გუშინ თბილისის „დინამო არენაზე“ ევროპის ჩემპიონთა ლიგის მეორე საკვალიფიკაციო ეტაპის განმეორებითი შეხვედრა გაიმართა. „სამტრედიამ“ „ყარაბაღს“ უმასპინძლა. ამ გუნდების პირველი მატჩი აზერბაიჯანელების დამაჯერებელი გამარჯვებით დასრულდა – 5:0.
გუსინ საქართველოს ჩემპიონი უკეთ კი გამოიყურებოდა მაგრამ მეტოქის კართან შექმნილ რამდენიმე სახიფათო მომენტს თუ არ ჩავთვლით, დიდად ღირებული არაფერი გაუკეთებია. სტუმრებმა მატჩის პირველ ნახევარში საჯარიმო დარტყმით ერთი გოლი გაიტანეს და თამაშიც პრაქტიკულად ამით მორჩა – 1:0 „ყარაბაღის“ სასარგებლოდ.
რა შეიძლება კიდევ ითქვას გუშინდელი შეხვედრის შესახებ. ალბათ უმჯობესი იქნებოდა „სამტრედიას“ ხელმძღვანელობას ეს მატჩი ზესტაფონსა ან ქუთაისში დაენიშნა. ძალიან უსიამოვნო სანახავი გახლდათ ცარიელი „დინამო არენა“. სტუმარი გუნდის გულშემატკივრები რაოდენობრივად ბევრად სჯობდნენ თამაშზე მოსულ ქართველ ფეხბურთის თაყვანისმცემლებს.
გუშინ რუსეთის პრემიერლიგაში პირველი ტურის შეხვედრები დასრულდა. მოსკოვის „ლოკომოტივი“ ტულას „არსენალს“ მასპინძლობდა და იმარჯვა – 1:0. ეს ერთადერთი ბურთი მოსკოველთა რიგებში მოასპარეზე საბა კვირკველიამ გაიტანა.
იაპონიის ქალაქ ნაგოიაში გრძელდება სუმოისტთა საზაფხულო ბაშო. გუშინ აღმოსავლეთის მე-2 მაეგაშირა ტოჩინოშინმა (ლევან გორგაძე) დაამარცხა იჩინოჯო. ჩვენებურს უკვე 6-4 ბალანსი აქვს.
მე-16 მაეგაშირა გაგამარუ (თეიმურაზ ჯუღელი) დამარცხდა ტაკარაფუჯისთან. ახლა ჩვენებურს 3-7 ბალანსი აქვს, მორიგი მარცხი კი ელიტიდან გავარდნის ტოლფასია.
გუშინ მსოფლიო სპორტული მასმედიის თვალთახედვის არეში ბრაზილიის ეროვნული გუნდისა და კატალონიური „ბარსელონას“ თავდამსხმელი ნეიმარი აღმოჩნდა. დილით გავრცელდა ცნობა რომ პელეს თანამემამულე „ბარსელონას“ დატოვებასა და კარიერის ფრანგულ „პარი სენ ჟერმენში“ გაგრძელებას აპირებდა.
სანდო წყაროს მტკიცებით, ნეიმარსა და “პსჟ”-ს შორის გამართული მოლაპარაკებები წარმატებით დასრულდა. ფრანგული კლუბი მის სანაცვლოდ 222 მილიონი ევროს გადახდას აპირებდა. გავრცელებული ინფორმაციით, ტრანსფერი უახლოესი 2 კვირის განმავლობაში გაოფიციალურდება.
უკვე დღის მეორე ნახევარში, გამოცემამ „EL MUNDO DEPORTIVO” გაავრცელა ცნობა რომ ნეიმარი არსად წასვლას არ აპირებს და კარიერას კატალონიურ გუნდში გააგრძელებს. კატალონიური გამოცემა იუწყება, რომ აღნიშნულთან დაკავშირებით, “ბარსელონა” არანაირ ინფორმაციას არ ფლობს, ხოლო ნეიმარის მამამ კლუბის წარმომადგენლებს აცნობა, რომ მისი შვილი ამჟამინდელ კლუბში რჩება.
წინა კვირას იტალიელმა მოთამაშე ანტონიო კასანომ კლუბ „ვერონასთან“ ერთწლიანი ხელშეკრულება გააფორმა. „ჭირვეული და მოუთვინიერებელი“ ანტონიო „სერია – A“-ში აღზევებულ გუნდს რამდენიმე დღის წინ შეუერთდა და ახალი სეზონისთვის მზადებაც დაიწყო. გუშინ იტალიურ სპორტულ მასმედიაში გავრცელდა ცნობა რომ კასანომ… საფეხბურთო კარიერის დასრულების გადაწყვეტილება მიიღო. 35 წლის თავდამსხმელი ახალ გუნდს ვერ შეეწყო და დიდ ფეხბურთსაც ემშვიდობება.
ცნობილი ინგლისელი კარის დარაჯი, „მანჩესტერ სიტისა“ და იტალიური „ტორინოს“ ყოფილი წევრი ჯო ჰარტი კარიერას ლონდონის „ვესტ ჰემში“ გააგრძელებს. ახალ კლუბში ჰარტი იჯარის წესით გადავიდა, რადგან მასზე უფლებებს კვლავინდებურად „მანჩესტერ სიტი“ ფლობს.
