ყოფილი პრემიერ-მინისტრის ბიძინა ივანიშვილის გადაცემის _ "2030“- ის პროდიუსერი, შესაძლოა, პუბლიცისტი ვასილ მაღლაფერიძე იყოს.
ამის შესახებ ინფორმაცია "გურია ნიუსთან“ მაღლაფერიძემ ნაწილობრივ დაადასტურა.
"გადაცემა თავისთავად ჩაფიქრებულია და უკვე მოსამზადებელი სტადიაა დაწყებული. არ არის გამორიცხული, რომ მე ამ გადაცემაში არა წამყვანად, მაგრამ პროდიუსერად მივიღო მონაწილეობა. დანარჩენი არაფერი არ არის გარკვეული. სავარაუდო თარიღი, როდის გავა გადაცემა ეთერში არ ვიცი“, _ ამბობს მაღლაფერიძე.
საპარლამენტო უმცირესობის წევრის, ირმა ნადირაშვილის ინფორმაციით, "ბიძინა ივანიშვილის თანაწამყვანები იქნებიან შადიმან შამანაძე, გიორგი უძილაური და მაკა ცინცაძე. გადაცემის რედაქტორია ვასილ მაღლაფერიძე“, _ აღნიშნავს ნადირაშვილი.
გადაცემის თანაწამყვანებთან დაკავშირებით ვასილ მაღლაფერიძე ამბობს, რომ ჯერჯერობით მათი კანდიდატურები არ განხილულა.
"მე თავისთავად სამივე ძალიან მომწონს, მაგრამ მათი კანდიდატურები ჯერ არ განხილულა. თუმცა, ეს იმას არ ნიშნავს, რომა რ განიხილება“, _ აცხადებს მაღლაფერიძე.
შეგახსენებთ, რომ ყოფილმა პრემიერ-მინისტრმა ბიძინა ივანიშვილმა რამდენიმე დღის წინ თავის სამომავლო გეგმებზე "საზოგადოებრივი მაუწყებლის“ ეთერში ისაუბრა. ასევე დააანონსა, რომ მალე, GDS-ზე მისი ანალიტიკური ტელეპროექტი "2030“ გავა.
გადაცემის ეთერში გასვლის დრო ჯერჯერობით უცნობია. ტელეკომპანიას ამ საკითხზე კომენტარი არ გაუკეთებია.
ცნობილია მხოლოდ ის, რომ კვირაში ერთხელ, კვირაობით სამ წამყვანთან ერთად წავიყვანს.
"გადაცემა ორშაბათიდან პარასკევის ჩათვლით იქნება და მოწვეული სტუმრებით მოხდება მოვლენების ანალიზი. საუბარი იქნება სტრატეგიაზეც და სხვადასხვა თემებზეც. კვირაობით კი, 1 საათის განმავლობაში სამ წამყვანთან ერთად ძირითად ანალიზს გავაკეთებთ", _ აღნიშნა ივანიშვილმა.
როგორც ივანიშვილი განმარტავს, გადაცემაში განხილული იქნება პოლიტიკური პროცესები და ეს ყველაფერი ობიექტურად შეფასდება. ასევე აღნიშნა, რომ წინა ხელისუფლება სიცრუეზე იყო ორიენტირებული, რის დაბალანსებასაც დღევანდელი ტელევიზიები ვერ ახერხებენ, ივანიშვილს კი იმედი აქვს, რომ მისი გადაცემის საშუალებით საზოგადოებისთვის სწორი ანალიზის მიწოდებას შეძლებს.
"მე გვერდით დავუდგები პოლიტიკოსებს, დავეხმარები მოვლენების გაანალიზებაში და საზოგადოება სწორ აქცენტებს გააკეთებს ყველა მოვლენაზე", _ განაცხადა ივანიშვილმა.
შეგახსნებთ, რომ ბიძინა ივანიშვილის გადაცემის შესახებ ინფორმაცია 2014 წლის 7 ივლისს გაჟღერდა და ის "ჯი დი ეს-"ზე ოქტომბრიდან უნდა გასულიყო. ცნობილი იყო ისიც, რომ პოლიტიკურ თოქ-შოუს ბიძინა ივანიშვილთან ერთად ეკა ბერიძე წაიყვანდა; გადაცემის პროდიუსერი კი, "რუსთავი 2“-დან რამდენიმე თვის წინ წამოსული ნინო შუბლაძე უნდა ყოფილიყო. თუმცა, დაანონსებული გადაცემა ამ დრომდე ეთერში არ გასულა.
შეგახსნეებთ, რომ ტელეკომპანია GDS გასართობი მაუწყებლობის ლიცენზიის მქონე ტელევიზიაა და ის ბიძინა ივანიშვილის შვილს, ბერა ივანიშვილს ეკუთვნის.
