2017 წლის 1 ივლისიდან ძალაში შევიდა კანონი „საჯარო სამსახურის შესახებ“, რომელიც 2013 წლიდან მიმდინარე საჯარო სამსახურის რეფორმის კონცეფციის საფუძველზეა შემუშავებული. „საჯარო სამსახურის შესახებ“ საქართველოს კანონი ქმნის კარიერულ განვითარებაზე დაფუძნებულ პროფესიულ საჯარო სამსახურს, განსაზღვრავს საჯარო სამსახურში დასაქმებულთა სამართლებრივ სტატუსს და მათ კატეგორიებს, აყალიბებს საჯარო მოხელეთა რანგებისა და კლასების სისტემას, დეტალურად აწესრიგებს დისციპლინური წარმოების პროცესს და მნიშვნელოვნად ზრდის საჯარო მოხელის უფლების დაცვის გარანტიებს. კანონი მიზნად ისახავს პოლიტიკისა და ადმინისტრაციის გამიჯვნას, პოლიტიკური ნეიტრალიტეტის პრინციპის საფუძველზე.
„საქართველოს დემოკრატიული განვითარების კავშირის“ წარმომადგენლის, ქეთევან თოიძის, თქმით, კანონი ახლებურად აწესრიგებს მრავალ, მათ შორის, საჯარო სამსახურში მიღების საკითხსაც: „კანონით დადგინდა, რომ მოხელის თითოეული თანამდებობა შეესაბამება თითო კარიერულ საფეხურს და გადანაწილებულია 4 იერარქიულ რანგში. პირველი რანგი შეესაბამება მაღალ მმართველობით დონეს, მეორე რანგი – საშუალო მმართველობით დონეს, მესამე რანგი – უფროსი სპეციალისტის დონეს, ხოლო მეოთხე რანგი – უმცროსი სპეციალისტის დონეს. საჯარო სამსახურის სისტემაში შესვლა დაინტერესებულ პირს ამიერიდან მხოლოდ ყველაზე დაბალი, მეოთხე რანგის, თანამდებობიდან შეეძლება, რაც იმას გულისხმობს, რომ ღია კონკურსი, რომელშიც მონაწილეობის მიღება მთელი ქვეყნის მასშტაბით ნებისმიერ მსურველს შეუძლია, მხოლოდ მეოთხე რანგის თანამდებობაზე პირის დასანიშნად გამოცხადდება, ხოლო ყველა დანარჩენ შემთხვევაში კონკურსი დაიხურება. მესამე, მეორე ან პირველი რანგის თანამდებობაზე დასანიშნად გამოცხადებულ დახურულ კონკურსში მონაწილეობის მიღება შეეძლებათ მხოლოდ მოქმედ მოხელეებს, მოხელეთა რეზერვში ჩარიცხულ პირებს და საჯარო სამსახურში შრომითი ხელშეკრულებით აყვანილ, საჯარო სამსახურში მუშაობის არანაკლებ 1 წლის გამოცდილების მქონე პირებს. დახურული კონკურსის გახსნა მხოლოდ გამონაკლის, კანონით დადგენილ შემთხვევებში, დაიშვება”.
საჯარო სამსახურის რეფორმის განხორციელებას სამოქალაქო საზოგადოებაც უჭერს მხარს. სამოქალაქო საზოგადოებრივი ორგანიზაციების რეგიონული ქსელისა (R-CSN) და არასამთავრობო ორგანიზაცია „სიდას“ ერთობლივი პროექტის, “საქართველოში საჯარო სამსახურის რეფორმის მხარდაჭერა სამოქალაქო საზოგადოების მიერ”, ფარგლებში ქალაქ ოზურგეთის მუნიციპალიტეტისა და ოზურგეთის მუნიციპალიტეტის მასშტაბით რეგიონული ქსელის წევრი ორგანიზაციების, “საქართველოს დემოკრატიული განვითარების კავშირის“ და „ოზურგეთის ახალგაზრდა მეცნიერთა კლუბის“ ორგანიზებით ჩატარდა 6 საინფორმაციო შეხვედრა „საჯარო სამსახურის შესახებ“ ახალი კანონის შესახებ, რომელშიც მონაწილეობა მიიღეს საჯარო მოსამსახურეებმა (სახელმწიფო რწმუნებულის – გუბერნატორის ადმინისტრაციის, ოზურგეთის მუნიციპალიტეტის გამგეობისა და საკრებულოს აპარატის, ქალაქ ოზურგეთის მუნიციპალიტეტის მერიისა და საკრებულოს აპარატის თანამშრომლებმა), ახალგაზრდებისა და ქალების დაინტერესებულმა ჯგუფებმა, არასამთავრობო ორგანიზაციებისა და მედიის წარმომადგენლებმა.
