"ქართული ოცნების" საარჩევნო შტაბის ხელმძღვანელი კახა კალაძე ოზურგეთში წინასაარჩევნო შეხვედრებში ჩაერთო. ის "ქართული ოცნების" ქალაქ ოზურგეთის მერობის კანდიდატთან ბეგლარ სიორიძესთან და ოზურგეთის მუნიციპალიტეტის ახალარჩეულ გამგებელთან, მერაბ ჭანუყვაძესთან ერთად მოსახლეობას შეხვდა.
_ ჩვენ დღეს ვართ თავისუფლები, არავინ არ გვზღუდავს, გამოვთქვათ საკუთარი მოსაზრება, არავინ არ იდევნება განსხვავებული აზრის გამო, პოლიტიკური შეხედულებების გამო, ეს ჩვენი მონაპოვარია. თქვენ არ იფიქროთ, რომ აქ მოვედით იმის გამო, დაგავალდებულოთ, გინდათ თუ არა 41 შემოხაზოთ, თქვენ ძალიან კარგად ხედავთ და ხედავდით, საით მიდიოდა ქვეყანა და რა რეალობაა დღეს და საით მივდივარ. მე დარწმუნებული ვარ სწორ არჩევანს გააკეთებთ, _ განაცხადა კახა კალაძემ.
მისი თქმით, ოზურგეთი არის ის ქალაქი, სადაც იმართება მეორე ტური: _ მინდა გითხრათ, რომ აქ საგანგაშო და ტრაგიკული ნამდვილად არაფერი არ არის.
ეს არის კიდევ ერთი ნაბიჯი დემოკრატიის განვითარებისკენ. ჩვენ გვახსოვს წლების განმავლობაში საპარლამენტო, საპრეზიდენტო და თვითმმართველობის არჩევნები. მხოლოდ ერთი პარტია წარმოადგენდა ყველაფერს და მხოლოდ ერთი პარტია იყო ყველაფერში გამარჯვებული. დღეს გვაქვს მრავალპარტიულობა, ეს მისასალმებელია და ამას ძალიან კარგი შეფასებები მოყვა პარტნიორი ქვეყნების მხრიდან. როგორ წარმოგიდგენიათ ერთი გუნდი _ გუბერნიის სამსახური და ადგილობრივი ხელისუფლების წარმომადგენლები იყვნენ სხვადასხვა გუნდის წარმომადგენლები, ოპოზიციური ძალა? ეს ძალიან რთული იქნება. მე არ ვამბობ, რომ ვინმე ქალაქს და რაიონს მიატოვებს, მაგრამ რთული იქნება იმ პროექტების გახორციელება, რომელიც არის დაგეგმილი _ დარწმუნებული ვარ, ყველა პროექტის დაწყებაზე იქნება ხელის შეშლა. მე მახსოვს, როდესაც უფასო ხვნა-თესვის პროექტი დავიწყეთ, მაშინ ჯერ კიდევ რაიონებისა და ქალაქების ხელმძღვანელებად ისევ "ნაცმოძრაობის" წევრები იყვნენ. როდესაც მოვითხოვეთ სიების გამოგზავნა, მოდიოდა მცდარი სიები. ეს კეთდებოდა მიზანმიმართულად.
მიხარია, რომ დღეს სრულიად განსხვავებულ რეალობაში გვიწევს საარჩევნო კამპანიის ჩატარება. არა მარტო კოალიცია "ქართულ ოცნებას", ნებისმიერ სხვა პარტიას ქონდა შესაძლებლობა, თავისუფალ, დემოკრატიულ გარემოში მიეწოდებინა ამომრჩეველისთვის საკუთარი პროგრამა, _ უთხრა მოსახლეობას კახა კალაძემ.
