2013 წლის 15 მარტს დაწყებული ნატანები – შრომა – ურეკის 18 კილომეტრიანი გზის რეაბილიტაცია, 2014 წლის მაისში უნდა დასრულებულიყო, თუმცა ჯერ სამუშაოები დასრულებული არ არის.
მეტიც ადგილობრივების განცხადებით ოზურგეთის მუნიციპალიტეტის სოფელ ნატანებში გზის სარეაბილიტაციო სამუშაოები უხარისხოდ არის შესრულებული და ვალდებულებები კომპანიას ბოლომდე არ აქვს მიყვანილი.
გზის ამ მონაკვეთზე სამუშაოებს "გეომშენი 2004" ასრულებდა.
ასევე, გზებზე მოუწესრიგებელია წყალსაწრეტები, რის გამოც წვიმის დროს წყალი მოსახლეობას ეზოებში შესდის.
"საგზაო ნიშნები, გაბიონები, ჯებირები, წყალსაწრეტები, ეს აღნიშნული კომპანიის მიერ ნაკისრი და შეუსრულებელი ვალდებულებებია.
"გეომშენი – 2004" ურეკი-შრომა-ნატანების გზის რეაბილიტაციისთვის გამოცხადებული ტენდერი 2012 წლის ოქტომბერში მოიგო. კომპანიამ სატენდერო ხელშეკრულებით 9 მილიონ 650 ათასი ლარი მიიღო. პროექტის დონორი მსოფლიო ბანკია.
ოზურგეთის მუნიციპალიტეტის სოფელ ნატანებში ცენტრალური გზის მონაკვეთზე რამდენიმე ადგილას ახალდაგებული ასფალტი აყრილია. ამის მიზეზად ხელისუფლების წარმომადგენლები მეწყერს ასახელებენ, მოსახლეობა კი კომპანიის მიერ არაკეთილსინდისიერ მუშაობაზე საუბრობენ და აცხადებენ, რომ იმ ადგილზე, სადაც მეწყერსაშისი ზონაა, ჯებირები და გაბიონები უნდა მოეწყოთ, რაც შესრულებული არ არის.
"გურია ნიუსს" დაუკავშირდნენ სოფელ ნატანების მცხოვრებლები და აღნიშნულის დაფიქსირება გვთხოვა.
ნაირა ვაშალომიძე: "ნახეთ გზა რა დღეშია? ეს სასწრაფოდ გასაკეთებელია, მეწყერიც არის კი ბატონო, მალე ჩაიტანს მიწაში, არავინ არაა პატრონი, გაკეთება უნდოდა ჯებირს ნორმალურად, არც გაბიონებია, უხარიხოდ არის შესრულებული სამუშაო, ნახეთ როგორ ჩავარდნილია? ეს ორი თვეა საშინელი მდგომარეობაა, აქ გავლაც საშიში ხდება თანდათან, მე ვარ მობინადრე ამ გზის და ალბათ ჩემს სახლსაც მიიყოლებს, სახლები სულ გაბზარულია, ნუ ჩამითვლიან "შპიონობაში", მაგრამ ეს ხომ ფაქტია, თქვენც ხედავთ, არც გვაინტერესებს ვინ გააკეთა, როდის გააკეთა, მოგვხედოს ხელისუფლებამ."
" გურია ნიუსი" დაუკავშირდა " გეომშენი – 2004" წარმომადგენელს ოთარ ვანიძეს, რომელიც აღნიშნავს, რომ კომპანიას არაკეთილსინდისიერად სამუშაოები არ შეუსრულებია.
"2013 წლის 15 მარტს დაიწყო ნატანები – ურეკი – შრომის გზის რეაბილიტაცია, რომელიც ჯერ დასრულებული არ არის, კომპანიას პრობლემები აქვს და ვერ აგრძელებს მუშაობას, ასფალტი ყველგან დაგებულია, ახლა მეორეხარისხოვანი სამუშაოებია შესასრულებელი, რომელიც საგანგაშო არ არის და ალბათ დეპარტამენტიც აძლევს უფლებას, რომ გზის ეს მონაკვეთი ბოლომდე სისრულეში მიიყვანოს, ვადებში გადაშორებებიც აქვთ, ალბათ არ წირავენ კომპანიას, მე ასეთი ინფორმაცია მაქვს, ყოველ შემთხვევისთვის, კომპანია ახლა გაჩერებულია უფინანსობის გამო", _ ამბობს ოთარ ვანიძე.
_ რას გვეტყვით, იმასთან დაკავშირებით, რომ მოსახლეობა აცხადებს, რომ კომპანიამ სამუშაოები არაკეთილსინდისიერად შეასრულა? რამდენიმე ადგილას სოფელ ნატანებში ასფალტის გზა სულ დამტვრეულია… მოსახლეობა დახმარებას ითხოვს.
_ არასწორი ინფორმაციაა ის, რომ თითქოს კომპანიამ არაკეთილსინდისიერად შეასრულა სამუშაო. ეს პროექტი მსოფლიო ბანკის დაფინანსებით გაკეთდა, არაკეთილსინდისიერ ნამუშევარს ვინ გვაპატიებდა? მილიმეტრებში გვითლიდნენ ყველაფერს, ეს არის მეწყრის ბრალი, გაფუჭებულია ის ადგილები რომელიც მეწყერსაშიში ზონაა, მთელი ცხოვრება და საუკუნეა ასეა და ახლა ვის სთხოვენ პასუხს?
_ ბატონო ოთარ, ამიტომ ამ ადგილებში უნდა დაგებულიყო გაბიონები და მოეწყოთ ჯებირები, რომელიც არ არის გაკეთებული, ამაზე რას გვეტყვით?
_ ყველაფერი გაკეთებულია რას ამბობთ?!
პირველ მონაკვეთზე, სადაც გზაა გაფუჭებული, თუ ბრძანდებოდით, იქ არის გაბიონი 23 მეტრიანი, რას ამბობთ, სამჯერ გავაკეთეთ ეს ადგილები, მაგრამ სამივეჯერ წაიღო მეწყერმა და რა გვექნა მეტი? ეს უკვე გეოლოგების საქმეა და ჩვენი პრეროგატივა არ არის, ის ჩვენ რომ არაკეთილსინდისიერად ვიმუშავეთ ეს ნამდვილად არასწორი ინფორმაციაა, იმიტომ, რომ ჩვენ რასაც ვაკეთებდით ყველაფერს ვაკეთებდით კეთილსინდისიერად, გერმანელები გვადგა თავზე.
გამგებლის წარმომადგენელი ოზურგეთის მუნიციპალიტეტის სოფელ ნატანებში, ილია თავაძე, "გურია ნიუსთან" აღნიშნავს, რომ გზის სარეაბილიტაციო სარემონტო სამუშაოები აუცილებლად განახლდება.
"შრომა-ნატანები არის მეწყერსაშიში ზონა, გზა გაკეთდა ამიტომ არ დაიკავა გზა და არის ასეთ მდგომარეობაში. უახლოესს დღეებში ჩამოვა სამშენებლო ჯგუფი და დაზიანებულ ადგილებს გააკეთებს. ამას ვერ აკონტროლებს მუნიციპალიტეტი, ეს არის ალბათ კიდეც უხარისხო ნამუშევრის ბრალიც", – გვითხრა თავაძემ.
