ცვლილებები ლანჩხუთის ბიუჯეტში ინფრასტრუქტურული პროექტებისთვის

წლის მთავარ საფინანსო დოკუმენტში ცვლილების განხორციელების თაობაზე მოუწია მსჯელობა ლანჩხუთის საკრებულოს საფინანსო კომისიას.

როგორც საკითხის მომხსენებელმა, მერიის საფინანსო სამსახურის უფროსმა, როლანდ ლაშხიამ განმარტა, მთავრობის 2019 წლის 18 დეკემბრის N2630 განკარგულებაში მიმდინარე წლის 19 აგვისტოს  შესული ცვლილებებით მუნიციპალიტეტს დამატებით გამოეყო 686303 ლარი, შესაბამისად ადგილობრივი ბიუჯეტით 5%-ი თანადაფინანსება განისაზღვრა 36121 ლარით.  ჯამში კი ინფრასტრუქტურული ობიექტების დაფინანსებას 722 424 ლარი  მოხმარდება.

აღნიშნული თანხიდან 200 ათასი ლარი, რომლის თანადაფინანსებისთვის 10 ათასი ლარის გაღება მუნიციპალიტეტს მოუწევს,  მიიმართება ღრმაღელე-ორმეთი-ომფარეთის გზის რეაბილიტაციაზე.

 371 499 ლარით, რომლის თანადაფინანსებისთვის  18 575 ლარია საჭირო, ქალაქის სამ  ქუჩაზე სანიაღვრე არხების მოწყობაა გათვალისწინებული.

ქალაქში, გორგასლის ქუჩის მიმდებარედ მინი სტადიონის მოწყობას 150 925 ლარი მოხმარდება, რომლის თანადაფინასებისთვისაც  7 546 ლარია საჭირო.

როგორც კომისიის სხდომაზე გაჟღერდა, საჯარო სკოლების ინფრასტრუქტურის გასაუმჯობესებლად საქონლის, მომსახურების და სამუშაოების შესყიდვის დელეგირებული უფლებამოსილების განხორციელების მიზნით მიზნობრივი ტრანსფერის ლიმიტი  90 ათასი ლარით გაიზარდა და  610 ათასი ლარით განისაზღვრა.

მერიის საფინანსო სამსახურის განმარტებითვე,  მუნიციპალიტეტს დამატებით გამოეყო 1 300 000 ლარი, ხოლო სტიქიით დაზიანებული ობიექტების სრულყოფილი რეაბილიტაციის მიზნით ადგილობრივი ბიუჯეტიდან მიიმართება 120 000 ლარი არაფინანსური მუხლის ზრდის ხარჯზე.

როგორც საფინანსო კომისიის თავმჯდომარემ, ალექსანდრე მახათაძემ აღნიშნა, შესაძლებლობების ფარგლებში, მოცემულ თანხას, სასურველია დაემატოს 20 ათასი ლარი სტიქიის დროს დაზიანებული ობიექტების რეაბილიტაციისთვის.

სხდომაზევე ითქვა, რომ  19 010 ლარით გაიზარდა არაფინანსური აქტივები საქართველოს ტერიტორიული მთლიანობისათვის ბრძოლაში დაღუპულ გმირთა მემორიალის მოწყობის მიზნით. ხოლო  ა(ა)იპ „კეთილმოწყობისა და მომსახურების ცენტრის წერილის განხილვის შედეგად მიზანშეწონილად ჩაითვალა  დაფინანსება 47 650 ლარით გაიზარდოს.

საბოლოოდ კომისიამ დასტური მიცა, რომ  გაიზარდოს ბიუჯეტი შემოსავლის ნაწილში 313 581 ლარით, ჯარიმების, სანქციების და საურავებიდან მიღებული შემოსავლის გეგმა 313 581 ლარით ზრდის ხარჯზე.