კონტროლის პალატის ყოფილი თავმჯდომარის სულხან მოლაშვილის წამებაში მონაწილე პირების დასჯის მოთხოვნით პეტიცია ვრცელდება.
"ქართველი საზოგადოება უკანასკნელ გზაზე გააცილებს უცხოეთში გარდაცვლილ სულხან მოლაშვილს. ჩვენი მოქალაქეებისათვის ცნობილია იმ მძიმე სულიერი და ფიზიკური განსაცდელის შესახებ, რაც ბოროტმა რეჟიმმა განუწესა ამ ღირსეულ, ქედმოუხრელ ვაჟკაც კაცს.
სწორედ მისი ღირსეული, მედგარი ქცევა და ჭირთათმენა გვაძლევს საფუძველს, რომ ამ ცრემლსა და მწუხარებაში ვიპოვოთ სიამაყის მიზეზი. ამ ჩვენს, ზნეობრივი მაგალითებით ღარიბ დროში, სწორედ სულხანმა გვიჩვენა ბოროტებასა და ძალადობაზე მორალური გამარჯვების მაგალითი.
არჩევანი ზნეობრივ კომპრომისსა და სხეულებრივ ტანჯვას შორის მან ამ უკანასკნელის სასარგებლოდ გააკეთა.
ჩვენ, ქვემორე ხელის მომწერებს გვჯერა, რომ ქართული მართლმსაჯულება და საქართველოს ისტორია საკადრის პასუხს გასცემს და სათანადო ადგილს მიუჩენს სააკაშვილის ბოროტი რეჟიმის დამნაშავე წარმომადგენლებს!" _ აღნიშნულია განცხადებაში, რომელსაც ხელს აწერენ: ავთანდილ არაბული _ აკადემიკოსი; თემურ ნანეიშვილი _ აკადემიკოსი; ალქსანდრე ხარატიშვილი _ აკადემიკოსი; თამაზ ჯოლოგუა _ პროფესორი; გოგი ანთელავა _ პროფესორი; ზაზა შათირიშვილი _ ფილოსოფოსი; ლევან გაჩეჩილაძე _ ბიზნესმენი; შოთა გლურჯიძე _ მხატვარი; კოტე ჯანდიერი _ მწერალი; ბიძინა გეგიძე _ საზოგადო მოღვაწე; ბასა ფოცხიშვილი _ რეჟისორი; ნანა შონია _ მსახიობი; გია გაჩეჩილაძე (უცნობი) _ მომღერალი; გელა დოლიძე _ ფიზიკოსი; გიგა ბათიაშვილი _ საქართველოს დამსახურებული არქიტექტორი; ნინელი ჭანკვეტაძე _ მსახიობი; თემურ გოცაძე _ საქართველოს სახალხო მხატვარი; მარინა ჯანაშია _ საქართველოს სახალხო არტისტი; გოგი პაპინაშვილი _ მსახიობი; ნუგზარ ბაგრატიონი _ რეჟისორი; ზურაბ ყიფშიძე _ მსახიობი; ნანა კაკაბაძე _ უფლებადამცველი; გელა ნიკოლაიშვილი _ იურსტი; გია ტაბლიაშვილი _ იურისტი.
როგორც განცხადებაშია აღნიშნული ხელმოწერების შეგროვება გრძელდება.
სულხან მოლაშვილი 1986-1987 წლებში მუშაობდა შინაგან საქმეთა სამინისტროს სისტემაში; 1992-1994 წლებში იყო უზენაესი სასამართლოს ინსპექტორი; 1994-1996 წლებში კონსულტანტი; 1996 წლიდან ეროვნული უშიშროების საბჭოს აპარატის სამართალდაცვით ორგანოებთან ურთიერთობის განყოფილების წამყვანი სახელმწიფო მრჩეველი; საქართველოს კონტროლის პალატის თავმჯდომარე.
სულხან მოლაშვილი 2004 წლის აპრილში დააპატიმრეს და სამსახურეობრივი მოვალეობის გადამეტებასა და საბიუჯეტო თანხების მითვისებაში ცნეს დამნაშავედ. 2008 წლის იანვარში მოლაშვილი პრეზიდენტის მოვალეობის შემსრულებელმა ნინო ბურჯანაძემ, პატრიარქის შუამდგომლობის საფუძველზე შეიწყალა.
მოლაშვილს, მიუხედავად რამდენიმე წლიანი პატიმრობისა ბრალი არ უღიარებია და საქმე სტრასბურგის ადამიანის უფლებათა ევროპულ სასამართლოში გაასაჩივრა. იგი ყოფილ ხელისუფლებას ყოფილ ხელისუფლებას წამებასა და არაადამიანურ მოპყრობაში ადანაშაულებდა.
სტრასბურგის სასამართლომ სულხან მოლაშვილის საქმესთან დაკავშირებით გადაწყვეტილება გამოიტანა და კონტროლის პალატის ყოფილი ხელმძღვანელი ევროპული კონვენციის 4 მუხლით გაამართლა.
სტრასბურგის სასამართლოს სასამართლოს გადაწყვეტილება გახდა ერთ-ერთი გარემოება, რის გამოც საქართველოს პროკურატურამ სულხან მოლაშვილის საქმის ხელახლა ძიება დაიწყო და როგორც პროკურატურაში ამბობენ, ძიება ინტესნიურ რეჟიმში მიმდინარებს.
მოლაშვილის ახლობლების თქმით, მისი გარდაცვალება ციხეში არაადამიანურმა მოპყრობამ გამოიწვია. მოლაშვილი ციხიდან მძიმე დაავადებით გამოვიდა და მკურნალობის კურსს საფრანგეთში გადიოდა. მას ღვიძლის გადანერგვის ოპერაცია უნდა ჩატარებოდა, თუმცა, ოპერაციამდე მისი მდგომარეობა დამძიმდა და საავადმყოფოში გარდაიცვალა.
სულხან მოლაშვილს 5 ივლისს 15 საათზე ქაშვეთის წმინდა გიორგის ტაძრიდან გამოასვენებენ.
