დაბა ჩოხატაურის ცენტრში რამდენიმე წუთის წინ დასრულდა სურების ხეობის მაცხოვრებლების აქცია, რომელიც იური ვაზაგაშვილის და ირინა ენუქიძის ხსოვნის პატივსაცემად წუთიერი დუმილით დაიწყო:
_ ეს ადამიანები სამართლიანობისთვის იბრძოდნენ და ამ ბრძოლაში დაიღუპენ. ამიტომ, არ გვაქვს უფლება, მათ ხსოვნას პატივი არ მივაგოთ, _ აღნიშნა ზემო სურების მაჟორიტარმა დეპუტატმა ოთარ სოროზანიშვილმა.
ამ აქციით სურების ხეობის მოსახლეობამ პრეზიდენტს, პრემიერ-მინისტრს და პარლამენტის თავმჯდომარეს კიდევ ერთხელ მიმართეს და ხეობაში გზის გაკეთების აუცილებლობაზე ისაუბრეს. ითქვა ისიც, რომ ხელისუფლებამ ხეობის მოსახლეობას ხე-ტყეზე მუშაობის ნებართვა უნდა მისცეს, რაც თითოეულ ოჯახში შემოსავალს გააჩენს.
აქციას ადგილობრივი ხელიუსფლების სრული შემადგენლობა ესწრებოდა. მაჟორიტარმა დეპუტატმა და ხეობის მაცხოვრებლებმა ჩოხატაურის ხელისუფლებას დიდივანში, შუასურებში და ზემოსურებში გახორციელებული პროექტების გამო მადლობა გადაუხადეს:
_ ყველანაირი აქცია გამიგია, მაგრამ სამადლობელ აქციაზე პირველად ვარ და ეს ძალიან მიხარია, _ აღნიშნა მუნიციპალიტეტის გამგებელმა ირაკლი 
კუჭავამ.
მისივე თქმით, მთავრობას უკვე გაუგზავნეს მოთხოვნა ხეობისთვის ნახევარი მილიონი ლარის გამოყოფის თაობაზე:
_ ამ თანხით შესაძლებელი იქნება ყველაზე მეტად დაზიანებული ადგილების გაკეთება, _ დასძინა კუჭავამ.
აქციაზე მადლობა იმ ადამიანებსაც გადაუხადეს, რომლებიც სურების ხეობისთვის განვითარებისთვის დედაქალაქში აქტიურად იბრძვიან:
_ არ შეგვიძია მადლობა არ გადავუხადოთ საორგანიზაციო ჯგუფს, რომელსაც ზურაბ დარსალია ხელმძღვანელობს; ეროვნული ბიბლიოთეკის დირექტორს, ამ ულამაზესი ხეობის წარმომადგენელს გიორგი კეკელიძეს; ტელევიზიის, პრესის წარმომადგენლებს, რომლებიც ჩვენს პრობლემებს აშუქებენ და ხეობის მოსახლეობის გვერდით არიან, _ აღნიშნა ოთარ სოროზანიშვილმა.
