დატოვებს თუ არა თავდაცვის მინისტრი ირაკლი ალასანია დაკავებულ თანამდებობას და კოალიციას? ასეთ შემთხვევაში, კოალიციაში შემავალი რომელი პოლიტიკური სუბიექტი აღმოჩნდება მის გვერდით და რა საფრთხეების წინაშე დადგება მმართველი ძალა?
იმაზე, რომ ალასანია, შესაძლოა, კოალიციურ მთავრობას გაემიჯნოს, უკვე დიდი ხანია საუბრობენ.
NDI-ის უკანასკნელი კვლევების შედეგად, რომელიც 27 აგვისტოს გახდა ცნობილი, პოლიტიკოსებში, მოწონების მხრივ, თავდაცვის მინისტრი ირაკლი ალასანია 60%-ით ლიდერობდა. მას 54%-ით მოჰყვებოდა პრემიერ-მინისტრი ირაკლი ღარიბაშვილი, მესამე ადგილს კი, პარლამენტის თავმჯდომარე დავით უსუფაშვილი – 51%-ით იკავებდა.
მაშინ, მოწონების რეიტინგში ალასანიას ლიდერობას, მინისტრთა კაბინეტის მხრიდან არაერთგვაროვანი შეფასებები მოჰყვა.
ექსპერტთა ნაწილი კი არ გამორიცხავდა, რომ კვლევის შედეგები პრემიერსა და ალასანიას შორის მეტი დაპირისპირების საბაბი გამხდარიყო. ეს ის პერიოდია, როცა აქტიურად საუბრობდნენ იმაზე, რომ პრემიერი ალასანიას მინისტრთა კაბინეტს დაატოვებინებდა.
აღნიშნული რეიტინგების გამოქვეყნებას წინ უძღოდა თავდაცვის მინისტრის მხრიდან აშშ-ში ვიზიტისას გაკეთებული განცხადება, როცა მან აღნიშნა, რომ დასავლეთმა უნდა შესთავაზოს NATO-ს წევრობა ასპირანტ ქვეყნებს და განათავსოს იქ თავდაცვითი საშუალებები, განსაკუთრებით კი, საქართველოში. ამ განცხადებას, მაშინ, მმართველი გუნდის წევრებმა ნაჩქარევი და მთავრობასთან შეუთანხმებელი უწოდეს.
რამდენიმე დღის წინ კი, 28 ოქტომბერს, საქართველოს მთავარმა პროკურატურამ თავდაცვის სამინისტროს მოქმედი მაღალჩინოსნები დააკავა და ბრალი 4 102 872 ლარის გაფლანგვაში დასდო. საქმეს გირიფით საიდუმლო დაედო, შესაბამისად დეტალები უცნობია.
მიუხედავად იმისა, რომ მინისტრმა ირაკლი ალასანიამ მოითხოვა საქმისთვის გრიფის მოხსნა, საქართველოს პროკურატურამ აღნიშნული არ დააკმაყოფილა.
დღეს, 4 ნოემბერს, საქართველოს პროკურატურამ პროკურატურამ ჯარისკაცების მოწამვლის ფაქტზე თავდაცვის სამინისტროს თანამშრომლების მიმართ ბრალდების შესახებ დადგენილება გამოიტანა და შეიარაღებული ძალების რამდენიმე მაღალჩინოსანს ბრალი წარუდგინა.
თავდაცვის სამინისრტოსა და მინისტრის გარშემო მიმდინარე მოვლენების პარალელურად, კოალიციაში შემავალი პარტიის -"რესპუბლიკური პარტიის" საპარლამენტო ფრაქციამ საკანონმდებლო ცვლილება გააკრიტიკა, რომლის თანახმადაც რეპრესირებულთათვის გასაცემი ფულადი კომპენსაციის 2000 ლარზე მეტი ვერ იქნება.
მაშინ, ფრაქციის თავმჯდომარე დავით ბერძენიშვილმა აღნიშნა, რომ როცა ჩინოვკნიკები გაორმაგებულ შემოსავალს იღებენ, ხოლო რეპრესირებულებისათვის თანხა არ იძებნება, ისინი ამას არ შეეგუებიან.
ამავდროულად რესპუბლიკურმა პარტიამ გაავრცელა განცხადება, სადაც მან კოალიცია "ქართული ოცნების" ეფექტიანობის გაზრდის მიზნით პარტნიორებს ორ შესაძლო გზა შესთავაზა, ერთი – არსებულის, წინა ხელისუფლების მოშორებაზე ორიენტირებული კოალიციის კლასიკური ევროპული ტიპის კოალიციად გადაქცევას გულისხმობს, მეორე კი ისეთ კოალიციად ჩამოყალიბებას ისახავს მიზნად, რომელიც მასში შემავალი პარტიების საკუთარი იდეოლოგიის შესაბამისად პოზიციონირებისა და განსხვავებული პოზიციების დაფიქსირების თავისუფლებას უზრუნველყოფს.
იმაზე, რომ კოალიცია რღვევას დაიწყებდა, ჯერ კიდევ 2012 წლის საპარლამენტო არჩევნების შემდეგ საუბრობდნენ. თემას აქტუალურობა დღემდე არ დაუკარგავს. ოპოზიციურ პარტიებში თუ პოლიტოლოგთა წრეებში აქტიურად განიხილება საკითხი – იქნებიან თუ არა პირველები "თავისუფალი დემოკრატები" და "რესპუბლიკური პარტია", რომლებიც კოალიციის მიღმა აღმოჩნდებიან?
"როგორც ჩანს, ვიღაცისთვის მიუღებელია ალასანიას ფიგურა, თუნდაც იმიტომ, რომ იგი გამოკითხვებში ლიდერია. ვგულისხმობ მოქმედ პრემიერს, ირაკლი ღარიბაშვილს და ყოფილ პრემიერ-მინისტრსაც.
რა თქმა უნდა გამორიცხული არაა, რომ მიმდინარე მოვლენების ფონზე, ალასანიამ დატოვოს თანამდებობა და კოალიცია, მაგრამ თუ ეს მოხდება, ქვეყანაში მიმდინარე პოლიტიკურ პროცესებზე ცუდად აისახება, რადგან ალასანიას თანაპარტიელები ("თავისუფალი დემოკრატების" წარმომადგენლები), არიან როგორც პარლამენტში ასევე მინისტრთა კაბინეტში წარმოდგენილები და მოსალოდნელია მათ თავდაცვის მინისტრს სოლიდარობა გამოუცხადონ.
ასეთ შემთხვევაში იარსებებს ხელისუფლების ვაკუუმი. ასევე, საფრთხე შეექმნება საგარეო პოლიტიკურ ორიენტაციას, რადგან ალასანიას მხრიდან თანამდებობის და კოალიციის დატოვება ნიშნავს, რომ კოალიციას გამოეყვნენ დასავლური ორიენტაციის პირები და იგი ნაკლებად პროდასავლური დარჩება", _ ამბობს "გურია ნიუსთან" საუბრისას პოლიტოლოგი ნიკა ჩიტაძე და დასძენს, რომ აქ მხოლოდ ალასანიას პრობლემა არაა და რამდენიმე ნეგატიური დამოკიდებულება რესპუბლიკელების მისამართითაც გამოვლინდა.
რა პროცესები შეიძლება გამოიწვიოს კოალიციის შიგნით თავდაცვის მინისტრ ირაკლი ალასანიას წასვლამ, როგორც საზოგადოებრივი კომუნიკაციების კვლევისა და განვითარების ცენტრის ხელმძღვანელი, ანალიტიკოსი არჩილ გამზარდია "გურია ნიუსთან" განმარტავს, ეს მიზეზებსა და ამ მიზეზების შეფუთვაზე იქნება დამოკიდებული.
"თუ მოხდა და ალასანიამ კოალიცია თანამდებობასთან ერთად დატოვა, ძალიან დიდი მნიშვნელობა ექნება ამის მიზეზებს და მის შეფუთვას.
თუ თავისი ნებით გადადგება, შესაძლოა, ეს ნაკლებად ნეგატიურად აისახოს თავისსავე პერსპექტივებზე. მოიხვეჭს დადებით საიმიჯო მახასიათებლებს როგორც საკუთარი ნებით პასუხისმგებლობის აღება და ა.შ.
თუ მას გადააყენებენ, ეს უკვე კოალიციის რეიტინგზე შეიძლება ნეგატიურად აისახოს, მაგრამ ალასანიას რეიტინგზე დადებითად.
თუ მას საკმარისი მოცემულობით არანაადრევად და არა სადაოდ, არამედ რეალური და დამტკიცებული მიზეზებით გადააყენებენ ეს კოალიციაზე კარგად აისახება, რადგან ალასანიას მართვა შეფასდება ნეგატიურად.
ამიტომ, ძალიან დიდი მნიშვნელობა აქვს იმ ფაქტორებს და პირობებს, რითაც შესაზლოა მან თანამდებობა დატოვოს ან დაატოვებინონ", _ განმარტავს "გურია ნიუსთან" გამზარდია.
დატოვებს თუ არა თავდაცვის მინისტრი ირაკლი ალასანია დაკავებულ თანამდებობას, ან/და ის და მისი პარტია "თავისუფალი დემოკრატები" კოალიცია "ქართულ ოცნებას", სავარაუდოდ, დღეს, 18:00-ზე გახდება ცნობილი.
