბნებით, მაგრამ, რეაქცია არ აქვთ. არ აინტერესებთ, სკოლა, რომ არ არის მიკრორაიონში. ეს სკოლა 10 წლის ვადით "თიბისი" ბანკშია დაგირავებული. ინვესტორი მოსწავლის თანხებითა და მასწავლებლის ვაუჩერებით იხდიდა პროცენტებს. უკვე 3 წელი გავიდა. ამ სკოლაში ვმუშაობდი. მაგრამ, ის პედაგოგები, ვისაც განსხვავებული აზრი გვქონდა და სკოლის დაბრუნება გვინდოდა, გამოგვაგდეს. ამხელა მე-2 მიკრორაიონი სკოლის გარეშეა დარჩენილი. სად არ დავწერეთ, ვის არ უთხარით, არანაირი რეაქცია არ არის. წერილი ბატონ ღარიბაშვილსაც მივწერე, პასუხი განათლების მინისტრის მოადგილე, ლია გიგაურმა მომწერა. პასუხი?!“, _ საერთოდ არ აინტერესებთ არაფერი!
_ ვინ გახდა 1870-ე სკოლის მეპატრონე?
_ სკოლის მეპატრონეა ვინმე მანანა გურჯიშვილი. რომელსაც 60 ბავშვიანი კერძო სკოლა ჰქონდა. ახლა 2500 ბავშვზე გათვლილი სკოლა იყიდა. საინტერესოა, სკოლა როგორ იყიდა?! ეტყობა ამ ქალს ვიღაცა ჰყავს მფარველი. მე და თქვენ სკოლის საყიდლად, რომ მივიდეთ, ვინ გვაყიდინეს?! ის კი არა რიყის ქვას ვინ გვაყიდინებს?!"
რა ხდება 187-ე საჯარო სკოლასთან დაკავშირებით, რატომ დარჩა დიდი დიღმის მე-2 მიკრორაიონის დასახლება საჯარო სკოლის გარეშე და არის თუ არა დანაშაულის ნიშნები, სკოლის გასხვისების საქმეში, ამასთან დაკავშირებით "გურია ნიუსი" განათლების სამინისტროს დაუკავშირდა. სამინისტროს პრესსამსახურის თქმით, სკოლის გასხვისების საკითხში გარკვეული გადაცდომები დაფიქსირდა, რის გამოც სამინისტრომ პროკურატურას მიმართა.
"187-ე სკოლის პედაგოგებთან არაერთი შეხვედრა გაიმართა სამინისტროში. ასევე შემოსული იყო რამდენიმე წერილი, რის საფუძველზეც შევისწავლეთ სკოლის გასხვისების საკითხი. დაფიქსირდა გარკვეული გადაცდომები და საჭიროდ ჩავთვალეთ ინფორმაცია პროკურატურისთვის მიგვეწოდებინა. პროკურატურა შეისწავლის საქმეს და გვეტყვის იკვეთება თუ არა დანაშაულებრივი ქმედებები გასხვისების თაობაზე.
რაც შეეხება სკოლის აღდგენის საკითხს, ამის საჭიროებას სამინისტრო სისტემატურად სწავლობს. 2014 წლისთვის შეირჩა თბილისის ის უბნები, სადაც გადაუდებელი საჭიროება იყო სკოლის აღდგენა-მშენებლობის. ესენია თბილისის 61-ე, 103-ე და 100-ე სკოლები. საჭიროებების შესწავლა გრძელდება და იმ ტერიტორიებზე, სადაც გადაუდებელი საჭიროება განისაზღვრება, მომდევნო წლებში გაგრძელდება სკოლების აღდგენა-მშენებლობის პროცესი."
დაიწყო თუ რა განათლები სამინისტროს მიერ მიწოდებული საბუთების საფუძველზე, საქართველოს მთავარმა პროკურატურაში მოკვლევა "გურია ნიუსი" საქართველოს მთავარ პროკურატურას დაუკავშირდა. სადაც განგვიცხადეს: "187-ე სკოლასთან დაკავშირებით, განათლების სამინისტროს მიერ მოწოდებული საბუთები გადაგზავნილია შსს ვაკე-საბურთალოს მე-4 სამმართველოში. დანარჩენი ინფორმაცია იქ იკითხეთ"
დაასრულა თუ არა შინაგან საქმეთა სამინისტრომ თბილისის 187-ე საჯარო სკოლის გასხვისების ფაქტთან დაკავშირებით მოკვლევა, სამინისტროს პრესსამსახურში გვითხრეს:
"პროკურატურის მიერ მოწოდებული მასალებით, გამოძიება არ დაწყებულა. ანუ რაც მოგვაწოდეს მასალები, იყო მოკვლევა და გამოძიება არ დაწყებულა. მეტი სხვა არაფრის თქმა არ შემიძლია"
თუმცა "გურია ნიუსმა" შსს-დან პასუხიდან ვერ გაარკვია, საქართველოს განათლების სამინისტროს მიერ სამართალდამცავ უწყებაში გადაგზავნილი საბუთების მიხედვით, რა შედეგი დადგა. მოხდა თუ არა 187-ე საჯარო სკოლის უკანანო გასხვისება?!
