ლანჩხუთის სპორტული ცენტრში, როგორც ჩანს, მორიგმა დაპირისპირებამ იჩინა თავი. ამჯერად სოციალური ქსელის საშუალებით სპორტული ცენტრის ხელმძღვანელობის მისამართით უკმაყოფილებას ბერძნულ-რომაული სტილის მოჭიდავეთა მწვრთნელი დავით მჟავია აფიქსირებს.
„სპორტული ცენტრის გვერდზე დაიდო სტატია, რომელიც ეხება 22-24 თებერვლის შეჯიბრის მიმოხილვას და ასეთივე შინაარსით გამოქვეყნდა მუნიციპალიტეტის სხვადასხვა გაზეთში. წერილში საუბარია ჩემი სახელით. ვადასტურებ, რომ სტატიას საერთო არაფერი აქვს ჩემს მიერ მიწოდებულ სტატიასთან, გარდა ტექნიკური მონაცემისა, მითუმეტეს არავისთვის მომიხდია მადლობა, რისი მიზეზიც გამაჩნია. საპასუხი კომენტარი გავაკეთე სპორტული ცენტრის გვერდზე, რაც მაშინვე წაშალეს“, _ წერს დავით მჟავია და იქვე ცენტრის ხელმძღვანელობას რჩევასაც აძლევს, რომ „დაასრულოს მოჩვენებითი სიმშვიდის ილუზიები სპორტულ ცენტრში“.
რაც შეეხება მჟავიას კომენტარს, რომელიც მან ცენტრის ფეისბუქვერდზე დაწერა და წაუშალეს, წერს, რომ მის მიერ დაწერილ სტატიას ცენზურა არ სჭირდება.
რაც შეეხება სპორტული ცენტრის ფეისბუქგვერდზე გამოქვეყნებულ და შემდგომ ადგილობრივ პრესის ფურცლებზე გავრცელებულ ინფორმაციას, მასში საუბარია იმ შედეგებსა და მიღწევებზე, რაც ლანჩხუთელმა მოჭიდავეებმა დადეს თერჯოლაში გამართულ რესპუბლიკურ ტურნირზე. წერილის ბოლოს იმ შეკრებაზეცაა ნათქვამი, რომელიც სპორტსმენებმა ზემონახსენებ ტურნირამდე ბაკურიანში გაიარეს. წერილი კი მთავრდება იმით, რომ დავით მჟავიას სახელით მადლობაა დაფიქსირებული ცენტრისა და მუნიციპალიტეტის ხელმძღვანელობების მისამართით.
„გუნდი საწვრთნელ შეკრებას გადიოდა ბაკურიანში კეთილ მოწყობილ სასტუმროში და ბავშვები იმყოფებოდა იდალურ პირობებში,რამაც დიდი გავლენა მოახდინა თითოეული ბავშვის წარმატებაზე. ეს უკვე მე-2 საწვრთნელი შეკრებაა ბაკურიანში სპორტული ცენტრის დირექტორის გოჩა ლომაძის ორგანიზებით. რისთვისაც დიდ მადლობას ვუხდი ბატონ გოჩა ლომაძეს და მუნიციპალიტეტის ხელმძღვანელობას“, _ ვკითხულობთ სპორტული ცენტრის პრესსამსახურის მიერ გავრცელებული ინფორმაციის ფინალურ ნაწილში.
როგორც ჩანს, სწორედ წერილის ამ მონაკვეთმა გამოიწვია მჟავიას განსაკუთრებული გულისწყრომა, რომელიც თვლის, რომ არავის აქვს უფლება მისი სახელით აკეთოს განცხადებები და მითუმეტეს მადლობები ვინმეს მიმართ.
თანამშრომლის მხრიდან სოციალურ ქსელში გამოთქმულ პრეტენზიებს ცენტრის ხელმძღვანელობამ საკუთარ ფეისბუქგვერდზე განცხადებით უპასუხა-
„სპორტული ცენტრის დირექტორის ბრძანების (ბრძანება N 52) თანახმად, არცერთ თანამშრომელს არ აქვს უფლება პრესცენტრის გვერდის ავლით ითანამშრომლოს პრესასთან და სხვა მედია საშუალებებთან. აქვე აღვნიშნავთ, რომ ტექსტის კორექტირება ხდება მისი ფორმატიდან გამომდინარე და აქცენტი კეთდება სპორტსმენების წარმატებებზე და არა წარუმატებლობაზე! დაწვრილებითი ინფორმაციისთვის შეგიძლიათ კოლეგიალურობა გამოიჩინოთ და ითანამშრომლოთ სპორტული ცენტრის დირექტორთან და პრესსამსახურთან“.
ცენტრის ხელმძღავენელი გოჩა ლომაძე ამბობს, რომ ცენტრის მიერ მოხდა მოჭიდავეთა შეკრების ორგანიზება, დაფინანსება და ამისთვის მადლობის გადახდა გასაკვირი არ უნდა იყოს.
„ჩვენ მოჭიდავეებს დავუფინანსეთ შეკრება ბაკურიანში, რომელიც გაგრძელდა 10 დღე. ეს არ მოეწონა მჟავიას, თუ რა მოხდა?! როცა ხარ თანამშრომელი, არ უნდა დაარღვიო შინაგანაწესი, რაც სამწუხაროდ, ხშირად ხდება ბატონი დათოს მხრიდან. 15 სექციია ჩვენთან, ყველა მათგანს აქვს გარკვეული წარმატება. სამსახურს გააჩნია პრესსამსახური და ყველა სექცია თანამშრომლობს მასთან. ბატონი დავითი რატომღაც ჩვენი გვერდის ავლით ურთიერთობს მედიასთან, რაც არასწორია. ეს მივუთითეთ კიდეც და როგორც ჩანს არ მოეწონა.
მჟავია იმასაც, ამბობს მოჩვენებითი სიმშვიდეა სპორტულ ცენტრშიო. რა მოჩვენებითზე საუბრობს?! ყველაფერი კარგად არის. სხვადასხვა სახეობებში წარმატებები გვაქვს და ეს ცუდია?! ჭიდაობაშიც გვაქვს წარმატება და ესეც გვიხარია ბუნებრივია. არაფერი საგანგაშო არ ხდება ჩვენთან. პირიქით, ვმუშაობთ იმაზე, რომ უფრო წარმატებულები იყონ ჩვენი ბავშვები“, _ ამბობს ლომაძე.
სხვათა შორის „გურია ნიუსი“ გასულ წელსაც წერდა სპორტულ ცენტრში არსებულ დაპირისპირებაზე, სადაც ცენტრის დირექტორს, გოჩა ლომაძეს თანამშრომლების მიმართ ძალადობაში ამხელდნენ. თუმცა მაშინ ლომაძე მისი მისამართით გაჟღერებულ ყველა ბრალდებას კატეგორიულად უარყოფდა. სპორტული ცენტრის თანამშრომელთა ნაწილიც მხარდაჭერას გამოთქვამდა დირექტორის მიმართ.
გარდა ამისა, რამდენიმე თვის წინ, ხმაური და დაპირისპირება მოჰყვა ლანჩხუთის საკრებულოს სოციალური კომისიის სხდომაზე სპორტული ცენტრის საკითხის განხილვას. მაშინ კომისიის სხდომაზე ცენტრის დირექტორს გოჩა ლომაძეს თანამშრომელთა ნაწილი ღიად დაუპირისპირდა და მისი სამსახურიდან წასვლა მოითხოვა.
