გამოცემა „Sky Sport“-ის მტკიცებით, ნიგერიელი ვიქტორ ოსიმენი „ნაპოლისთან“ ხელშეკრულებას ერთი წლით, 2026 წლის ზაფხულამდე განაახლებს და მისი გამოსასყიდი თანხა 150 მილიონი ევრო იქნება.
ოსიმენი სეზონში 10 მილიონ ევროზე მეტს მიიღებს, ბონუსების ჩათვლით 12 მილიონ ევრომდე და ახლა სხვებთან შედარებით კიდევ უფრო მაღალი ხელფასი ექნება.
საინტერესოა, რომ ხვიჩა კვარაცხელია სეზონში ამჟამად სულ რაღაც 1.2 მილიონს გამოიმუშავებს, ხოლო ნეაპოლელები კონტრაქტის განახლების სანაცვლოდ 2.5 მილიონ ევროს ჰპირდებიან – ოსიმენის ხელფასთან შედარებით ძალიან დაბალ გასამრჯელოს.
ოსიმენის ხელფასის ზრდის პარალელურად, გავრცელდა ცნობა რომ ქართველი ფეხბურთელი იტალიური კლუბისგან ხელფასის მკვეთრ მატებას ითხოვს – ისეთ ანაზღაურებას, როგორსაც „სერია A“-ს საუკეთესო ფეხბურთელი იმსახურებს.
კვარას ხელფასი ამჟამად სეზონში 1.5 მილიონ ევროზე გაცილებით ნაკლებია, წერდნენ, რომ კონტრაქტის განახლების შემთხვევაში მისი გასამრჯელო გაორმაგდებოდა, 2.5 მილიონ ევრომდე, მაგრამ არც ეს არის ის ანაზღაურება, რასაც რეალურად კვარა იმსახურებს.
გამოცემამ „Il Mattino“ დაწერა, რომ კვარაცხელიამაც მოითხოვა მისი პირობების გადახედვა და კლუბს ხელფასის სახით სეზონში დაახლოებით 4.5 მილიონი ევრო მოსთხოვა, რაც იტალიური კლუბების სახელფასო ბიუჯეტიდან და მისი სტატუსიდან გამომდინარე, უფრო სამართლიანი ანაზღაურება იქნება. საინტერესოა, რომ „ნაპოლიში“ კვარას ერთ-ერთი ყველაზე დაბალი ხელფასი აქვს
ცნობილი გახდა, რომ პორტუგალიელმა მარიო რუიმ „ნაპოლის“ დატოვება გადაიფიქრა.
გუსინ, „ნაპოლის“ პრეზიდენტმა აურელიო დე ლაურენტისმა მარიო რუის კონტრაქტი 2026 წლის ზაფხულამდე გაუგრძელა.
დე ლაურენტისმა სოციალურ ქსელში სურათიც გამოაქვეყნა და წარწერაც დაურთო: „მარიო ჩვენთან 2026 წლამდე რჩება“.
„ნაპოლის“ ყოფილი თავკაცი ლუჩანო სპალეტი კი იტალიის ეროვნულ გუნდს ჩაიბარებს. უახლოეს დღეებში, იტალიის ფეხბურთის ფედერაცია ამ ამბავს ოფიციალურად დაადასტურებს.
სანამ ეს ამბავი გაოფიციალურდებოდა ერთი გარკვეული წინააღმდეგობა არსებობდა -„ნაპოლისთან“ არსებული ცალმხრივი კონტრაქტი. იტალიის ფეხბურთის ფედერაციას აურელიო დე ლაურენტისთან მოლაპარაკებების დაწყება მოუწია, რათა მისი გამოსასყიდი თანხა, დაახლოებით 3 მილიონი ევრო არ გადაეხადა. როგორც ირკვევა, შეთანხმება მიღწეულია და სულ მალე ლუჩანო რობერტო მანჩინის შეცვლის, რომელმაც ნაკრები პირადი მიზეზების საფუძველზე დატოვა.
ცნობილია კონტრაქტის დეტალებიც. ის 2026-წლამდე გაფორმდება, ხოლო სპალეტის წლიური გასამრჯელო 3 მილიონი ევროთი განისაზღვრება.
„ბოლონია“ მარკო არნაუტოვიჩის შემცვლელს ეძებს. იტალიური მედიის ინფორმაციით, გამოკვეთილია ორი კანდიდატი – ბელგიელი უგო კუიპერსი, რომელიც „გენტის“ თავდამსხმელია და გიორგი მიქაუტაძე.
გადამწყვეტი ფაქტორი ალბათ ფასი იქნება. 26 წლის კუიპერსი 16 მილიონი ევრო ღირს, საქართველოს ნაკრების 22 წლის ფორვარდი კი, „ტრანსფერმარკტის“ მიხედვით, 10 მილიონ ევროდ ფასობს, თუმცა საეჭვოა „მეცი“ ქართველს ამ ფასად შეელიოს.
ბრატისლავის „სლოვანმა“ კი, რომელსაც ვლადიმირ ვაისი წვრთნის და გურამ კაშია და ჯაბა კანკავა გამოდიან, შესაძლოა, კიდევ ერთი ქართველი ლეგიონერი დაიმატოს. საუბარია საქართველოს 21-წლამდელთა ნაკრებისა და ესპანური „ალავესის“ შემტევ გიორგი გაგუაზე.
გიორგი გაგუას საბაზრო ფასი 300 ათას ევროს შეადგენს. წელს მან საქართველოს ნაკრებთან ერთად ევროპის 21-წლამდელთა ჩემპიონატის 1/4-ფინალში ითამაშა, გასულ სეზონში კი ის ესპანეთის მესამე დივიზიონის „რეალ უნიონში“ გამოდიოდა.
ავტორი
