ოზურგეთის მუნიციპალიტეტის გამგეობასა და ქალაქ ოზურგეთის მერიას, "გურია ნიუსმა" საჯარო ინფორმაციის გამოთხოვის მიზნით რამდენიმე დღის წინ მიმართა.:
"საქართველოს ზოგადი ადმინისტრაციული კოდექსის მე-3 თავის თანახმად, გთხოვთ მოგვაწოდოთ შემდეგი სახის საჯარო ინფორმაცია:
ქალაქ ოზურგეთის მერისა და ოზურგეთის მუნიციპალიტეტის გამგეობაში დასაქმებული საჯარო მოხელეების პირადი განცხადებების ქსეროასლები სამსახურის დაწყების თაობაზე, სვ –ები და დიპლომის დედანთან დამოწმებული ასლები. ასევე ნარკოლოგიურისა და ნასამართლეობის ცნობები."
აღნიშნულ საკითხთან დაკავშირებით, არც გამგეობიდან და არც მერიიდან საჯარო ინფორმაცია "გურია ნიუსს" არ მიაწოდეს.
ოზურგეთის მუნიციპალიტეტის გამგეობის საზოგადოებასთან ურთიერთობისა და საინფორმაციო განყოფილების უფროსი ეკატერინე მგელაძე ოფიციალურად გვპასუხობს:
"ზოგადი ადმინისტრაციული კოდექსის 28-ე მუხლის თანახმად, თქვენს მიერ მოთხოვნილი ინფორმაციები მუნიციპალიტეტის გამგეობაში დასაქმებული საჯარო მოხელეების სვ-ების, ჯანმრთელობის, ნარკოლოგიური შემოწმებისა და ნასამართლეობის ცნობების შესახებ, შეიცავს პერსონალურ მონაცემებს და ადმინისტრაციული სამსახურს მათი გაცემის უფლება კანონის საფუძველზე არა აქვს.
პერსონალური მონაცემები შეიცავს, ყველა იმ ინფორმაციას, რომელიც უკავშირდება იდენტიფიცირებულ ან იდენტიფიცირებად ფიზიკურ პირს. პირი იდენტიფიცირებადია, როდესაც შესაძლებელია მისი იდენტიფიცირება პირდაპირ ან არაპირდაპირ, კერძოდ, საიდენტიფიკაციო ნომრით ან პირის მახასიათებელი ფიზიკური, ფიზიოლოგიური, ეკონომიკური, კულტურული ან სოციალური ნიშნებით.
რაც შეეხება თქვენს მიერ მოთხოვნილ დიპლომების ასლებს, მუნიციპალიტეტის წარმომადგენლობით ორგანოს (საკრებულოს), არ დაუდგენია საკვალიფიკაციო მოთხოვნები, რომლის მიხედვითაც უნდა განისაზღვროს მოხელის საჯარო სამსახურში დასაქმებისთვის წარსადგენად სავალდებულო (საშუალო თუ უმაღლესი განათლების) დამადასტურებელი დოკუმენტი.
თუ თქვენ მოიპოვებთ კონკრეტული საჯარო მოხელის თანხმობას, საჯარო გახდეს ინფორმაცია მისი უმაღლესი განათლების შესახებ, ამ თანხმობის საფუძველზე, ჩვენ დაუყოვნებლივ მოგაწვდით აღნიშნულ მონაცემებს",_ აღნიშნულია მგელაძის მიერ ოფიციალურად მოწერილ პასუხში.
თითქმის იდენტურ პასუხს გვაძლევს ქალაქ ოზურგეთის მერიის საზოგადოებასთან ურთიერთობისა და საინფორმაციო განყოფილების უფროსი იზა დარჩია.
"ვინაიდან, პირადი განცხადებები შეიცავს პერსონალურ მონაცემებს, მისი გასაჯაროება, კანონით დადგენილი წესის შესაბამისად, დაუშვებელია.
ყველას აქვს უფლება, გაეცნოს ადმინისტრაციულ ორგანოში არსებულ საჯარო ინფორმაციას, აგრეთვე მიიღოს მისი ასლები თუ ისინი არ შეიცავენ სახელმწიფო, პროფესიულ ან კომერციულ საიდუმლოებას ან პერსონალურ მონაცემებს.
ადმინისტრაციული ორგანო ვალდებულია უზრუნველყოს საკითხის საჯაროდ განხილვა თუ ამას ითვალისწინებს კანონი.
საჯარო ინფორმაცია ღიაა, გარდა კანონით გათვალისწინებული შემთხვევებისა და დადგენილი წესით პერსონალურ მონაცემებს, სახელმწიფო ან კომერციულ საიდუმლოებას მიკუთვნებული ინფორმაციისა.
პერსონალური მონაცემები ( შემდგომ მონაცემი) – ნებისმიერი ინფორმაცია, რომელიც უკავშირდება იდენტიფიცირებულ ან იდენტიფიცირებად ფიზიკურ პირს. პირი იდენტიფიცირებადია, როდესაც შესაძლებელია მისი იდენტიფიცირება პირდაპირ ან არაპირდაპირ, კერძოდ საიდენტიფიკაციო ნომრით ან პირის მახასიათებელი ფიზიკური, ფიზიოლოგიური, ფსიქოლოგიური, ეკონომიკური, კულტურული ან სოციალური ნიშნებით", _ აცხადებენ მერიის პრესსამსახურში.
"გურია ნიუსი" აღნიშნულ საკითხთან დაკავშირებით "საერთაშორისო გამჭვირვალობა საქართველოს" იურისტ გიგი ჩიხლაძეს დაუკავშირდა.
"განცხადებები, სადაც წერია პერსონალური ინფორმაცია, უნდა დაიშტრიხოს, განცხადება, თავისთავად პერსონალურ ინფორმაციას არ შეიცავს, თუ იქ მითითებული პირადი ნომერი იქნება დაშტრიხული, აი ასე უნდა მოგაწოდონ აღნიშნული ინფორმაციები. ეს უკვე აღარ არის პერსონალური ინფორმაცია, იგივე ვრცელდება დიპლომზე, სვ -ზე და ასე შემდეგ.
თქვენს მიერ გამოთხოვილი საჯარო ინფორმაციის რაღაც ნაწილი შეიძლება შეიცავდეს პერსონალურ ინფორმაციას, თუმცა ეს არ არის პირობა იმისა, რომ თქვენთვის ეთქვათ უარი. მე მიმაჩნია, რომ მაინც უკანონოა და კანონდარღვევასთან გვაქვს საქმე, რომ არ მოგაწოდეს ინფორმაცია, თუმცა ყველა მიმართებაში არა.
ვინც საჯარო მოხელე არ არის, შეიძლებოდათ უარი ეთქვათ, ხოლო საჯარო მოხელეებთან მიმართებაში, რაც გითხარით პერსონალური ინფორმაცია დაშტრიხვის შემთხვევაში აუცილებლად უნდა მოეცათ, ამის გასაჯაროების უფლება და ვალდებულება მათ ჰქონდათ", _ აღნიშნავს იურისტი.
"გურია ნიუსი" აღნიშნულთან დაკავშირებით სარჩელით სასამართლოს ორშაბათს მიმართავს.
