არასამთავრობო ორგანიზაცია "იდენტობის" ინფორმაციით, პოლიციელ პაატა დობორჯგინიძეზე უკანონო სამართლებრივი დევნა და ზეწოლა ხორციელდება. ამის მიზეზი, ორგანიზაციის ცნობით, 2014 წლის ივნისში, მტკვირის სანაპიროზე პოლიციელებს შორის მომხდარ ჩხუბია, რა დროსაც შს მინისტრ ალექსანდრე ჭიკაიძეს აგინეს.
ცნობისთვის, პოლიციელების ჩხუბის შემთხვევა ტელეკომპანია "ტაბულამ“ 18 ივნისს გაავრცელა, რის შემდეგაც შსს-ს გენინსპექციამ მოკვლევა დაიწყო და რამდენიმე დღეში ყველა პოლიციელი თანამდებობიდან გაათავისუფლეს.
როგორც "გურია ნიუსთან“ საუბრისას პაატა დობორჯგინიძის ადვოკატი ინგა არახამია ამბობს, ინცინდენტი ამით არ ამოწურულა და ზეწოლა ახლა იმ პოლიციელებზე მიმდინარეობს, რომლებიც შემთხვევის ადგილზე გამოიძახეს. ერთ-ერთი მათგანი კი, პაატა დობორჯგინიძეა.
ადვოკატი განმარტავს, რომ რამდენიმე თვის განმავლობაში დობორჯგინიძეზე ზეწოლა მიმდინარეობდა, მას ორჯერ უმიზეზოდ გამოუცხადეს საყვედური, 2015 წლის 5 ნოემბერს კი, მისი მეგობარი ქალის საჩივრის საფუძველზე დააკავეს, თუმცა მისთვის ბრალი არ წარუდგენიათ.
როგორც ადვოკატი ამბობს, პროკურატურის ბრალდება დობორჯგინიძის მეგობარი ქალის საჩივარს ემყარება, სადაც აღნიშნულია, რომ დობორჯგინიძემ მას ესროლა. ადვოკატი აცხადებს, რომ ეს ბრალდებაც ტყუილია, რადგან იარაღიდან, რომლის შენახვის უფლებაც დობორჯგინიძეს ჰქონდა, ექსპერტიზის დასკვნით, გასროლა არ მომხდარა. თუმცა, როგორც არახამია განმარტავს, ექსპერტიზა დაგვიანებით, საჩივრის შეტანიდან, დაახლოებით, ერთ თვეში ჩატარდა, მანამდე კი, დობორჯგინიძეს თავისუფლება უკანონოდ აღუკვეთეს.
"პაატა დობორჯგინიძის მეგობარი ქალის საჩივრის საფუძველზე საქართველოს მთავარმა პროკურატურამ გამოძიება 2014 წლის 5 ნოემბერს დაიწყო, რის შემდეგაც დობორჯგინიძე დააკავეს, თუმცა მისთვის ბრალი არ წაუყენებიათ, რადგან დობორჯგინიძემ ადვოკატ გოგა ონიანთან დაკავშირება მოახერხა, მისი პროკურატურაში გამოცხადების შემდეგ კი, ის გაათავისუფლეს და უთხრეს, რომ მასთან ამ ეტაპზე შეკითხვები არა აქვთ.
საქმეში კითხვის ნიშნები თავიდანვე იყო, მაშინ, როდესაც პროკურატურას თავისუფლად შეეძლო იმ დღესვე ამოეღო დობორჯგინიძის იარაღი, რომელიც მის სახლში ინახებოდა და მასზე, ისევე, როგორც ტანსაცმელზე, ექსპერტიზა ჩაეტარებინა, ეს არ გააკეთა. გასროლის შემთხვევაში, რასაც მისი მეგობარი ქალბატონი აცხადებს, დობორჯგინიძის ხელზე, ტანსაცმელზე და იარაღზე დენთის კვალი უნდა ყოფილიყო. ექსპერტიზა ერთი თვის დაგვიანებით ახლახანს ჩაატარეს. სამხარაულის ექსპერტიზის ეროვნულმა ბიურომ დაადგინა, რომ რამდენიმე წელია ამ იარაღიდან გასროლა არ განხორციელებულა“, _ ამბობს არახამია.
მისივე თქმით, "პროკურატურაში დაბარების შემდეგ, 7 ნოემბერს, დობორჯგინიძეს თითქოსდა სამსახურში გამოუცხადებლობისთვის განწესის ფურცელში წინასწარ ჩაუწერეს სასტიკი საყვედური, მაშინ, როდესაც ის სამსახურში საათნახევრით ადრე გამოცხადდა“.
"ამის გამო, მან პატაკი დაწერა, სადაც აღნიშნა, რომ მის მიმართ ხორციელდება უკანონო ქმედება, ირღვევა უდანაშაულობის პრეზუმფცია და იძულებულია დატოვოს თანამდებობა. თუმცა, პატაკი ოცეულის მეთაურმა სოსო მუმლაძემ, ასეულის მეთაურმა შალვა ჯერენაშვილმა და სამმართველოს უფროსის მოადგილემ ლაშა ჯოხაძემ არ ჩაიბარეს. ისინი მოითხოვდნენ რომ მას პატაკის შინაარსი შეეცვალა, რაც დობორჯგინიძემ არ გააკეთა. უფრო მეტიც, ლაშა ჯოხაძემ გასცა ბრძანება და დობორჯგინიძეს უკანონოდ ჩამოართვეს პირადობის მოწმობა, რომელიც დღემდე არ დაუბრუნებიათ. ასევე, დღემდე არა გვაქვს დობორჯგინიძის გათავისუფლების შესახებ ბრძანება მიღებული, მიუხედავად იმისა, რომ ის სამსახურში ერთი თვეა, არ გამოცხადებულა. სავარაუდოდ, მას სასმართლოს ძალით უპიტრებენ გათავისუფლებას“, _ ამბობს არახამია და დასძენს, რომ პროკურატურამ პაატა დობორჯგინიძეს ბრალი გუშინ წაუყენა, ხვალ, კი სასამართლოს აღკვეთის ღონისძიების შეფარდების მოთხოვნით მიმართავს.
"გურია ნიუსი“ საქმის დეტალების გასარკვევად საქართველოს მთავარი პროკურატურის პრესსამსახურის უფროსს, ნათია სუხიაშვილს დაუკავშირდა, რომელიც ამბობს, რომ პაატა დობორჯგინიძისთვის ბრალის წაყენება 2014 წლის ივნისში მომხდარ შემთხვევას არ უკავშირდება.
როგორც სუხიაშვილი განმარტავს, დობორჯგინიძეს ბრალი იარაღის უკანონო ტარებისთვის და მეგობარ ქალზე მუქარისთვის აქვს წაყენებული.
"ეს არანაირად არ უკავშირდება ზაფხულში მომხდარ შემთხვევას. ამაზე გამოძიება ნამდვილად არ მიმდინარეობს. დობორჯგინიძეს ბრალი სულ სხვა მუხლით ჰქონდა წაყენებული – მეგობარ ქალზე განხორციელებული მუქარისთვის, რასაც შემდეგ იარაღის უკანონო ტარებაც დაემატა. დეტალებისთვის შეგიძლიათ ხვალ დამიკავშირდეთ“, _ ამბობს სუხიაშვილი.
აღსანიშნავია ისიც, რომ დობორჯგინიძის საქმესთან დაკავშირებით ერთი თვის წინ ეცნობა შინაგან საქმეთა სამინისტროს გენერალურ ინსპექციას, თუმცა ადვოკატი ამბობს, რომ დღემდე უწყებიდან პასუხი არ მიუღიათ.
"გურია ნიუსი“ საქმის დეტალების გარკვევის შემდეგ საკითხს ხვალაც დაუბრუნდება.
