გურიის ყოფილი მთავარი პოლიცმაისტერი, შემდეგ კი გორის პოლიციის სამმართველოს უფროსი გიგა ჯაფარიძე 2014 წლის იანვარში, თურქეთიდან გადმომავალი, ნარკოტიკების რეალიზაციის დროს დააკავეს.
ჯაფარიძე გურიის სამხარეო პოლიციის მთავარ სამმართველოს 2010-2011 წლებში ხელმძღვანელობდა.
2012 წლის ნოემბრის ბოლოს, ახალი ხელისუფლების მოსვლის შემდეგ, ირაკლი ღარიბაშვილის ბრძანებით იგი გორის პოლიციის უფროსად დაინიშნა, თუმცა, როგორც შსს-ში განმარტავენ ერთ წელიწადში გათავისუფლდა.
მათივე ინფორმაციით ჯაფარიძე თანამდებობიდან გათავისუფლების შემდეგ დააკავეს. ჯაფარიძე, რომელიც როგორც ზემოთ ავღნიშნეთ ნარკოტიკების შემოტანისთვის დააკავეს ერთი წლის წინ უკვე თავისუფალია.
ყოფილი პოლიციელი “გურია ნიუსთან” საუბრისას ამბობს, რომ საპატიმრო სამ დღეში დატოვა:
_ თუ გაინტერესებთ რა მოხდა, მიმართეთ შინაგან საქმეთა სამინისტროს და ნახეთ საქმის მასალები, _ გვითხრა ჯაფარიძემ.
როგორც გავარკვიეთ გიგა ჯაფარიძე სასამართლომ გაათავისუფლა. ნარკოტიკების რეალიზაციის ფაქტზე დაკავებულ პოლიციელს სასამართლოს გადაწყვეტილებით სასჯელის ზომად 10 000-ლარიანი ჯარიმა და 6-წლიანი პირობითი მსჯავრი განესაზღვრა.
კითხვაზე _ ნარკოტიკები პირადი მოხმარებისთვის გადმოჰქონდა თუ მხოლოდ რეალიზაციისთვის ჯაფარიძე არ პასუხობს და ამბობს, რომ დეტალების საქმის მასალებში წერია. თუმცა, მასალების ჩვენთვის გაცნობის სურვილი არა აქვს.
გიგა ჯაფარიძის საქმიანობის შესახებ “გურია ნიუსი” არაერთხელ წერდა.
2012 წლის 26 ოქტომბერს “გურია ნიუსის” ვებგვერდზე გამოაქვეყნა ჟანა მეგრელიშვილის სტატია “პოლიციამ ახალგაზრდებს, პოლიტიკური ორიენტაციის გამო, ჯიბეში ნარკოტიკები ჩაუდო”, სადაც პატიმრების ოჯახის წევრები “გურია ნიუსთან” აცხადებდნენ, რომ 2011 წლის 19 მაისს, ორი პიროვნება უკანონოდ დააპატიმრეს.
ამონარიდი აღნიშნული სტატიიდან, სადაც პატიმრის მამა “გურია ნიუსთან” პოლიციის ყოფილი უფროსის ნარკოტიკებთან კავშირის შესახებ ჰყვება: _ “იმ დროს პოლიციის უფროსი იყო გიგა ჯაფარიძე, რომელმაც ელაპარაკა ჩემს ერთ-ერთ ახლობელს, რომ რამდენი ხანია, ვუთვლით გოჩა გუჯაბიძეს, მოსულიყო ჩვენთან და ეთანამშრომლა, მაგრამ ვერ დავითანხმეთ, სიახლოვეს ვერ გავიკარეთ. მივაგზავნე კაცი, რომლისგანაც წამალი უნდა ეყიდა მას, მაგრამ მიხვდა და გალახა ის კაციო.
თურმე ეს კაცი, ჩემს შვილთან სამხარეო პოლიციის ყოფილმა უფროსმა გიგა ჯაფარიძემ მიაგზავნა, მისი სიძე ყოფილა. იგი ჩემი შვილი წამალს მიყიდდა და მაშინვე დაიჭერდნენ. ესეც არ გამოუვიდათ. შემიძლია, დარწმუნებით გითხრათ, რომ გიგა ჯაფარიძის და და სიძე, ორთავე წამლით ვაჭრობდნენ. მაგ საქმეს გადააყოლეს მაშინ ჯაფარიძე, ოზურგეთი რომ დაატოვებინეს. მე ეს ყველაფერი პოლიციელებმა მითხრეს, მაგრამ რა თქმა უნდა, მათი უსაფრთხოებიდან გამომდინარე, მათ ვინაობას არ დავასახელებ”, _ აცხადებდა პატიმრის მამა.
ასევე, ჩვენმა გაზეთმა გაავრცელა ინფორმაცია, რომ ჯაფარიძის გათავისუფლებამდე ერთი თვით ადრე, ოზურგეთში კონსტიტუციური უსაფრთხოების დეპარტამენტის გურიის სამმართველოს თანამშრომლებმა ნარკოტიკების, როგორც მომხმარებლები, ასევე, გამსაღებლები აიყვანეს. დაკავებულმა ნარკოტიკის შემოტანა თურქეთ-საქართველოს გამშვები პუნქტის გავლით მოახერხა და მის რეალიზაციას ოზურგეთის ქუჩებში, დღისით-მზისით აწარმოებდა. ამბობენ იმასაც, რომ ქუჩაში ნარკოტიკული საშუალებების თავისუფლად გაყიდვის სხვა ფაქტებიც დაფიქსირდა, კონკრეტულად, თეატრის მიმდებარე ტერიტორიაზე, თუმცა, სამართალდამცავებს ნარკორეალიზატორები არ დაუკავებიათ. წყაროს ინფორმაციით, სწორედ ნარკოტიკების რეალიზაციასთან და დამნაშავეთა ვერდადგენასთან დაკავშირებულ საქმეს შეეწირა ჯაფარიძის სავარძელი.
ჩვენი ინფორმაციით გიგა ჯაფარიძის ოჯახის ერთ-ერთი წევრი სასჯელს ნარკოტიკების რეალიზაციისთვის დღესაც იხდის.
